ސަލްމާން ރަސްގެފާނު މިސްކިތުގައި ތަރައްޤީކުރި އިސްލާމީ ކުތުބުޚާނާ ރަސްމީކޮށް ހުޅުވާފައިވާއިރު، އިސްލާމީ ކުތުބުޚާނާގައި ކުޑަކުދިންނާއި، އިސްލާމީ ފައިނޭންސް ފަދަ ދާއިރާތަކަށް ޚާއްސަ ބައެއް ހިމަނުއްވާނެކަމަށް އިސްލާމީ ކަންތައްތަކާ ބެހޭ ވަޒީރު ޑރ މުޙައްމަދު ޝަހީމް އަލީ ސައީދު ވިދާޅުވެއްޖެއެވެ.
މިނިސްޓަރ އެފަދައިން ވިދާޅުވީ ޤައުމީ އިސްލާމީ ކުތުބުޚާނާ ހުޅުވުމުގެ ރަސްމިއްޔާތުގައި ދެއްކެވި ވާހަކަފުޅުގައެވެ.
މިނިސްޓަރ ވިދާޅުވީ، ކުތުބުޚާނާތަކަކީ އިސްލާމީ ހަޟާރާތުގެ އެންމެ މުހިއްމު އެއް ވަސީލަތް ކަމަށާއި، އެއީ އިސްލާމީ ނޫރު އުއްމަތަށް ފެތުރުމުގައިވެސް މުހިއްމު ރޯލެއް އަދާކޮށްފައިވާ ބިނާތަކެއް ކަމަށެވެ. އެގޮތުން އިސްލާމީ ކުތުބުޚާނާ ތަކުގައި އެތަކެއް އިލްމުވެރިންނާއި މުފައްކިރުންގެ މުހިއްމު ފޮތްތައް ހިމެނިގެންވާކަން މިނިސްޓަރ ފާހަގަ ކުރެއްވިއެވެ.
ތިބޭފުޅުން އަޑުއައްސަވާނެ އައްބާސީ ދައުލަތުގެ މުސްލިމުން އިލްމީ ގޮތުން ފިކުރީ ގޮތުން ހޯދި ކުރިއެރުންތަކުގެ ވާހަކަތައް، މި މަސައްކަތްތައް ރަމްޒުކޮށްދޭ ބިނާތަކެއް އިސްލާމީ ލައިބްރަރީތަކަކީ
މިނިސްޓަރ ވިދާޅުވީ، އިސްލާމީ ލައިބްރަރީތައް ރާއްޖޭގެ އެކި ކަންކޮޅުތަކުގައި ޤާއިމު ކޮށްދެއްވުމަކީ ރައީސް ޑރ މުޙައްމަދު މުއިއްޒުގެ ރިޔާސީ މެނިފެސްޓޯގައިވެސް ހިމެނިފައިވާ މުހިއްމު ކަމެއް ކަމަށެވެ. މިހާރު ޤައުމީ އިސްލާމީ ކުތުބުޚާނާ ރަސްމީކޮށް ހުޅުވިގެން ގޮސްފައިމިވަނީވެސް މުޅި ސަރުކާރުގެ ޚާއްސަ އަހައްމިއްޔަތުކަމެއް އެ މަސައްކަތަށް ދެވިގެންކަން މިނިސްޓަރ ފާހަގަ ކުރެއްވިއެވެ.
މީގެ އިތުރުން، ރާއްޖޭގައި އިސްލާމީ މަރުކަޒު ޤާއިމު ކުރެވިފައިވާ ހުރިހާ ރަށެއްގައިވެސް މި އަހަރު ނިމުމުގެ ކުރިން މިފަދަ ފެންވަރު ރަނގަޅު ލައިބްރަރީތައް ޤާއިމު ކުރެވިގެންދާނެކަމަށް މިނިސްޓަރ ވިދާޅުވިއެވެ. އަދި ވިދާޅުވީ މިހާރު ހުޅުވިފައިވާ އިސްލާމީ ކުތުބުޚާނާގައިވެސް ކުޑަކުދިންނާއި، އިސްލާމީ ފައިނޭންސް ފަދަ ދާއިރާތަކަށް ޚާއްސަ ބައެއް ކަނޑައަޅުއްވާނެކަމަށެވެ.
މިނިސްޓަރ ވިދާޅުވީ، މި ކުތުބުޚާނާގައި 15،000 އަށްވުރެ ގިނަ ފޮތް މިވަގުތުވެސް ބެހެއްޓިފައިވާކަމަށެވެ.
އަޅުގަނޑުމެންގެ އަމާޒަކީ މި ލައިބްރަރީއަކީ 15،000ށް ވުރެ ގިނަ ފޮތް ހުރި ލައިބްރަރީއަކަށްވުން
މިނިސްޓަރ ވަނީ ފޮތްތައް އެންޓަރ ކުރުމުގެ މަސައްކަތުގައި ހިލޭ ސާބަހަށް މަސައްކަތް ކޮށްދިން ޒުވާނުންނަށްވެސް ޚާއްސަ ޝުކުރެއް އަދާކުރައްވާފައެވެ. އޭގެ ތެރޭގައި ހިމެނެނީ ޒުވާން ޚަތީބުންނާއި ދަރިވަރުންގެ ޓީމެކެވެ. އަދި އިދާރީ ގޮތުން އެކިއެކި މަސައްކަތްތަކުގައި އެހީވެދިން ފަރާތްތަކަށްވެސް މިނިސްޓަރ ވަނީ ޝުކުރު އަދާކުރައްވާފައެވެ.
މިނިސްޓަރ ވިދާޅުވީ މި ލައިބްރަރީގެ ފައިދާ އެތައް ބަޔަކަށް ލިބޭނެ ކަމަށާއި، އިލްމީ ދިރާސާތައް ކުރުމަށް މަގުފަހިވެގެންދާނެ ކަމަށެވެ. އަދި ކުރިއަށް އޮތް ތަނުގައި ދެ ނަމާދު ދޭތެރޭގައިވެސް ލައިބްރަރީއަށް ވަދެ ފޮތް ކިޔާލެވޭނެ ގޮތަށް އިންތިޒާމުތައް ހަމަޖައްސަވާނެކަމަށް މިނިސްޓަރ ވިދާޅުވިއެވެ.
މީގެ އިތުރުން، މި ހުރިހާ މަސައްކަތްތަކެއްވެސް ކުރިއަށް ގޮސްފައިވަނީ ރައީސްގެ ޚާއްސަ އަހައްމިއްޔަތުކަމެއް ދެވިގެންކަން ފާހަގަ ކުރައްވައި މިނިސްޓަރ ވަނީ މިއީ ސަރުކާރުގެވެސް މުހިއްމު ސިޔާސަތެއްކަން ތަކުރާރު ކުރައްވާފައެވެ. އެގޮތުން މި ސަރުކާރު އައިފަހުން ޑިޒައިން ކޮށްފައިވާ ބޮޑެތި މިސްކިތްތަކުގައިވެސް ލައިބްރަރީ ޤާއިމު ކުރެވިފައި ހުންނާނެކަމަށް މިނިސްޓަރ ވިދާޅުވިއެވެ.
