ސުޕްރީމް ކޯޓުގެ ފަނޑިޔާރުންގެ ޖިނާއީ މައްސަލައެއް އޮތް ކަމަށް ބުނެ ޖުޑީޝަލް ސާވިސް ކޮމިޝަނަށް ފޮނުވާފައިވާ ސިޓީއަކީ އެންޓިކޮރަޕްޝަން ކޮމިޝަނުގެ ރައީސް އާދަމް ޝާމިލް މަގާމުގެ ނުފޫޒު ނަހަމަގޮތުގައި ބޭނުންކޮށް، ދޮގު މައުލޫމާތު ހިމަނައި ފޮނުވި ސިޓީއެއް ކަމަށް ފަނޑިޔާރު ޑރ. އަޒްމިރަލްދާ ޒާހިރު ވިދާޅުވެއްޖެއެވެ.
އޭސީސީއަށް އަޒްމިރަލްދާ ފޮނުއްވި ސިޓީގައި ވަނީ ރައްޔިތުންގެ މަޖިލީހުގެ މެމްބަރުން ސިޔާސީ ޕާޓީ ބަދަލު ކުރުމުން ގޮނޑި ގެއްލޭ ގޮތަށް ގާނޫނުއަސާސީއަށް ގެނައި އިސްލާހާ ގުޅޭ ދުސްތޫރީ މައްސަލައިގައި މިދިޔަ މަހުގެ 26 ގައި އަޑުއެހުމެއް ބޭއްވުމަށް ތާވަލުކޮށް، އަދި އަޑުއެހުން ފެށުމުގެ ކުޑައިރުކޮޅެއް ކުރިން ޖޭއެސްސީން އަޒްމިރަލްދާއާއި، މަހާޒް އާއި އަދި ކުރީގެ ފަނޑިޔާރު ހުސްނުއްސުއޫދު ސަސްޕެންޑު ކުރަން ނިންމި ކަމަށެވެ. އަދި ޖޭއެސްސީން ފޮނުވާފައިވައި އެންގުމުގައި ބުނެފައިވަނީ އަޒްމިރަލްދާއާއި ގުޅޭ ގޮތުން އޭސީސީން ޖިނާއީ ތަހުގީގެއް ކުރަމުންދާކަމަށް އެކޮމިޝަނުން ބުނެފައިވާތީ ފަނޑިޔާރުކަމުގެ މަސްއޫލިއްޔަތުން އެކަހެރިކުރާ ކަމަށް ބުނެފައިވާކަމަށް ސިޓީގައި ވަނީ ފާހަގަކޮށްފައެވެ.
އަޒްމިރަލްދާ ވިދާޅުވެފައިވަނީ އޭސީސީން ބަލަމުންދާ މައްސަލައަކާއި ގުޅިގެންވެސް އަދި ތުހުމަތުކުރެވޭ ކަމަކާއި ގުޅިގެންވެސް މައްސަލައެއް ބަލަމުންދާކަން އޭނާއަށާއި އެހެން ފަނޑިޔާރަކަށްވެސް އަންގައިފައިނުވާ ކަމަށެވެ. އަދި 26 ފެބްރުއަރީގައި ފޮނުވާފައިވާ ސިޓީއަކީ ކޮމިޝަނުގެ އުސޫލުތަކާއި އިޖުރާއަތުތަކުގެ ބޭރުން ފޮނުވާފައިވާ ސިޓީއެއްކަން އާއްމުވެފައިވާ މައުލޫމާތުތަކުން އެނގޭކަމަށް ވަނީ ވިދާޅުވެފައެވެ.
