ދިވެހި ރާއްޖޭގެ އެންމެ ބޮޑު އެއަރޕޯޓުގެ މުހިންމު ތަންތަން ބޭރުގެ ފަރާތްތަކަށް ދޫކޮށްލުމަށް މަސައްކަތް ކުރަމުންދާ ކަމަށް ތުހުމަތު ކުރެވޭ މައްސަލަ ސަރުކާރުގެ ސަމާލުކަމަށް ގެނައުމަށްކަމަށް ބުނެ ހުށައެޅި ކުއްލި މައްސަލަ މަޖިލީހަށް ބަލައިނުގަތުމަށް ނިންމައިފިއެވެ.
މި މައްސަލަ ހުށައެޅުއްވީ ވައިކަރަދޫ ދާއިރާގެ މެންބަރު ހުސައިން ޒިޔާދުއެވެ. މައްސަލަ ބޭރުކޮށްލި ސަބަބެއްކަމަށް ރިޔާސަތުން ބުނީ ކުއްލި މައްސަލައިގެ ޝަރުތުތަކުގެ ތެރޭގައި އެ މައްސަލައަކީ ހަގީގަތެއްގެ މައްޗަށް ބިނާވެފައިވާ މައްސަލައަކަށް ވާން ޖެހޭކަމަށް އޮންނަކަމަށެވެ. ނަމަވެސް ޒިޔާދުގެ ކުއްލި މައްސަލައިގައި އެ ޝަރުތު ހަމަނުވާކަމަށް ރިޔާސަތުން ވިދާޅުވިއެވެ.
މި ކުއްލި މައްސަލައިގައި ވަނީ ދިވެހިންނަށް ކުރެވޭ އެއްވެސް މަސައްކަތެއް ބޭރުގެ ބަޔަކަށް ނުދިނުމަކީ ރައީސުލްޖުމްހުރިއްޔާ ޑރ މުހައްމަދު މުއިއްޒުގެ ވައުދެއްކަމަށާއި، އަދި އަބަދުވެސް މޯލްޑިވްސް ފަސްޓް ސިޔާސަތު އިސްކުރައްވާނެކަމަށް އެމަނިކުފާނު ވިދާޅުވެފައިވާކަމަށެވެ.
އެހެން ނަމަވެސް ރާއްޖޭގެ އެންމެ ބޮޑު އަދި މުހިންމު އެއާޕޯޓު، ވެލާނާ އިންޓަނޭޝަނަލް އެއާޕޯޓުގައި އަލަށް ތަރައްގީކުރާ ތަންތަނުގެ ތެރެއިން ވީއައިޕީ ޓާމިނަލް ހިންގުމަށާއި، ރާއްޖެއަށް އަންނަ ޖެޓުތަކުގެ ގްރައުންޑް ހެންޑްލިންއާއި ތެޔޮ ވިއްކުމާއި މި ނޫންވެސް އެކަމާއި ގުޅޭ އެންމެހައި ހިދުމަތްތައް ދިނުމަށް އެ ޓާމިނަލް ދުބާއީގެ ޖެޓެކްސް ނަމަކަށް ކިޔާ ކުންފުންޏަކަށް 25 އަހަރު ދުވަހަށް ދިނުމަށްޓަކައި އެމްއޭސީއެލްއިން މަސައްކަތް ކުރަމުންދާކަމުގެ ހަބަރުތައް ލިބޭކަމަށެވެ.
މިފަދަކަމެއް ކުރެވޭޏީ އެތަނެއް ގާއިމްކޮށް ހިންގުމުގެ ގާބިލްކަން ސަރުކާރުގެ ނެތްނަމަކަމަށާއި، ނަމަވެސް އެއީ މިހާރު އަޅާ ނިމިފައި ހުރި ތަނެއްކަމަށް ފާހަގަކޮށްފައިވެއެވެ. އަދި ބޭރުގެ ކުންފުންޏަކަށް މަސައްކަތް ހަވާލުކުރަންވާނީ ދިވެހިންގެ ތެރޭގައި އެވަރުގެ ކުންފުންޏެއް ނެތްނަމަކަމަށާއި ނަމަވެސް، މިކަމަށް ދިވެހިން ތިބީ ތައްޔާރުވެފައިކަމަށް މައްސަލައިގައިވެއެވެ. މިހާރުވެސް މި ހިދުމަތް ދެމުން އެ ގެންދަނީ ދިވެހިންކަމަށް ވިދާޅުވިއެވެ.
