މ. ބޮޑުގެ ހުރި ބިމުގައި މީގެ ނުވަ އަހަރު ކުރިން އެޅި ވަގުތީ މިސްކިތުގެ ބަދަލުގައި ޒަމާނީ ފެންވަރުގެ މިސްކިތެއް އެޅުމަށް ސަރުކާރުން ނިންމާފައިވާއިރު، އަންނަ މަހުގެ ތެރޭގައި އެ މިސްކިތުގެ ބިންގާ އެޅިގެންދާނެކަމަށް އިސްލާމީ ކަންތައްތަކާ ބެހޭ ވަޒީރު ޑރ މުޙައްމަދު ޝަހީމް އަލީ ސައީދު ވިދާޅުވެއްޖެއެވެ.
މިނިސްޓަރ އެފަދައިން ވިދާޅުވީ ސަލްމާން ރަސްގެފާނު މިސްކިތުގައި ތަރައްޤީކުރި އިސްލާމީ ކުތުބުޚާނާ ރަސްމީކޮށް ހުޅުވުމުގެ ރަސްމިއްޔާތުގައި ދެއްކެވި ވާހަކަފުޅުގައެވެ.
މިނިސްޓަރ ވިދާޅުވީ، ބޮޑުގެ މިސްކިތުގެ ބިންގާ އަންނަ މަހުގެ ތެރޭގައި އެޅިގެންދާނެކަމަށާއި، އެތަނުގައި ގިނަ ވަސީލަތްތަކެއް ޤާއިމު ކުރެވިފައި ހުންނާނެ ކަމަށެވެ. އެގޮތުން 100 މީހުންނަށްވުރެ ގިނަ މީހުންގެ ޖާގައިގެ ހޯލަކާއި، ލައިބްރަރީއެއްގެ އިތުރުން، ކްލާސްރޫމްތައްވެސް ޤާއިމު ކުރެވިފައި ހުންނާނެކަމަށް މިނިސްޓަރ ވިދާޅުވިއެވެ. އަދި ވިދާޅުވީ، އެތަން ބޭނުން ކުރެވިގެންދާނީ މާފަންނުގައި ހުންނަ އިލްމީ މަރުކަޒެއްގެ ގޮތުގައި ކަމަށެވެ.
މީގެ އިތުރުން، އެ މަސައްކަތް ލަސްވެގެން ދިޔައީ މަސައްކަތުގެ ޑިޒައިންނަށް ގެންނަން ޖެހުނު ބަދަލުތަކަކާ ގުޅިގެންކަން ފާހަގަ ކުރައްވައި މިނިސްޓަރ ވިދާޅުވީ، އަންނަ މަހު މިސްކިތުގެ ބިންގާ އެޅި މަސައްކަތް ފެށުމާއެކު، ދެ އަހަރުގެ ތެރޭގައި މަސައްކަތް ނިންމާލެވޭނެކަމަށް އުއްމީދު ކުރައްވާކަމަށެވެ.
މިސާލަކަށް ބޮޑުގެ މިސްކިތް އިރާދުކުރެއްވިއްޔާ ކުރިއަށް މި އޮތް މަހުގެ ތެރޭގައި އަޅުގަނޑުމެން އުއްމީދު ކުރަނީ އެތަނުގެ ބިންގާ އެޅިގެންދާނެކަމަށް، އެ 100 މީހުންނަށް ވުރެ ގިނަ މީހުންގެ ޖާގައިގެ ހޯލަކާއި، ލައިބްރަރީއާއި ކްލާސްރޫމްތަކަށް، މާފަންނުގައި ހުންނަ އިލްމީ މަރުކަޒެއްގެ ގޮތުގައި އެތަން ބޭނުން ކުރެވޭގޮތަށް އެތަން މި ހަދަނީ، އެތަނުގެ ޑިޒައިންއަށް ގެންނަން ޖެހުނު ބަދަލެއްގެ ސަބަބުން ކުޑަކޮށް ލަސްވެގެން ދިޔައީ، ނަމަވެސް އަންނަ މަހުގެ ތެރޭގައި ބިންގާ އެޅި މަސައްކަތް ދެ އަހަރުގެ ތެރޭގައި ނިންމޭނެ.
އެތަނުގައި އަޅާނީ ޒަމާނީ ފެންވަރުގެ ތިން ބުރީގެ މިސްކިތެއް ކަމަށާއި، އެ މަސައްކަތް ކުރަނީ ހެޔޮ އެދޭ ފަރާތްތަކަކާއި އިސްލާމިކް މިނިސްޓްރީ ގުޅިގެން ކަމަށް މިނިސްޓަރ ވަނީ މީގެ ކުރިން ވިދާޅުވެފައެވެ.
