ނަފްސާނީ ދުޅަހެޔޮކަމަކީ ޖިސްމާނީ ދުޅަހެޔޮކަން ފަދައިން މުހިންމު ކަމެކެވެ. ނަމަވެސް، ގިނަ ފަހަރަށް މި ދާއިރާއަށް ބޭނުންވާ ސަމާލުކަން ނުލިބި، އެތައް ބައެއްގެ ނަފްސާނީ ދުޅަހެޔޮކަން ގެއްލި، އެކަމުގެ ސަބަބުން އިޖްތިމާޢީ ގިނަގުނަ މައްސަލަތަކާ ކުރިމަތިލާން ޖެހެއެވެ. މި ކަންކަމަށް ހައްލެއް ހޯދުމުގެ ގޮތުން، ރައީސުލްޖުމްހޫރިއްޔާ ޑރ. މުޙައްމަދު މުޢިއްޒުގެ 14 ހަފްތާގެ ވަޢުދުތަކުގެ ތެރެއިން، 21 ފެބްރުއަރީ 2024 ގައި ނަފްސާނީ ޞިއްޙަތުގެ ޤައުމީ ހެލްޕްލައިން 1677 ވަނީ އިފްތިތާޙް ކުރެވިފައެވެ.
ހެލްޕްލައިންގެ ކާމިޔާބު މަސައްކަތް
މި ހެލްޕްލައިންގެ ޚިދުމަތް ފެށުނީއްސުރެ، އެތައް ހާސް ބަޔަކަށް އެހީތެރިކަން ފޯރުކޮށްދެވިފައިވެއެވެ. ފެބްރުއަރީ 2024 އިން ޑިސެމްބަރު 2024 ގެ ނިޔަލަށް 2576 ފަރާތަކަށް ޚިދުމަތް ދެވިފައިވާއިރު، ޖެނުއަރީ 2025 އިން 5 ޖުލައި 2025 އާ ހަމައަށް 5820 ކޯލަކަށް އެޓެންޑްވެފައިވެއެވެ. މި ތަފާސްހިސާބުތަކުން ދައްކައިދެނީ، މުޖުތަމަޢުގައި ނަފްސާނީ އެހީތެރިކަމަށް ބޭނުންވެފައިވާ މިންވަރާއި، މި ޚިދުމަތުގެ މުހިންމުކަމެވެ.
ފޯރުކޮށްދެވޭ ޚިދުމަތްތައް
ހެލްޕްލައިނުން ފޯރުކޮށްދެވޭ ޚިދުމަތްތަކުގެ ތެރޭގައި ގިނަ ބާވަތްތަކެއްގެ އެހީތެރިކަން ހިމެނެއެވެ. މީގެ ތެރޭގައި:
- ނަފްސާނީ ސިއްޙަތުގެ ޚިދުމަތް ލިބެންހުރި ތަންތަނުގެ މަޢުލޫމާތު
- ނަފްސާނީ އެހީތެރިކަމާ ގުޅޭ މަޢުލޫމާތު
- ކުއްލި ހާލަތްތަކުގައި (ކްރައިސިސް) އެހީތެރިކަން
- ފޮލޯއަޕް އަދި ރެފަރަލް ޚިދުމަތްތައް
ހެލްޕްލައިންގެ މަޤްޞަދު
މި ހެލްޕްލައިންގެ މައިގަނޑު މަޤްޞަދަކީ ނަފްސާނީ ގޮތުން އުނދަގޫވާ އެކިއެކި ހާލަތްތަކުގައި ތިބޭ ފަރާތްތަކަށާއި، ނަފްސާނީ ބަލިތަކުން އުޅޭ އެކި އުމުރުފުރައިގެ މީހުންނަށް، 24 ގަޑިއިރު ފުރަތަމަ އެހީތެރިކަން ފޯރުކޮށްދިނުމެވެ. މީގެ އިތުރުން، މައްސަލަ ހައްލުކުރުމުގެ އެހީތެރިކަމާއި، މަޢުލޫމާތު ދިނުމާއި، އިތުރު އެހީތެރިކަން ބޭނުންވާ ހާލަތްތަކުގައި ކަމާގުޅޭ ޚިދުމަތްތަކަށް ރިފަރ ކުރުން ހިމެނެއެވެ.
ޚިދުމަތުގެ ފެންވަރު ރަނގަޅުކުރުން
ސަރުކާރުން ވަނީ މި ޚިދުމަތް ދެމެހެއްޓެނިވި ގޮތެއްގައި ކުރިއަށް ގެންދިއުމަށް އަދި ޚިދުމަތުގެ ފެންވަރު އިތުރަށް ރަނގަޅުކުރުމަށް ޚާއްޞަ އިސްކަމެއް ދީފައެވެ. މިކަމުގެ ސަބަބުން، ދުވަހެއް ދުވަހަކަށް ޚިދުމަތް ހޯދާ ފަރާތްތަކުގެ އަދަދު އިތުރުވަމުން ދިއުމާއެކު، ޚިދުމަތުގެ ފެންވަރުވެސް ރަނގަޅުވަމުން ދާކަން ފާހަގަކުރެވެއެވެ.
ނަފްސާނީ ހެލްޕްލައިންގެ ޚިދުމަތަކީ މުޖުތަމަޢުގެ ނަފްސާނީ ދުޅަހެޔޮކަން ކުރިއެރުވުމަށް އެޅުނު އެންމެ މުހިންމު އެއް ފިޔަވަޅެވެ. 5000 އަށްވުރެ ގިނަ ފަރާތްތަކަކަށް މިހާތަނަށް ޚިދުމަތް ފޯރުކޮށްދެވިފައިވުމަކީ، މި ޚިދުމަތުގެ މުހިންމުކަމާއި ކާމިޔާބުކަން ދައްކުވައިދޭ ހެއްކެކެވެ. މި ޚިދުމަތް އިތުރަށް ފުޅާކޮށް، ފެންވަރު ރަނގަޅުކުރުމަކީ، ދިވެހި މުޖުތަމަޢުގެ ނަފްސާނީ ދުޅަހެޔޮކަން އިތުރުކުރުމަށް އެޅިގެންދާނެ މުހިންމު ފިޔަވަޅަކަށް ވާނެއެވެ.
