ސިޔާސީ ޕާޓީތަކަށް މެންބަރުން ދަފްތަރުކުރުމުގައި އީ- ފާސް ބޭނުންކުރުމާ ގުޅޭގޮތުން، ނެޝަނަލް ސެންޓަރ ފޮރ އިންފޮރމޭޝަން ޓެކްނޮލޮޖީ (އެންސީއައިޓީ) އާއި އެކު އިލެކްޝަންސް ކޮމިޝަނުން ބައްދަލުކޮށްފިއެވެ.
ކޮމިޝަނުން މި މަޝްވަރާތައް ކުރިޔަށް ގެންގޮސްފައި ވަނީ، ސިޔާސީ ޕާޓީތަކަށް އޮޅުވާލައިގެން މެމްބަރުން ވައްދާ މައްސަލަ އަނެއްކާވެސް ފެންމަތިވެފައި ވަނިކޮށެވެ. އެގޮތުން މިފަހުން ޕީއެންސީގެ މެމްބަރުންތައް އިތުރު ކުރުމުގައި އެފަދަ އޮޅުވާލުންތަކެއް ހިމެނޭކަމަށް ތުހުމަތުކޮށް އެމްޑީޕީ ވަނީ އެ މައްސަލަ އީސީއާއި ފުލުހަށް ހުށަހަޅާފަ އެވެ.
މި މައްސަލަ ހައްލު ކުރުމަށް ކޮމިޝަނުން މީގެ ކުރިން ވެސް ދިން ހިޔާލަކީ، އީފާސް ބޭނުން ކުރަން ފެށުމެވެ. އަދި އެކަމުގެ މައުލޫމާތުތައް ކޮމިޝަނުގެ ފަރާތުން މީޑީއާތަކާއި ހިއްސާކޮށްފައި ވެއެވެ.
ސިޔާސީ ޕާޓީތަކަށް މެމްބަރުން ދަފްތަރު ކުރުމުގައި އީފާސް ބޭނުން ކުރުމާއި ގުޅޭގޮތުން އީސީގައި ކުރިއަށްގެންދިޔަ މި ބައްދަލުވުމުގައި، އެންސީއައިޓީގެ ފަރާތުން ސްޓޭޓް މިނިސްޓަރ ޑރ. މުޙައްމަދު ކިނާނަތާއި ޑެޕިއުޓީ މިނިސްޓަރ މުޙައްމަދު މައުރޫފް ބައިވެރިވެ ވަޑައިގަތެވެ. އަދި އީސީގެ ފަރާތުން ކޮމިޝަނުގެ ފަސް މެންބަރުންނާއި ސެކްރެޓަރީ ޖެނެރަލްގެ އިތުރުން ކަމާގުޅުންހުރި ޑިވިޜަންތަކާއި ސެކްޝަންތަކުގެ ވެރިން ބައިވެރިވިއެވެ.
މީޑިއާތަކަށް މައުލޫމާތު ދެމުން ކޮމިޝަނުން ބުނީ މި ބައްދަލުވުމުގެ މައިގަނޑު މަގްސަދަކީ، ސިޔާސީ ޕާޓީތަކަށް މެންބަރުން ވެއްދުމުގެ ނިޒާމު ޑިޖިޓަލްކޮށް، އީފާސް މެދުވެރިކޮށް ސިޔާސީ ޕާޓީތަކަށް މެންބަރުން ވެއްދުމަށް ޕޯޓަލް ބޭނުންކުރަން ފެށުމުގެ ކުރިން ކުރަންޖެހޭ ޓެކްނިކަލް ކަންތައްތަކާމެދު މަޝްވަރާކުރުން ކަމަށެވެ. އަދި މި ބައްދަލުވުމުގައި ސިޔާސީ ޕާޓީތަކުން ހުށަހަޅާފައިވާ ހިޔާލުތަކައި ކަންބޮޑުވުންތަކާ ގުޅޭގޮތުންވެސް މަޝްވަރާކުރެވިފައިވާކަމަށް ބުންޏެވެ.
މީގެ އިތުރުން، ސިޔާސީ ޕާޓީތަކުގެ މެންބަރުންގެ ދަފްތަރާ ގުޅިގެން ލިބޭ ޝަކުވާތަކާއި ފޯމުތައް ޕްރޮސެސް ކުރުމުގައި ދިމާވާ ދަތިތަކާގުޅޭ ގޮތުންނާއި ދަތިތައް ހައްލުކުރުމަށް އެޅިދާނެ ފިޔަވަޅުތަކާ ގުޅޭގޮތުން ސިޔާސީ ޕާޓީތަކާއި ކަމާ ގުޅުން ހުރި ސަރުކާރުގެ ވުޒާރާތަކާ ބައްދަލުކުރުމަށް ވަނީ ތާވަލުކުރެވިފައެވެ.
