ސްޕޯޓްސް ފިޝިންގް ނުވަތަ މުނިފޫހިފިލުވުމުގެ ގޮތުން ކުރާ މަސްވެރިކަމަކީ މިހާރު ދިވެހިރާއްޖޭގައިވެސް ވަރަށް ބޮޑަށް ޓްރެންޑުވަމުން އަންނަ ކަމެއް ކަމަށް މަސްވެރިކަމާއި ކަނޑުގެ ވަސީލަތްތަކާ ބެހޭ ވަޒީރު އަހުމަދު ޝިޔާމް ވިދާޅުވެއްޖެއެވެ.
މަސްވެރިންގެ ގުންޒަރުގެ ނަމުގައި މިނިސްޓްރީން ކުރިއަށްގެންދާ ސިލްސިލާ ބައްދަލުވުންތަކުގެ ތެރެއިން ހޯމަ ދުވަހު ބޭއްވި ބައްދަލު ކުރުމުގައި ވާހަކަފުޅު ދައްކަވަމުން ވަޒީރު ފާހަގަކުރެއްވި ގޮތުގައި މުޅި ދުނިޔޭގައިވެސް ސްޕޯޓްސް ފިޝިންގްއަކީ 72 ބިލިއަން ޑޮލަރު ދައުރުވާ ބޮޑު ސިނާއަތެކެވެ.
ޝިޔާމް ވިދާޅުވި ގޮތުގައި ދިވެހިރާއްޖެއަކީ ފަތުރުވެރިކަމަށް ބަރޯސާވެފައިވާ ޤައުމެއް ކަމަށާއި، ރާއްޖެ ޒިޔާރަތްކުރާ ފަތުރުވެރިންވެސް ކަނޑާ ގުޅިފައިވާ ކަންކަމުގައި ޝައުޤުވެރިކަން ފާޅުކުރެއެވެ. މިގޮތުން ޑައިވިންގްއާއި ސްނޯކްލިންގެ އިތުރުން ސްޕޯޓްސް ފިޝިންގްއަށްވެސް ފަތުރުވެރިން ޝައުޤުވެރިވާ ކަމަށާއި، މިކަމުގައި ބޮޑު ކޮމިއުނިޓީއެއް އުފެދިފައިވާ ކަމަށް ވަޒީރު ފާހަގަކުރެއްވިއެވެ.
ސަރުކާރުން މިހާރު ވަނީ ސްޕޯޓްސް ފިޝިންގް ޤާއިމްކުރާނެ ސަރަހައްދުތަކެއް ނުވަތަ ބަނދަރުތަކެއް ކަނޑައަޅާފައެވެ. އަދި މި ސަރަހައްދުތަކަށް ބިޑަށް އިޢުލާނުކުރުމަށްޓަކައި ކުރަންޖެހޭ އެންމެހާ އިދާރީ މަސައްކަތްތައް މިހާރު ކުރިއަށްދާ ކަމަށް ވަޒީރު ވިދާޅުވިއެވެ.
ރައީސުލްޖުމްހޫރިއްޔާ ޑރ. މުހައްމަދު މުޢިއްޒުގެ ރިޔާސީ ވަޢުދުތަކުގެ ތެރޭގައި ރާއްޖޭގައި ސްޕޯޓްސް ފިޝިންގްގެ ހަރަކާތްތައް އިތުރުކޮށް، އެކަމަށް ބޭނުންވާ ވަސީލަތްތައް އިތުރުކުރެއްވުން ހިމެނެއެވެ. މިގޮތުން ސްޕޯޓްސް ފިޝިންގްއަށް ޚާއްޞަ ބަނދަރުތަކެއް ޤާއިމްކުރެއްވުމަށް ރައީސް ވަޢުދުވެވަޑައިގެންފައިވާ ކަމަށް ވަޒީރު ޝިޔާމް ފާހަގަކުރެއްވިއެވެ.
ސްޕޯޓްސް ފިޝިންގްއާއި ފަރުމަހުގެ މަސްވެރިކަން އިތުރަށް ފުޅާކުރުމަށް ސަރުކާރުން މަސައްކަތްކުރަމުންދާއިރު، މިއީ މަސްވެރިކަމާއި އިޤްތިޞާދީ މަސައްކަތްތައް ފުޅާކޮށް، އެކަމުން ލިބޭ އާމްދަނީ އިތުރުކުރުމަށް ސަރުކާރުން ކުރާ މަސައްކަތްތަކުގެ ތެރެއިން މުހިންމު މަސައްކަތެއް ކަމުގައި ފާހަގަކުރެވެއެވެ.
