ޢާންމު ރައްޔިތުން ޙައްޖަށް ދިއުމަށް މޯލްޑިވްސް ޙައްޖު ކޯޕަރޭޝަން ލިމިޓެޑަށް ދައްކާ ފައިސާއިން ޒަކާތް ދައްކަންޖެހޭނީ މޯލްޑިވްސް ޙައްޖު ކޯޕަރޭޝަން ލިމިޓެޑުން ކަމަށް އިސްލާމީ ފަތުވާދޭ އެންމެ މަތީ މަޖިލީހުން ބުނެފިއެވެ.
ފަތުވާދޭ މަޖިލީހުން އެހެން ބުނެފައިވަނީ މޯލްޑިވްސް ޙައްޖު ކޯޕަރޭޝަން ލިމިޓެޑަށް ޙައްޖަށް ދިއުމަށް ދައްކާ ފައިސާއިން ޒަކާތް ދިނުމާ ގުޅޭގޮތުން މިމަޖިލީހަށް ހުށައެޅުނު މައްސަލައެއް ބެލުމަށްފަހުއެވެ.
އެ މައްސަލަ ބެލުމަށްފަހު އާދިއްތަ ދުވަހު އެ މަޖިލީހުން ނެރުނު ބަޔާނެއްގައި ބުނެފައިވަނީ، މޯލްޑިވްސް ޙައްޖު ކޯޕަރޭޝަން ލިމިޓެޑުން ދީފައިވާ މަޢުލޫމާތުގެ އަލީގައި މަޖިލީހުގެ މެންބަރުން އެ މައްސަލަ ދިރާސާ ކޮށްފައިވާ ކަމަށެވެ.
އެ މައްސަލަ ދިރާސާ ކުރުމަށްފަހު ފަތުވާދޭ މަޖިލީހުން ނިންމާފައިވަނީ ޢާންމު ރައްޔިތުން ޙައްޖަށް ދިއުމަށް މޯލްޑިވްސް ޙައްޖު ކޯޕަރޭޝަން ލިމިޓެޑަށް ދައްކާ ފައިސާއިން ޒަކާތް ދައްކަންޖެހޭނީ މޯލްޑިވްސް ޙައްޖު ކޯޕަރޭޝަން ލިމިޓެޑުން ކަމަށެވެ.
ޙައްޖަށް ދިއުމަށްޓަކައި ކޮންމެ އަހަރަކުވެސް އެތައް ބަޔަކު ޙައްޖު ކޯޕަރޭޝަނަށް ފައިސާ ދައްކާއިރު، އެތައް ބަޔަކު ޙައްޖަށް ނުދެވި ކިއޫގައި ތިބެންޖެހެއެވެ. އެފަދަ ޙާލަތްތަކުގައި އެ ފައިސާއިން ޒަކާތް ދައްކަންޖެހޭނީ ޙައްޖު ކޯޕަރޭޝަނުންކަން ފަތުވާދޭ މަޖިލީހުން މިވަނީ ސާފުކޮށްދީފައެވެ.
އިސްލާމީ ފަތުވާދޭ މަޖިލީހަކީ ދިވެހިރާއްޖޭގައި ދީނީގޮތުން ޚިޔާލު ތަފާތުވުން އުފެދޭ ކަންކަމުގައި، ސަރުކާރަށާއި ދިވެހި ރައްޔިތުންނަށް ބޭނުންވާނެ އެކިއެކި ދީނީ ފަތުވާ ފޯރުކޮށްދިނުމަށާއި، ފިޤުހީ އައު މައްސަލަތަކުގެ ދިރާސާތައް ކުރުމަށާއި، އެކަންކަމާ ގުޅޭ ދީނީ ލަފާޔާއި އިރުޝާދު ފޯރުކޮށްދިނުމަށްޓަކައި، އުފައްދާފައިވާ މަޖިލީހެކެވެ.
