ނުފޫޒާއި އަނިޔާވެރިކަން ފެންނަން އޮތީ ކުރީގެ ސަރުކާރުތަކުންކަމަށާއި، އެބޭފުޅުން ހިންގެވި މަގުން ރައީސް ޑރ. މުހައްމަދު މުއިއްޒު ހިންގަވާފާނެކަމަށް ދެކުމަކީ ކުށްހީއެއްކަމަށް މަތިވެރި ދާއިރާގެ ޕީއެންސީގެ މެމްބަރު ހަސަން ޒަރީރު ވިދާޅުވެއްޖެ އެވެ.
ޒަރީރު މިފަދައިން ވިދާޅުވެފައި ވަނީ، ސުޕްރީމް ކޯޓުގެ ތިން ފަނޑިޔާރަކު ސަސްޕެންޑު ކުރީ ކޯޓުގައި ހިނގަމުން ދިޔަ މައްސަލައަށް ނުފޫޒު ފޯރުވުމަށްކަމަށް ބުނެ އަމާޒުވާ ފާޑުކިއުންތަކަށް ރައްދު ދެއްވަމުންނެވެ. ސަސްޕެންޝަނުގެ މައްސަލައިގައި ފަނޑިޔާރުކަމުން ހުސްނުއް ސުއޫދު އިސްތިއުފާ ދެއްވިއިރު ސުލޫކީ މައްސަލައިގައި ސުވާލު ކުރުމަށް ފަނޑިޔާރު މަހާޒް އަލީ ޒާހިރާއި ފަނޑިޔާރު އަޒްމިރަލްދާ ޒާހިރު ޖޭއެސްސީއަށް ހާޒިރު ކުރުމަށް ވަނީ ނިންމާފަ އެވެ.
ސަންގުޓީވީގެ ޚަބަރަށްފަހު ޕްރޮގްރާމްގައި ޒަރީރު ވިދާޅުވީ ރާއްޖޭގެ ޖުޑިޝަރީއަށް ނުފޫޒު ފޯރުވައި، ކޯޓުތަކުގެ ފަނޑިޔާރުންނަށް ބިރު ދެއްކުން ހިނގީ މާޒީގައި ކަމަށެވެ. އެގޮތުން ރައީސް ޔާމީންގެ ވެރިކަމުގައި ސުޕްރީމް ކޯޓު ފުރާޅުން ޓިނު ނެގައި ފަނޑިޔާރުން ރަހީނު ކުރި ނޫންތޯ ސުވާލު އުފައްދަވައި ވިދާޅުވީ އެމްޑީޕީގެ ވެރިކަމުގައި އަމަލު ކުރި ގޮތަކީ ހިތްހަމަނުޖެހޭ ކޮންމެ ފަނޑިޔާރެއްގެ ސުލޫކީ މައްސަލަތައް ބެލުން ކަމަށެވެ.
ޒަރީރު ވިދާޅުވީ އަމިއްލަ ސަރުކާރުގައި، ރައްޔިތުން ދުވަހަކު ވެސް ހަނދާން ނުނެތޭހާ ކޮރަޕްޝަނާއި ނުފޫޒު ބޭނުންކޮށް ހަމަހަމަކަމާއި ބޭއިންސާފުގެ ވާހަކަ ދެއްކުމުގެ ހައްގު ރައީސް ޔާމީނަށް ނޯންނާނެ ކަމަށެވެ. އަދި ރައީސް ޔާމީނަކީ ކޯޓުތަކުގެ ހައްގުގައި ވާހަކަ ދެއްކެވޭނެ ހިސާބެއްގައި ހުންނެވީ ބޭފުޅެއް ނޫންކަމަށް ޒަރީރު ވިދާޅުވި އެވެ.
މިއާއި އެކު އެމްޑީޕީގެ ވެރިކަމުގައި ތާރީހުގައި ވެސް އެންމެ ގިނައިން ފަނޑިޔާރުންނާއި ގުޅުން ހުރި މައްސަލަތައް ބަލައި ވަކި ކުރިކަން ޒަރީރު ފާހަގަކުރެއްވި އެވެ. އެހެންކަމުން އެ ސަރުކާރުގައި ހިނގިކަމެއް، ދެވަނަ ވެރިކަމެއްގައި ހިނގާފާނެކަމަށް ބަލައި ނުވަތަ އެ ބަޔަކު ފޯރުވި ނުފޫޒެއް ދެން އަންނަ އެހެން ވެރިއަކު ވެސް ފޯރުވަފާނެކަމަށް އެމްޑީޕީ ދެކުމަކީ ކުށްހީއެއްކަމަށް ޒަރީރު ވިދާޅުވި އެވެ.
