ޝަރީއަތް ނިމެންދެން ބަންދުގައި ހުންނަން ޖެހޭ މުއްދަތު ދިގުލައިގެންދާ މައްސަަލައިގައި ކުރިޔަށް ގެންދެވުނު ”ބަންދު ފޯރަމް“ ގައި ހުށަހެޅުނު ހިޔާލުތައް ކަމާއި ބެހޭ އިދާރާތަކަށް ހުށަހަޅާނީ ޖުޑިޝަރީއާއި މަޝްވަރާކުރުމަށް ފަހުކަމަށް ޕްރޮސެކިއުޓަރ ޖެނެރަލްގެ އޮފީހުން ބުނެފިއެވެ.
ރައްޔިތުންގެ މަޖިލީހުގެ ޖުޑިޝަރީ ކޮމިޓީގައި ޖޭއެސްސީ ހިމެނޭހެން ކަމާއި ގުޅުން ހުރި އިދާރާތަކާއި ބައްދަލުކޮށް އެކި ފަހަރުމަތީން މި މައްސަލައިގައި މަޝްވަރާތައް ކުރިޔަށް ގެންގޮސްފައި ވެއެވެ. އެހެން ނަމަވެސް ކޯޓުތަކުގެ ޖާގައިގެ ދަތިތަކާއި ހުރެއާއި އެ ނޫން ވެސް ސަބަބުތައް ދިމާވެ ކުދިކުދި މައްސަލަތަކުގައި ވެސް އަހަރުތަކެއް ވަންދެން ބަންދުގައި ގިނަ ބަޔަކު ތިބެންޖެހެ އެވެ.
މިކަމާއި ގުޅޭ ހައްލުތައް ހޯދައި ހުށަހެޅުމަށްޓަކައި މަޝްވަރާ ކުރުމަށް ”ބަންދު ފޯރަމް“ ގެ ނަމުގައި ހާއްސަ ބައްދަލުވުމެއް ވަނީ ކުރިޔަށް ގެންގޮސްފައެވެ.
ޕީޖީ އޮފީހުން އާންމު ކުރި ލިއުމުގައި ބުނީ ޝަރީއަތް ނިމެންދެން މީހުން ބަންދު ކުރުމާއި ގުޅޭ މައްސަލަ ހައްލު ކުރުމަށް ބޭއްވި ބަންދު ފޯރަމްގައި ބައިވެރިވި އިދާރާތްތަކުން އިއްތިފާގުވި އެއްކަމަކީ ޝަރީއަތް ނިމެންދެން ބަންދު ކުރުމަކީ މައްސަލައެއް ނޫން ނަމަވެސް އޭގެ ޒާތުގައި ޝަރީއަތްތައް ދިގުލައިގެން ދިއުންކަމަށެވެ. އަދި އެންމެ ބޮޑު ކަންބޮޑުވުމަކީ ވެސް ޝަރީއަތްތައް ކުރިޔަށް ނުގޮސް، މައްސަލައިގައި ވާނުވާއެއް ނޭނގި ގިނަ ދުވަސް ޖަލު ބަންދުގައި ތިބެން ޖެހުންކަން ފާހަގަކުރި އެވެ.
އިއްޔެ ކުރިޔަށް ގެންދިޔަ މަޝްވަރާތަކާއި ގުޅޭގޮތުން ޕީޖީ އޮފީހުން މައުލޫމާތު ދެމުން ބުނީ ޖިނާއީ މައްސަލަތައް އަވަސް ކުރުމަށް ކޯޓުތަކަށް ފަހިކޮށްދީ އެހީތެރިވުމަށް އިދާރާތަކަށް އެޅިދާނެ ފިޔަވަޅުތަކާއި ގުޅޭގޮތުން އެކި ހިޔާލުތައް ބަދަލުކުރެވުނު ކަމަށެވެ. އެގޮތުން ޖިނާއީ އަދުލުގެ ނިޒާމުގައި ހިމެނޭ އިދާރާތަކުގައި ގާއިމުކޮށްފައިވާ ވީޑިއޯ ކޮންފަރެންސް ސިސްޓަމްތައް އިތުރުކުރުމާއި ކޯޓުތަކުގެ އަޑުއެހުންތައް އޮންލައިން ޝެޑިއުލް ނިޒާމެއްގެ ތެރެއިން ގެންދިއުމާއި ގުޅޭގޮތުން ވާހަކަދެކެވިފައިވާނެކަމަށް ބުންޏެވެ.
”ބަންދު ފޯރަމް“ ގެ ފުރަތަމަ ބައި ކުރިއަށްގެންދެވުނީ، ޖުޑީޝިއަރީ ފިޔަވައި ޖިނާއީ ޢަދުލުގެ ނިޒާމުގައި ހިމެނޭ އެހެން އިދާރާތަކާއެގައެވެ. މި ފޯރަމުގެ ދެން އޮންނާނީ ޖުޑީޝަރީއާއެކު ކުރިއަށްގެންދާ ބައެވެ. އެގޮތުން މި ފޯރަމުގައި ހޯދުނު ހޯދުންތަކާއި، ޙައްލުތައް ޖުޑީޝަރީއަށް ހުށަހަޅައި މަޝްވަރާކުރުމަށްފަހު، ޖުޑީޝަރީގެ ބައިވެރިވުމާއެކު އެކަންކަން ތަންފީޛްކުރުމަށް ސަރުކާރަށާއި، ކަމާބެހޭ އިދާރާތަކަށް ހުށަހަޅާނަމެވެ. އަދި އެކަންކަން ތަންފީޛްކުރެވެމުންދާ މިންވަރާމެދު މި އޮފީހުން ފާރަވެރިވަމުން ގެންދާނަމެވެ.
