އެމްޑީޕީގެ އެއްވުންތަކުން މީހުން ހައްޔަރުކުރި ނަމަވެސް ފަހަތަށް ނުޖެހޭނެކަމަށް އެ ޕާޓީގެ ޗެއާޕާސަން ފައްޔާޒް އިސްމާއީލް ވިދާޅުވެއްޖެއެވެ.
އެކްސް މެދުވެރިކޮށް ޙިއްޞާކުރެއްވި ޕޯސްޓެއްގައި ފައްޔާޒް ފާހަގަކުރެއްވި ގޮތުގައި، ރައީސް ޑރ. މުޙައްމަދު މުޢިއްޒުގެ ސަރުކާރުން ރައްޔިތުންގެ ގިނަ ޙައްޤުތަކެއް ނިގުޅައިގަނެ، ރައްޔިތުން ދަތި ޙާލަތަކަށް ވައްޓާލާފައިވެއެވެ.
މި އަނިޔާވެރި ޢަމަލުތަކާ ދެކޮޅަށް އެމްޑީޕީގެ މެންބަރުން އަބަދުވެސް ނުކުންނާނެކަމަށް ފައްޔާޒް ވިދާޅުވިއެވެ. އަދި ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ކިތަންމެ ވަރަކަށް އެމްޑީޕީގެ އެއްވުންތަކުން މީހުން ހައްޔަރުކުރި ނަމަވެސް، އަދި އަނިޔާކޮށް ބިރުދެއްކި ކަމުގައިވީ ނަމަވެސް، އެ ޕާޓީގެ މެންބަރުން ފަހަތަކަށް ނުޖެހޭނެކަމަށް އޭނާ ވިދާޅުވިއެވެ.
މީގެއިތުރުން، ފައްޔާޒް ވަނީ އެމްޑީޕީގެ މައްޗަންގޮޅި ދެކުނު ދާއިރާގެ ރައީސް އިބްރާހީމް ޢަބްދުﷲ ވަގުތުން މިނިވަންކުރުމަށް ފުލުހުންނަށް ގޮވާލާފައެވެ.
މިހާރު އެމްޑީޕީއިން ކުރިއަށްގެންދަނީ ކޮންމެ ރެޔަކުވެސް އެއްވުންތައް ބާއްވައި، ސަރުކާރާ ދެކޮޅަށް އިޙްތިޖާޖުކޮށް، ސަރުކާރުގެ ސިޔާސަތުތަކަށް ފާޑުކިޔުމުގެ ޙަރަކާތްތަކެވެ. މި އެއްވުންތަކުގެ ތެރެއިން ފުލުހުންގެ ބެލުމުގެ ދަށަށް ބައެއް މެންބަރުން ގެންދިޔުމަށްޓަކައި ފުލުހުން މަސައްކަތްކުރާ މަންޒަރު ދައްކުވައިދޭ ވީޑިއޯތަކެއްވެސް ޢާންމުވެފައިވެއެވެ.