ރައީސް ޔާމީންގެ ވެރިކަމުގައި ސުޕްރީމް ކޯޓުގެ ފަނޑިޔާރުން ހައިޖެކުކޮށްގެން.. އަނެއްހެން ބުނާނަމަ ހައިޖެކުތާ އެ ކުރީ.. ހައިޖެކުކޮށްގެން ފޮރުވައިގެން ޖަލު ކުޑަ ގޮޅީގައި ގެންގުޅުނު.. ދެން މިއަދު ކައިރީގައި މަދު ބަޔަކު ބައިތިއްބައިގެން އިނދެގެން ފަނޑިޔާރުގެއަށް މި ސަރުކާރުން ނުފޫޒު ފޯރުވާ ވާހަކަ ދެއްކީމަ އަންނަނީ ހިނި.. އެމަނިކުފާނުގެ ސަރުކާރުގައި މި ގައުމުގެ ތާރީހުގައި ވެސް ހިނގާފައި ނުވާ ކަންކަން ހިނގި.. މި ގައުމުގެ ފުރާޅުން ޓިނު ނަގައިގެން.. ކުރިން މިކަހަލަ މަންޒަރު ފެންނަނީ ފިލްމުތަކުން.. އެކަހަލަ މަންޒަރެއް މިފެނުނީ ރާއްޖޭގައި… އަޅުގަނޑުމެން އެންމެންގެ ލޯ ކުރިމަތީގައި..
ޒަރީރު ވިދާޅުވީ ފަނޑިޔާރުންގެ މައްސަލަ ބަލައި، ޖަލު ގޮޅީގައި ރައީސް ޔާމީން ބަންދު ކުރިކަމަށާއި އެ އަމަލު ބެލެވޭނީ ހައިޖެކު ކުރުން ގޮތުގައި ކަމަށެވެ.
ހަގީގަތް ގަބޫލު ކުރުމަށް ގޮވާލައި، ޒަރީރު ވިދާޅުވީ އިބުރަތް ހޯދަން ޖެހެނީ މާޒީންކަމަށެވެ. އަދި އެމްޑީޕީއާއި ރައީސް ޔާމީން ދައްކާ އެއްވެސް އަސާސެއް ނެތް ވާހަކަތައް ރައްޔިތުން ގަބޫލު ނުކުރާނެކަމަށް ޒަރީރު ވިދާޅުވި އެވެ.
ސުޕްރީމް ކޯޓު ފަނޑިޔާރުންގެ މައްސަލައިގައި ތަފާތު އެކި ވާހަކަތައް ދެކެވުނު ނަމަވެސް މަހާޒާއި އަޒްމިރަލްދާ އެކަން ދޮގު ކުރެ އެވެ. ފަނޑިޔާރު އަޒްމިރަލްދާ ސަސްޕެންޑުކޮށް ޖޭއެސްސީން ބަލަމުން ދަނީ، އޭނާގެ ފިރިކަލުން މައްސަލައެއްގައި ހައްޔަރުކޮށް ދަށު ކޯޓަށް ހާޒިރު ކުރުމުން ބަންދުގެ މަޖިލީހަށް ނުފޫޒު ފޯރުވިކަމަށް ބުނާ މައްސަލަ އެކެވެ.
ފިރިކަލުން ހައްޔަރު ކުރި މައްސަލައާއި ގުޅުވައި، ސުޕްރީމް ކޯޓުގައި ކުރިޔަށް ދިޔަ ޝަރީއަތަށް ސަރުކާރުން އެކި ގޮތް ގޮތުން ނުފޫޒު ފޯރުވިކަމަށް އަޒްމިރަލްދާ ވަނީ ވިދާޅުވެފަ އެވެ. އަދި ޑރ. ލަތީފް ބަންދުން ދޫކުރުމަށް، އެއްވެސް ބޭފުޅަކަށް ގުޅައި މެސެޖުކޮށްފައި ނުވާނެކަމަށް ވަނީ ވިދާޅުވެފަ އެވެ. މަހާޒް ހާޒިރު ކުރަނީ، އެކަމުގައި އަޒްމިރަލްދާއަށް އެހީތެރިކަން ފޯރުކޮށްދިންކަމަށް ބުނެ އެވެ.
