ބްރޯޑްކާސްޓިން ކޮމިޝަނުގެ އަންހެން މުވައްޒަފަކަށް، ފުރައްސާރަ ކުރިކަމުގެ ތުހުމަތު ކުރާ މައްސަލައިގައި އެ ކޮމިޝަނުގެ ނައިބު ރައީސް މުހައްމަދު ފަޒީން ވަކިކުރުމާއި މެދު ގޮތެއް ނިންމުމަށް ތަޅުމަށް ފޮނުވަން ރައްޔިތުންގެ މަޖިލީހުގެ މިނިވަން މުވައްސަސާތަކައި ބެހޭ ކޮމިޓީން ނިންމައިފި އެވެ.
ޖިންސީ ފުރައްސާރައާއި ކުރިމަތިވިކަމަށް ބުނާ މި މައްސަލައިގައި ފަޒީން ވެސް ކޮމިޓީއަށް ހާޒިރުކޮށް ސުވާލުކޮށްފައި ވެއެވެ. ފަޒީންގެ ފަރާތުން ޖަވާބުދާރީވުމަށް އިތުރު ފުރުސަތަކަށް އެދިފައި ވާތީ މިއަދަށް ބައްދަލުވުމެއް ތާވަލު ކުރި ނަމަވެސް އޭނާގެ ވަކީލަށް ހާޒިރުވެވޭ ގޮތެއް ނުވި އެވެ.
ފަޒީންގެ ވަކީލަށް އާއިލީކަމެއް ދިމާވެ، މިއަދުގެ ބައްދަލުވުމަށް ހާޒިރުވެވެން ނެތްކަމަށް ވަނީ މެއިލްއަކުން އަންގާފަ އެވެ. އަދި އެކަން ފަޒީން ވެސް ކޮމިޓީއަށް އެންގި އެވެ.
ބައްދަލުވުން މާދަމާއަށް ތާވަލު ކުރުމަށް ވާހަކަ ދެކެވުމަށް ފަހު، ކޮމިޓީގައި ފަހުން ނިންމީ މައްސަލައިގައި ގޮތެއް ނިންމަން މަޖިލީހުގެ ތަޅުމަށް ރިޕޯޓު ފޮނުވާށެވެ.
މައްސަލައިގެ ކޮމިޓީ ރިޕޯޓު މަޖިލީހުގައި އިއްވަމުން، މަޖިލީހުގެ އަމީން އާންމު ފާތިމަތު ނިއުޝާ ވިދާޅުވީ ކޮމިޝަނުގެ އަންހެން މުވައްޒަފަކަށް ޖިންސީ ފުރައްސާރަ ކުރި މައްސަލައެއް ލިބުނީ ޖެނުއަރީ 09 ގައި ކަމަށެވެ. އެގޮތުން މައްސަލައިގައި ބްރޯޑްކޮމްގެ މެމްބަރުންނާއި މުވައްޒަފުންނާއި ވާހަކަ ދެއްކުމަށް ފަހު ފާހަގަކުރެވުނު ކަންކަމުގެ ތެރޭގައި އަންހެން މުވައްޒަފުގެ ނުރުހުމުގައި އެކި ފަހަރު މަތީން އޭނާގެ ގައިގައި އަތްލާފައިވާކަމަށް ބުނެފައިވެއެވެ. އަދި ކޮމިޝަނުގެ އެހެން މުވައްޒަފަކާއި ބޭއަދަބީ ބަހުން ވާހަކަ ދައްކާފައިވުން ވެސް ފާހަގަކުރެވުނުކަމަށް ކޮމިޓީ ރިޕޯޓުގައި ވެއެވެ.
ރިޕޯޓުގައި ބުނެފައި ވަނީ ކޮމިޝަނުގެ ނައިބް ރައީސްގެ ގޮތުގައި ހުންނަވައި ކޮމިޝަނުގެ މުވައްޒަފަކާ ބޭއަދަބީ ބަހުން ވާހަކަ ދެއްކުމާއި އެ މުވައްޒަފުގެ ގައިގައި އަތްލުމަކީ މުޖުތަމައު ގަބޫލުކުރާ އަހްލާގީ މިންގަނޑާއި އަބުރުވެރިކަމާ ހިލާފު އަމަލެއް ކަމަށް ކޮމިޓީން ދެކޭކަމަށެވެ.
މުވައްޒަފުން ދީފައިވާ މައުލޫމާތުގެ މައްޗަށް ކޮމިޓީން ނިންމީ ފަޒީން ރަސްމީ މަސައްކަތުގެ ބޭރުން މުވައްޒަފުންނަށް ގުޅައި ބޭއަދަބީ ބަހުން ވާހަކަ ދައްކާފައިވާކަމަށެވެ.
މި މައްސަލައިގެ ހުރިހާ ބައްދަލުވުމެއް ވެސް ކުރިޔަށް ގެންގޮސްފައި ވަނީ ސިއްރުންނެވެ.
