އިޒްރޭލު ޕާސްޕޯޓުގައި ރާއްޖެ އެތެރެ ނުވެވޭ ގޮތަށް އިމިގްރޭޝަންގެ ގާނޫނަށް އިސްލާހު ގެނައުމަށް ހުށަހަޅާފައިވާ ބިލާއި މެދު ގޮތެއް ނިމި ފާސްވުމާއި އެކު އެ ތަންފީޒު ކުރުމަށް ކުރަން ޖެހޭ ހުރިހާ މަސައްކަތެއް ސަރުކާރުން ކުރާނެކަމަށް ފޮރިން މިނިސްޓަރ އަބްދުﷲ ޚަލީލު ވިދާޅުވެއްޖެ އެވެ.
އިޒްރޭލު ޕާސްޕޯޓުގައި ރާއްޖެ އެތެރެ ނުވެވޭ ގޮތަށް އިމިގްރޭޝަންގެ ގާނޫނަށް އިސްލާހު ގެނައުމަށް މިދިޔަ އަހަރުގެ ޖޫން މަހު ރައްޔިތުންގެ މަޖިލީހަށް ބިލެއް ހުށަހެޅުއްވީ އިދިކޮޅު އެމްޑީޕީގެ ފަރާތުން ގަލޮޅު ދެކުނު ދާއިރާގެ މެމްބަރު މީކާއިލް އަހުމަދު ނަސީމެވެ. މީކާއިލް މަޖިލީހަށް ހުށަހެޅުއްވީ ދިވެހިރާއްޖޭގެ އިމިގްރޭޝަން ގާނޫނުގެ އެއްވަނަ މާއްދާގެ (ހ) ގެ ހަތް ވަނަ ނަމްބަރުގެ ފަހަތަށް ނަމްބަރެއް އިތުރު ކުރުމަށެވެ.
މި އިސްލާހުގައި ވަނީ ރާއްޖެ އެތެރެ ނުވެވޭ މީހުންގެ ތެރޭގައި އިޒްރޭލުގެ ޕާސްޕޯޓު ގެންގުޅޭ މީހުން، ޑުއަލް ޕާސްޕޯޓު ހިމެނޭ ގޮތުން ބޭން ކުރުމަށެވެ.
އިޒްރޭލު ޕާސްޕޯޓު މަނާ ކުރުމަށް ހުށަހެޅި އިސްލާހުގެ ދިރާސާ 241 ކޮމިޓީގައި ތާށިވެ، ކުރިޔަށް ނުދެއެވެ.
މައްސަލައިގައި ކޮމިޓީން މީގެ ކުރިން ކުރިންމީ، ފެބްރުއަރީ މަހުގެ ނިޔަލަށް މަސައްކަތް ނިންމާލުމަށް ނަމަވެސް އެ މުއްދަތު މިފަހުން ވަނީ ދަންމާލާފަ އެވެ. ކޮމިޓީގެ މަސައްކަތް ތަށިވީ، ސަރުކާރުގެ ވިސްނުން ބަދަލުވެފައި ވާތީތޯ ރައްޔިތުންގެ މަޖިލީހުގައި ޚަލީލުއާއި ސުވާލު ކުރެއްވީ ގަލޮޅު އުތުރު ދާއިރާގެ މެމްބަރު މުހައްމަދު އިބްރާހީމެވެ.
ލިއުމުން ފޮނުއްވި ޖަވާބުގައި މިނިސްޓަރ ވިދާޅުވީ އިޒްރޭލު ޕާސްޕޯޓުގައި ރާއްޖެ އެތެރެވުން މަނާކުރުމަށް ވަޒީރުންގެ މަޖިލީހުން 2024، ޖޫން 2 ގައި ރައީސް ޑރ. މުހައްމަދު މުއއިްޒު ނިންމެވި ކަމަށެވެ. އަދި އެ ނިންމެވުން ތަންފީޒު ކުރުމަށް އިމިގްރޭޝަންގެ ގާނޫނަށް އިސްލާހުތަކެއް ގެންނަން ޖެހޭއިރު، އެ މަރުހަލާ އޮތީ މަޖިލީހުގެ ސަލާމަތީ ހިދުމަތްތަކާއި ބެހޭ ކޮމިޓީގައިކަން ފާހަގަކުރެއްވި އެވެ.
ޚަލީލު ވިދާޅުވީ އިސްލާހަށް ކަމާއި ގުޅުން ހުރި ފަރާތްތައް ހާޒިރުކޮށް ދިރާސާ ކުރަން ޖެހޭތީވެ އެ މަސައްކަތް ނިމުމުން ގޮތެއް އެނގިގެންދާނެ ކަމަށެވެ. އަދި މަޖިލީހުން ބިލު ފާސްކުރިމާއި އެކު، ތަންފީޒު ކުރުމަށް އަޅަން ޖެހޭ ހުރިހާ ފިޔަވަޅެއް ސަރުކާރުން އަޅާނެކަމަށް ޚަލީލު ވިދާޅުވި އެވެ.
މި ބިލާއި ގުޅޭގޮތުން ”ސަންގު“ އަށް މައުލޫމާތު ދެއްވަމުން ޕީއެންސީގެ ޕާލިމަންޓްރީ ގުރޫޕުގެ ލީޑަރު އަދި އިނގުރައިދޫ ދާއިރާގެ މެމްބަރު އިބްރާހިމް ފަލާހު ވިދާޅުވީ ދުނިޔޭގެ ގައުމުގެ ވެރިންތަކުގެ ތެރެއިން ފަލަސްތީނުގެ ރައްޔިތުންގެ ހައްގުގައި އެންމެ ބޮޑަށް ވަކާލާތު ކުރައްވަނީ ރައީސް ޑރ. މުހައްމަދު މުއިއްޒު ކަމަށެވެ. އަދި ސަރުކާރުގެ ބޮޑު މެޖޯރިޓީއެއް އޮތް ރައްޔިތުންގެ މަޖިލީހުން ވެސް މަސައްކަތް ކުރަމުން ދަނީ ދުނިޔެއަށް އެ އަޑު އިއްވުމަށްކަމަށާއި، ޕާސްޕޯޓު މަނާކުރުމުގެ މަސަައްކަތް ވަރަށް އަވަހަށް ތަންފީޒު ވެގެންދާނެކަމަށް ފަލާހު ވިދާޅުވި އެވެ.
ރާއްޖެއަށް އިޒްރޭލުގެ ޕާސްޕޯޓުގައި އެތެރެވުން މަނާކުރުމުގެ މަސައްކަތް ފެށިކަން ދިވެހި ސަރުކާރުން އިއުލާނު ކުރުމުން، ރާއްޖޭގައި ތިބި އެ ގައުމުގެ މީހުން ވީހާވެސް އަވަހަށް ފޭބުމަށް އެ ގައުމުގެ ފޮރިން މިނިސްޓްރީން ވަނީ އަންގާފަ އެވެ.
އިޒްރޭލުން ވަނީ އެ ގައުމުގެ ރައްޔިތުންގެ ތެރެއިން، ޑުއަލް ޕާސްޕޯޓު އޮތް މީހުން ވެސް ރާއްޖެ ނައުމަށް އަންގާފަ އެވެ.
