މޯލްޑިވްސް ޕޯޓްސް ލިމިޓެޑްގެ މެނޭޖިން ޑިރެކްޓަރު ކަމުގެ މަޤާމުންނާއި ބޯޑު ޑިރެކްޓަރު ކަމުގެ މަގާމުން މުހައްމަދު ވަޖީހު އިބްރާހީމް، ވަކިކޮށްފިއެވެ.
ވަޖީހު މަގާމުން ވަކި ކުރިކަން ހާމަކުރީ، މިރޭގެ ވަގުތެއްގައި ޕްރައިވަޓައިޒޭޝަން އެންޑް ކޯޕަރައިޓޭޒޭޝަނުން ކުރި ޕޯސްޓެއްގަ އެވެ.
ވަޖީހު މަގާމުން ވަކި ކުރިއިރު، މި ފަހުން ޓޫރިޒަމް މިނިސްޓަރުގެ މަގާމުގައި ހުންނަވި އިބްރާހިމް ފައިސަލް ވެސް ވަނީ ވަކިކޮށްފަ އެވެ.
ސަރުކާރުގެ މަގާމުތަކުގައި ތިއްބެވި ބައެއް ބޭފުޅުންތައް މީގެ ކުރިން ވެސް ވަކިކޮށްފައި ވެއެވެ. އަދި ވަޖީހު އެމްޕީއެލްގެ މެނޭޖިން ޑިރެކްޓަރުކަމުން ވަކި ކުރީ ކޮން ސަބަބަކާއި ހުރެކަން ސާފެއް ނޫނެވެ.
ރައީސް ޑރ. މުހައްމަދު މުއިއްޒު ވަނީ އެމަނިކުފާނު ހަވާލު ކުރައްވާފައިވާ މަސްއޫލިއްޔަތު އަދާކުރުމުގައި އެއްވެސް މީހެއްގެ ފަރާތުން ގޯހެއް ނުވަތަ ކޮރަޕްޝަނަށް މަގުފަހިވާ އެއްވެސް ކަމެއް ފާހަގަވެއްޖެ ނަމަ މަގާމުން ވަގުތުން ފިޔަވަޅު އަޅުއްވާނެކަމަށް ވިދާޅުވެފައެވެ. އަދި ކޮރަޕްޝަނަށް އެއްވެސް ޖާގައެއް ސަރުކާރުން ނުދެއްވާނެކަމަށް ވެސް ވިދާޅުވި އެވެ.