މިހެން ކަން އޮތްއިރު، މިފަދަ ކަމެއް ކުރަނީ މޯލްޑިވްސް އެއަރޕޯޓްސް ކޮމްޕެނީގެ ނުވަތަ ސަރުކާރުގެ ކޮންމެސް އެއް ބަޔަކަށް ނާޖާއިޒް މަންފާތަކެއް ހޯދުމަށްކަމަށް ބެލެވޭކަމަށްވެއެވެ.
މިފަދަ ކަމެއް ކޮށްފިނަމަ، ގައުމީ ސަލާމަތަކަށް ނުރައްކާވެ ދައުލަތުގެ އާމްދަނީއަށް އަސަރުކުރާނެކަމަށް ކުއްލި މައްސަލައިގައިވެއެވެ. އަދި ރާއްޖެއިން ބޭރުވާ ޑޯލަރުގެ އަދަދު އިތުރުވުމުގެ ސަބަބުން ޑޮލަރުގެ ދަތިކަން އިތުވާނެކަމަށްވެއެވެ. އަދި ވިޔަފާރިތަކަށް އަސަރުކުރާނެކަމަށްވެސްވެއެވެ. އެގިތުން އެއާޕޯޓުގެ ޖެޓްތަކަށް ދޭ ގްރައުންޑް ހޭންޑްލިންގ ހިދުމަތްތަކާއި ތެޔޮ ވިއްކުންފަދަ ހިދުމަތްތަކަކީ، ދިވެހި ކުންފުނިތަކުން މިހާރުވެސް ފޯރުކޮށްދެމުންދާ ހިދުމަތްތަކެއްކަމަށްވާއިރު، މި ހިދުމަތްތަކުގެ އެކްސްކުލޫސިވިޓީ ބޭރުގެ ކުންފުންޏަށް ދީފިކަމަށްވާނަމަ މި މަސައްކަތުގައި ޝާމިލުވާ ދިވެހި ކުންފުނިތަކުގެ ވިޔަފާރި ގެއްލޭނެކަމަށާއި، ބަނގުރޫޓުވާނެކަމަށްވެއެވެ. އަދި މިކަމުގެ ސަބަބުން އެތައް ދިވެހިންނެއްގެ ވަޒީފާއަށް އަސަރުކުރާނެކަމަށްވެސްވެއެވެ.
އެއާޕޯޓު ތަރައްގީކުރަނީ ރައްޔިތުންގެ ނަމުގައި ދައުލަތުން ގެރެންޓީ ދީގެން ލޯނުގެ ގޮތުގައި ހޯދި ފައިސާއިން އިންވެސްޓުކޮށްގެންކަމަށާއި، އެ އިންވެސްޓްމެންޓްގެ ނަފާ ދިވެހިންނަށް ގެއްލިގެން ނުވާނެކަމަށް މައްސަލައިގައި ބުނެފައިވެއެވެ. މިއީ ދައުލަތަށް މަންފާވާނެ ގޮތް އޮތް އިރު އެއާއި ދެކޮޅަށް އަމަލުކުރުންކަމަށްވެސް ބުނެފައިވެއެވެ. މިއީ ރާއްޖޭގެ އެންމެ ބޮޑު އެއާޕޯޓު ބައިބައިކޮށް ފޮތިފޮތިކޮށްގެން ބޭރުގެ ފަރާތްތަކަށް ދީގެން، އެއާޕޯޓު ވިއްކާލުމުގެ ފެށުންކަމަށް ފާހަގަކޮށް މައްސަލައިގައި ވަނީ މިކަން ސަރުކާރުގެ ސަމާލުކަމަށް ގެނައުމަށް ގޮވާލާފައެވެ.