އަޒްމިރަލްދާގެ ސިޓީގައި މައިގަނޑު 5 ނުކުތާއެއް ވަނީ ފާހަގަކޮށްފައެވެ. އެގޮތުން:
- ޖޭއެސްސީއަސް ފޮނުވާފައިވާ ސިޓީއަކީ އާއްމު އުސޫލާ ހިލާފަށް ޖެމްސް މެދުވެރިކޮށް ފޮނުވައިފައިވާ ސިޓީއެއް ނޫންކަމާއި، އަތުން އަތަށް ފޮނުވާފައިވާ ސިޓީއެއްކަން
- އޭސީސީން ފޮނުވި ސިޓީގައި ސިޓީ ނަމްބަރެއް ނެތްކަން
- އޭސީސީން އަޒްމިރަލްދާގެ މައްޗަށް ޖިނާއީ ތަހުގީގެއް ކުރަމުންދާކަމަށް ސިޓީއަކުން ޖޭއެސްސީއަށް އެންގިއިރު އޭނާގެ މައްޗަށް ޖިނާއީ ތަހުގީގެއް ކުރަން އޭސީސީން ނިންމާފައިނުވުން
- މައުލޫމާތެއްގެ މައްޗަށް ބިނާކޮށް ކަމަށް ބުނާ މައްސަލައިގައި ޖިނާއީ ތަހުގީގެއް އެ ކޮމިޝަނުން މިހާތަނަށް ވެސް ފަށާފައިނުވާކަމާއި މާޗް 4، 2025 އާ ހަމައަށް ވެސް މައްސަލަ އޮތީ އިވެލުއޭޝަން ނުވަތަ ޕްރީ އިންވެސްޓިގޭޝަން ސްޓޭޖުގައިކަން އަދި އެއީ ތަހުގީގުކުރުމަށް ފެށުމުގެ ކުރިން މައުލޫމާތު އެއްކުރުމުގެ މަރުހަލާކަން
- އަޒްމިރަލްދާގެ މައްޗަށް ޖިނާއީ ކުށުގެ މައްސަލައެއް ތަހުގީގުކުރަމުންދާ ކަމަށް ބުނެ ޝާމިލް ޖޭއެސްސީއަށް ދީފައިވަނީ ދޮގު މައުލޫމާތެއްކަން
އަޒްމިރަލްދާގެ ސިޓީގައި ވަނީ ޝާމިލް މަގާމުގެ ނުފޫޒު ނަހަމަގޮތުގައި ބޭނުންކޮށް، ދޮގު މައުލޫމާތު ހިމަނައި ފޮނުވި ސިޓީއަކީ، ސުޕްރީމް ކޯޓުގައި ތާވަލްކޮށްފައި އޮތް ޝަރީއަތެއް ހުއްޓާލައި ފަނޑިޔާރުންގެ މަސައްކަތާ ބެހި ނުފޫޒު ފޯރުވުމަށް ގާނޫނުއަސާސީގެ 141 ވަނަ މާއްދާގެ (ނ) އާ ހިލާފަށް ފަނޑިޔާރުންގެ މަސައްކަތާއި ބެހި ނުފޫޒު ފޯރުވުމަށް ކޮށްފައިވާ ކަމެއް ކަމަށެވެ.
މީގެއިތުރަށް އޭސީސީގެ ރައީސް ޝާމިލް އެ ކޮމިޝަނުގެ އާއްމު އިޖުރާއަތުތަކާ ހިލާފުވެ މަގާމުގެ ނުފޫޒު ނާޖާއިޒުގޮތުގައި ބޭނުންކޮށް ސުޕްރީމް ކޯޓުގެ ޝަރީއަތެއް ހުއްޓާލައި ފަނޑިޔާރުން ސަސްޕެންޑުކުރުމަށް ސިޓީ ފޮނުއްވާފައިވަނީ ސުޕްރީމް ކޯޓުގައި އޮތް މައްސަލަ ކުރިއަށް ނުގެންދިއުމަށް މައްސަލަ ރައްދުވާ އެޓާނީ ޖެނެރަލްގެ ފަރާތުން ބޭނުންވާތީ އެ މަގުސަދު ހާސިލްކޮށްދިނުމަށް ކަމަށް ސިޓީގައި ވަނީ ފާހަގަކޮށްފައެވެ. އަދި އޭސީސީގެ ރައީސަކީ ރައީސް އައްޔަންކުރާ ފަރާތެއް ކަމަށް އެ ކޮމިޝަންގެ ގާނޫނަށް ގެނެވުނު ތިން ވަނަ އިސްލާހުގައި ކަނޑައަޅާފައިވާތީ އަމިއްލަ މަގާމު ދިފާއުުކުރުމުގެ މަސްހަލަތުކަމުގައި ސެކެވަޑައިގަންނަވާ ކަމަށް ސިޓީގައި ވަނީ ވިދާޅުވެފައެވެ.
އެހެންކަމުން އެ ކަންކަމަކީ ރަސްމީ ހައިސިއްޔަތު ނުވަތަ އެ ހައިސިއްޔަތުގެ ނުފޫޒު ނަހަމަގޮތުގައި ބޭނުންކޮށް އެކަމުގައި ތިމާއަށް އަދި މަންފާ ލިބެންނުޖެހޭ ފަރާތަށް މަންފާ ހޯދައިދިނުމުގެ މަގުސަދުގައި ކޮށްފައިވާ ކަމަކަށް ވާތީ ޖިނާއީ ކުށުގެ އެ އަމަލު އަވަހަށް ތަހުގީގުކޮށްދިނުމަށް އަޒްމިރަލްދާ ވަނީ އެ ސިޓީގައި އެދިވަޑައިގެންފައެވެ.
