ކުރިޔަށް ދެ މަސް ދުވަހުގެ ތެރޭގައި ރާއްޖެއާއި ތުރުކީވިލާތް ދެމެދު ގާއިމު ކުރާ ޓްރޭޑް އެގްރިމަންޓުގެ، ޕްރިފަރެންޝަލް ޓްރޭޑް އެގްރީމަންޓް (ޕީޓީއޭ) އެކްޓިވްވާނެކަމަށް އިކޮނޮމިކް މިނިސްޓަރ މުހައްމަދު ސައީދު ވިދާޅުވެއްޖެއެވެ.
ދިވެހިންގެ އުފެއްދުންތެރިކަމުގެ މައުރަޒު 2025 އިފްތިތާހު ކުރުމަށް ބޭއްވި ރަސްމިއްޔާތުގައި މިނިސްޓަރ ޖުމްލަ ގޮތެއްގައި ފާހަގަކުރެއްވީ ވިޔަފާރީގެ ރޮނގުން އިތުރު ފުރުސަތުތައް ހޯދައިދިނުމާއި ގުޅޭގޮތުންނެވެ. އެގޮތުން ކުދި ވިޔަފާރިތައް ކުރިއަރުވައި ފުޅާކުރުމަށް މި އަހަރު ގިނަ ފުރުސަތުތައް ހުޅުވާލެވިގެން ދާނެކަމަށް ވިދާޅުވި އެވެ. އަދި އެ ފަރާތްތަކުގެ އުފެއްދުންތައް ގާނޫނުގެ ތެރެއިން ރައްކާކުރެވޭނެ ގޮތް މަގުފަހި ކުރުމަށް ސަރުކާރުން މަސައްކަތް ކުރަމުންދާކަމަށް ސައީދު ވިދާޅުވި އެވެ.
ސައީދު ވިދާޅުވީ ޓްރޭޑްމާކްލުމާއި، ބްރޭންޑު ރައްކާކޮށް ވިިޔަފާރި ކުރާ ފަރާތްތަކަށް ޔަގީންކަން ދިނުމުގެ ގޮތުން ގާނޫނީ އޮނިގަނޑެއް އެކުލަވާލާނެކަމަށެވެ. އެއާއި އެކު އޮންލައިން ވިޔަފާރިތަކަށް ވެސް ކުރިން ނުލިބި ހުރި ފުރުސަތުތައް ލިބިގެންދާނެކަމަށް ސައީދު ވިދާޅުވިއެވެ.
ރާއްޖެއާއި ތުރުކީގެ ފްރީ ޓްރޭޑް އެގްރިމަންޓުގެ އެއްބަސްވުން ދިވެހި ސަރުކާރުން އެކުލަވާލާފައިވާކަން ހާމަކޮށްފައި ވަނީ މިދިޔަ ސެޕްޓެމްބަރު މަހުގެ ތެރޭގަ އެވެ. އެއީ މިދިޔަ މާޗު މަހުގެ ތެރޭގައި ސަރުކާރާއި އެ ގައުމު ދެމެދު ކުރެވުނު މަޝްވަރާތަކުގެ ބައެކެވެ.
މި އެއްބަސްވުމުގެ ތެރެއިން 38 ބާވަތަކުން ޑިއުޓީ ކަނޑާލަން ރާއްޖެއިން ވަނީ ތުރުކީ ސަރުކާރުގައި އެދިފައެވެ. އެކަން ފާހަގަކޮށް މިނިސްޓަރ ވިދާޅުވީ އެ ގައުމުން ގެންނަ ގިނަ މުދާ ޑިއުޓީ ފްރީވެގެން ދާނެކަމަށެވެ. މިނިސްޓަރ ވިދާޅުވި ގޮތުގައި އެއީ އެތެރެ ކުރާ މުދާތަކުން ގާތްގަނޑަކަށް 80 އިންސައްތައެވެ.
ތުރުކީއާއި އެކު ވެސް އެ އޮތީ ޕްރިފެރެންޝަލް ޓްރޭޑު އެގްރިމަންޓެއް ސޮއި ކުރެވިފައި.. ތުރުކީވިލާތުން ގެންނަ ގިނަ މުދާ ގާތްގަނޑަކަށް ހުރިހާ މުދަލެއްކަހަލަ ގޮތަކަށް ވަރަށް ލުއި ގޮތްތަކާއި އެކު ވަރަށް ގިނަ އަދަދަކަށް އަޅުގަނޑު ހަނދާންވާ ގޮތުން 80 އިންސައްތަ ޑިއުޓީ ފްރީވެގެން ދާނެ ތަންފީޒުވެގެން އައިމަ..
މިނިސްޓަރ ވިދާޅުވީ ކުރިޔަށް އޮތް އެއް މަސް ނުވަތަ ދެ މަސް ދުވަހުގެ ތެރޭގައި ތުރުކީއިން ރާއްޖެއާއި އެކު ހެދިފައި އޮތް ޕީޓީއޭ ތަންފީޒު ކުރެވެން ފަށާނެކަމަށެވެ.
މީގެ ކުރިން މި އެއްބަސްވުމާއި ގުޅޭގޮތުން ދެއްކެވި ވާހަކައިގައި މިނިސްޓަރ ސައީދު ވިދާޅުވެފައި ވަނީ އެންމެ އިސްކަމެއް ދީފައި ވަނީ ޔެލޯފިން ޓޫނާއާއި ސްކިޕްޖެކް ޓޫނާ އަދި ހިކިމަހުގެ ބާވަތްތަކުން ތައްޔާރު ކުރާ ކާނާއަށް ކަމަށެވެ.
