އަސާސީ އާންމު ބޭނުންތަކަށް ދަތިވާ މިންވަރަށް އައްޑޫ ސިޓީގެ ގުޅިފައިވާ ރަށްތަކަށް ކަރަންޓް ކެނޑޭކަމަށް ބުނެ ކަންބޮޑުވުން ފާޅުކޮށް ރައްޔިތުންގެ މަޖިލީހަށް ހުށައެޅި ކުއްލި މައްސަލަ ބޭރުކޮށްލައިފިއެވެ.
މި މައްސަލަ މަޖިލީހަށް ހުށައެޅުއްވީ ހިތަދޫ ދެކުނު ދާއިރާގެ މެންބަރު އިބްރާހިމް ނާޒިލްއެވެ.
ނާޒިލް ހުށައެޅުއްވި މައްސަލަ ބޭރުކުރުމަށް 47 މެންބަރުން ވޯޓު ދެއްވިއެވެ. މައްސަލަ ބަލައިގަތުމަށް ފެންނަކަމަށް ވޯޓު ދިނީ 13 މެންބަރުންނެވެ.
މި މައްސަލައިގައި ވަނީ ހިތަދޫ، މަރަދޫ، މަރަދޫ ފޭދޫ އަދި ފޭދޫއަކީ މާލެ ފިޔަވައި އެންމެ ބޮޑު އާބާދީއެއް ދިރިއުޅެމުންދާ ސިޓީއަށްވީ ހިނދު، އެ ސިޓީއަށް ކަރަންޓުގެ ހިދުމަތް ފޯރުކޮށްދިނުމަށްޓަކައި ސަރުކާރުން ތަކުރާރުކޮށް އިހުމާލުވަމުންދާކަމަށެވެ. ރަމަޟާން މަހުގެ ކުރިން މި މައްސަލައަށް ހައްލު ހޯދަވައިދެއްވާނެކަމަށް ރައީސުލްޖުމްހުރިއްޔާ ޑރ މުހައްމަދު މުއިއްޒު ވިދާޅުވި ނަމަވެސް އެކަން އެގޮތަށް ކޮށްފައި ނުވާކަމަށް ނާޒިލް ވިދާޅުވިއެވެ.
އެހެންކަމުން މި ރަމަޟާން މަހު އައްޑޫގައި ދިރިއުޅޭ ރައްޔިތުންގެ އަސާސީ ހައްގުތަކަށް ވަރަށް ބޮޑު ދަތިކަމެއް އައިސްފައިވާކަމަށް އޭނާ ވިދާޅުވިއެވެ. އައްޑޫއަށް އެންމެ އަސާސީ ފެންވަރުގައި ކަރަންޓުގެ ހިދުމަތް ފޯރުކޮށްދިނުމަށްވެސް ސަރުކާރުން ނުކުޅެދިފައިވާކަމަށާއި، މިކަމުގެ ސަބަބުން ރަށުގެ އޮފީސްތަކުންނާއި، ފިހާރަތަކުން ދޭން ޖެހޭ ހިދުމަތްތައް ދިނުމަށް ހުރަސް އެޅިފައިވާކަމަށް އޭނާ ވިދާޅުވިއެވެ. އަދި އަގު ބޮޑު މުދާތައް ހަލާކުވަމުންދާކަމަށް ވިދާޅުވިއެވެ. އެގޮތުން ޓީވީ، އޭސީ އަދި ފްރިޖުފަދަ ތަކެތި މި ކުއްލި މައްސަލައިގައި ފާހަގަކޮށްފައިވެއެވެ.
މި ބަރަކާތްތެރި ރަމަޟާން މަސް ފެށިގެން ދިޔައިރުވެސް އައްޑޫ ސިޓީއން ކަރަންޓު ކެނޑެމުންދާ މައްސަލައިގައި އެއްވެސް ހައްލެއް ސަރުކާރުން ހޯދަ ދީފައިނުވާތީއާއި އައްޑޫ ސިޓީގެ ރައްޔިތުން މި ދިރިއުޅެމުންދާ ހާސްކަމާއި، ދަތި އުނދަގުލަކީ އެއްވެސް ހާލެއްގައި މި އިއްޒަތްތެރި މަޖިލީހަށް ބަލައިގަނެވޭނެކަމެއް ނޫން.
ނާޒިލް ވިދާޅުވިއެވެ.
އައްޑޫއިން ކަރަންޓު ކަނޑައިގެން ދަނީ ތިން ޖަނަރޭޓަރު ސެޓް މަރާމާތު ނުކުރެވި ހުރުމުގެ ސަބަބުންކަމަށް ފެނަކައިން ބުނަމުންދާއިރު، އެކަން އެގޮތަށް ވަނީ މާލޭ ހެޑް އޮފީހުން އެ އިންޖީނުތައް މަރާމާތު ކުރުމަށް ބޭނުންވާ ތަކެތި ފޮނުވާފައިނުވާތީކަންވެސް ސާފުވާކަމަށް ނާޒިލް ވިދާޅުވިއެވެ. މި މައްސަލައަށް ވަގުތީ ހައްލެއް ގެނައުމަށްޓަކައިވެސް ތިން މެގަ ވޯޓުގެ ދެ ޖެނެރޭޓަރު ސެޓް ބޭނުންވާކަމަށް އައްޑޫ ސެންޓްރަލް ޕަވަ ސްޓޭޝަނުން ބުނަމުން ދިޔަ ނަމަވެސް، އެތަނަށް ގެންދިޔައީ 1.8 މެގަ ވޯޓޫގެ އެންމެ ޖަނެރޭޓަރު ސެޓެއްކަމަށް ނާޒިލް ފާހަގަކުރެއްވިއެވެ.
އައްޑޫ ސެންޓްރަލް ޕަވަ ސްޓޭޝަނުގައި ކަރަންޓު ފޯރުކޮށްދެވޭ ވަރުގެ ކެޕޭސިޓީ ނެތީ ސަރުކާރުން ކޮށްދޭޏް ޖެހޭ ކަންކަން ކޮށްދިނުމުގައި އިހުމާލުވެފައިވާތީކަމަށްވެސް އޭނާ ވިދާޅުވިއެވެ. މި މައްސަލަ ހައްލުކުރުމަށް އެކި ތާރީހުތައް ދެމުން އައި ނަމަވެސް ވިދާޅުވަމުން އަންނަ ގޮތަށް ކުރު ރާސްތާގައި މައްސަލައަށް ހައްލު ހޯދިފައިނުވާތީ އެކަމާއިމެދު ކަންބޮޑުވުން ފާޅުކޮށް ނާޒިލް ވަނީ މިކަން ހައްލު ކުރުމަށް ސަރުކާރަށް ގޮވާލާފައެވެ.
މި މައްސަލައިގައި މީގެ ކުރިންވެސް މަޖިލީހަށް ކުއްލި މައްސަލަތައް ހުށައެޅިއެވެ. އަދި މަޖިލީހުގެ ކޮމިޓީއަށް ކަމާއި ބެހޭ ފަރާޓްތައް ހާޒިރުކޮށް ސުވާލުވެސް ކުރެވުނެވެ. މި މައްސަލައިގައި ފެނަކައިގެ އިސްވެރިންގެ އިހުމާލު އެބައޮތްކަމަށް މެންބަރުން އަންނަނީ ތުހުމަތު ކުރަމުންނެވެ.
