ޣައްޒާގެ ހާލުގައި ޖެހިފައިވާ ހުރިހާ ސަރަހައްދަކަށް އިންސާނީ އެހީތެރިކަން ފޯރުކޮށްދިނުން އަވަސްކުރަން ރާއްޖެއިން ގޮވާލައިފިއެވެ.
ފޮރިން މިނިސްޓްރީން ބުނީ، މިޞުރުގެ ވެރިރަށް އަލް ޤާހިރާގައި ބޭއްވުނު ”ޢަރަބް ސިކްސް-ޕާޓީ“ މަޝްވަރާ ބައްދަލުވުމުގެ ނިންމުންތަކަށް ދިވެހިރާއްޖެއިން މަރުހަބާ ކިޔާކަމަށެވެ.
އޭގެ އިތުރުން، ޣައްޒާގައި ހިނގަމުންދިޔަ ހަނގުރާމަ ހުއްޓާލުމުގެ އެއްބަސްވުން ދެމެހެއްޓުމަށް ކުރަމުންގެންދާ އެންމެހާ މަސައްކަތްތަކަށް ދިވެހިރާއްޖެއިން ތާޢީދުކޮށް، އެ އެއްބަސްވުން ފުރިހަމައަށް ތަންފީޒުކުރުމަށް ކަމާގުޅުންހުރި އެންމެހާ ފަރާތްތަކަށް ރާއްޖެއިން ވަނީ އިލްތިމާސްކޮށްފައެވެ.
ހަމައެއާއެކު، ޣައްޒާގެ ހާލުގައި ޖެހިފައިވާ ހުރިހާ ސަރަހައްދަކަށް ލަސްނުކޮށް، އެއްވެސް ހުރަހަކާނުލާ އިންސާނީ އެހީތެރިކަން ފޯރުކޮށްދިނުމަށް އަޅަންޖެހޭ ފިޔަވަޅުތަށް ހަލުވިކަމާއެކު އެޅުމުގެ މުހިންމުކަން ދިވެހި ސަރުކާރުން ވަނީ ފާހަގަކޮށްފައެވެ.
ޣައްޒާ އަލުން އާރާސްތު ކުރުމާބެހޭގޮތުން މަޝްވަރާކުރުމަށް ބައިނަލްއަޤްވާމީ ބައްދަލުވުމެއް ބޭއްވުމަށް ހުށަހަޅާފައިވާ ހުށަހެޅުމަށްވެސް ދިވެހިރާއްޖެއިން ވަނީ މަރުޙަބާ ކިޔާފައެވެ.
އޭގެ އިތުރުން، ދިވެހި ސަރުކާރުން ޤަބޫލުކުރާގޮތުގައި ފަލަސްޠީނުގައި ހިނގަމުންދާ ހަމަނުޖެހުމަށް ދެމެހެއްޓެނިވި ޙައްލެއް ލިބޭނީ 1967ގެ ކުރިން ކަނޑައެޅިފައިއޮތް އިންތަކުގެ މައްޗަށް ބިނާކޮށް، އިރުމަތީ ޤުދުސްއަކީ ވެރިރަށުގެ ގޮތުގައި ކަނޑައެޅިފައިވާ، މިނިވަން އަދި މުސްތަޤިއްލު ފަލަސްޠީނުގެ ދައުލަތެއް ޤާއިމުކުރެވިގެންކަންވެސް ފާހަގަކޮށްފައިވެއެވެ.
