ރައްޔިތުންގެ މަޖިލީހުގެ މެމްބަރުން ސިޔާސީ ޕާޓީ ބަދަލު ކުރުމުން ގޮނޑި ގެއްލޭ ގޮތަށް ގާނޫނުއަސާސީއަށް ގެނައި އިސްލާހާ ގުޅޭ ދުސްތޫރީ މައްސަލައަށް ދައުލަތުން ޖަވާބު ހުށަހަޅައިފިއެވެ.
މި މައްސަލަ ސުޕްރީމް ކޯޓަށް ހުށަހެޅުއްވީ ކެންދޫ ދާއިރާގެ ކުރީގެ މެމްބަރު އަލީ ހުސައިންއެވެ.
މި މައްސަލައަށް ދައުލަތުން ހުށަހެޅި ޖަވާބު ފޯމުގައި ސޮއިކުރައްވާފައިވަނީ ބަންޑާރަނައިބް އަހުމަދު އުޝާމްއެވެ. އެގޮތުން ޖަވާބު ފޯމުގައި ސޮއިކުރައްވާފައިވަނީ 9 މާރޗު 2025 ގައެވެ.
އެކަމާ ގުޅޭގޮތުން ”ސަންގު“ އާ ވާހަކަ ދައްކަވަމުން އަލީ ހުސައިންގެ ޤާނޫނީ ވަކީލު މަހުފޫޒު ސައީދު ވިދާޅުވީ، ދައުލަތުގެ ޖަވާބުގައި ފުރަތަމަ ކަމަކަށް އެދިފައިވަނީ މި މައްސަލައަކީ ސުޕްރީމް ކޯޓުން ނުބެލޭނެ މައްސަލައެއްކަމަށް ކަނޑައަޅައިދެއްވުމަށް ކަމަށެވެ. އެހެންނަމަވެސް މި މައްސަލަ ބެލޭނެކަމަށް ސުޕްރީމް ކޯޓުން މިހާރު ކަނޑައަޅާފައިވާކަންވެސް މަހްފޫޒު ފާހަގަ ކުރެއްވިއެވެ.
މީގެ އިތުރުން، ދެވަނަ ކަމަކަށް އެދިފައިވަނީ ޤާނޫނުއަސާސީއަށް ގެނައި އިސްލާޙަކީ ސައްޙަ އިސްލާޙެއްކަމަށް ކަނޑައަޅުއްވައިދެއްވުމަށެވެ.
ހަމައެއާއެކު، މި އިސްލާޙަކީ މިހާރު ތިބި މެމްބަރުންގެ މައްޗަށްވެސް ހިނގާނެ އިސްލާޙެއްކަމަށް ކަނޑައަޅުއްވައިދެއްވުމަށް ދައުލަތުގެ ޖަވާބުގައި އެދިފައިވެއެވެ.
ރައްޔިތުންގެ މަޖިލީހުގެ މެމްބަރުން ސިޔާސީ ޕާޓީ ބަދަލު ކުރުމުން ގޮނޑި ގެއްލޭ ގޮތަށް ގާނޫނުއަސާސީއަށް ގެނައި އިސްލާހު ސައްހައެއް ނޫންކަމަށް ކަނޑައަޅައިދިނުމަށް އެދި ހުށަހަޅާފާއިވާ މައްސަލައިގައި ވަގުތީ އަމުރެއް ނެރެދިނުމަށްވެސް މި މައްސަލައިގައި އެދިފައިވެއެވެ. އެގޮތުން ސުޕްރީމް ކޯޓަށް ހުށަހަޅާފައިވާ މައްސަލަ ކޯޓުން ނިންމުމުގެ ކުރިން ރައްޔިތުންގެ މަޖިލީހުގެ އެއްވެސް މެންބަރެއްގެ މަގާމުން ވަކިކުރުމާބެހޭ އެއްވެސް އިޖުރާއަތެއް ނުހިންގުމަށް އަމުރުކޮށްދީ ވަގުތީ އަމުރެއް ނެރެދިނުމަށް ކޯޓުގައި އެދިފައިވެއެވެ.
