ޑޮލަރުގެ އަގު އުފުލިގެން ދިއުމުގެ ސަބަބުން ރައްޔިތުންނަށް ދަތިވާކަމަށް ބުނެ ޝަކުވާ ކުރުމުގެ އެއްވެސް ހައްގެއް އެމްޑީޕީއަށް ނޯންނާނެކަމަށް ފުނަދޫ ދާއރިާގެ މެންބަރު މުހައްމަދު މަމްދޫހު ވިދާޅުވެއްޖެއެވެ.
ސަންގުޓީވީގެ ޚަބަރަށްފަހު ޕްރޮގްރާމުގައި ވާހަކަ ދައްކަވަމުން މަމްދޫހު ވިދާޅުވީ، ތަކެތީގެ އަގަށް އަންނަ ބަދަލުތަކާއި ޑޮލަރު ލިބުމުގެ ދަތިތަކުގެ ވާހަކަ ދެއްކުމުގެ އެއްވެސް ހައްގެއް އެމްޑީޕީއަށް ނޯންޏާނެ ކަމަށެވެ. ޑޮލަރުގެ އަގު އުފުލި، ކަޅު ބާޒާރެއް އޮތުމާއި ކާބޯތަކެތީގެ އަގުތަކަށް އައި ކޮންމެ ބަދަލަކީ އެމްޑީޕީގެ ސަބަބުން ގައުމަށް ދިމާވާ ދަތިތައްކަމަށް މަމްދޫހު ވިދާޅުވިއެވެ.
މަމްދޫހު ވިދާޅުވީ 8.8 ބިލިއަން ރުފިޔާ ޗާޕުކޮށް އެ އިގްތިސާދުގެ ތެރެއަށް ދޫކޮށްލުމުގެ ސަބަބުން ދިވެހި ރުފިޔާގެ އަގު އިންތިހާއަށް ދަށްވެގެން ދިޔަކަމަށެވެ. ރާއްޖެއަކީ އިމްޕޯޓު މުދަލަށް އެއްކޮށް ބަރޯސާވެފައި އޮތް ގައުމެއްކަން ފާހަގަކުރައްވައި މަމްދޫހު ވިދާޅުވީ، ބޭރުން މުދާ އެތެރެ ކުރުމަށް ދަތިވި ވަގުތުގައި އެމްޑީޕީ ޖީއެސްޓީގެ އިންސައްތަ މަތި ކުރިކަމަށެވެ. އޭގެ ސަބަބުން އަނެއްކާވެސް ރައްޔިތުންނަށް އެތައް ދައްޗަކާއި ކުރިމަތިލާން ޖެހުނީ ވިޔަފާރިވެރިން މަޖުބޫރުވެ އިތުރު ގޮތެއް ނެތިގެން ތަކެތީގެ އަގު ބޮޑު ކުރުމުންކަމަށް މަމްދޫހު ވިދާޅުވި އެވެ.
ފައިސާ ޗާޕުކޮށް ލޯނު ނެގުމުގެ ސަބަބުން، އިންފްލޭޝަނަށް އޭގެ އަސަރު ކުރިކަން ވެސް މަމްދޫހު ފާހަގަކުރެއްވި އެވެ. އަދި ވިދާޅުވީ ކުދި ވިޔަފާރިތަކުގެ ހުރި އެއްވެސް ޝަކުވާއެއް އެމްޑީޕީ އަޑުއަހާފައި ނުވާކަމަށެވެ. އޭގެ ބަދަލުގައި އެމްޑީޕީ މަޖިލީހުގެ ސުޕަ މެޖޯރިޓީގެ ބޭނުން ނަހަމަ ގޮތުގައި ހިފައި، ގެންގުޅެމުން ދިޔައީ ދޯހަޅި ސިޔާސަތުތަކެއްކަމަށް މަމްދޫހު ވަނީ ވިދާޅުވެފަ އެވެ.
ދިވެހި ރައްޔިތުންނަކަށް ނޯޅޭނެ އެމްޑީޕީ ވެރިކަމެއްގެ ތެރޭގައި 8.8 ބިލިއަން ދިވެހި ރުފިޔާ ޗާޕުކޮށް މި އިގްތިސާދުގެ ތެރެއަށް ދޫކޮށްލި ކަމެއް.. މި ކަންކަމެއް ނޯޅޭނެ.. އެއާއެކީގައި ހަގީގަތުގައި ވެސް ދިވެހި ރުފިޔާގެ އަގު އިންތިހާއަށް ދަށްވެގެން ދިޔަ.. މި ގައުމަކީ އިމްޕޯޓް މުދަލަށް އެއްކޮށް ކަހަލަ ގޮތަކަށް ބަރޯސާވެފައި އޮތް ގައުމެއް.. އެއާ އެކީގައި ބޭރުން މި ގެންނަ އެއްޗެހި ގަތުމަށް ޑޮލަރު ހޯދުމަށް ހަގީގަތުގައި އިންތިހާއަށް ދަތިވެގެން ދިޔަ އެކީގައި ތަކެތީގެ އަގުބޮޑުވެގެން ދިޔަ އަދި އެ ދަނޑިވަޅުގައި ޖީއެސްޓީ އިތުރުކުރީމާ އަނެއްކާވެސް ރައްޔިތުން ގަންނަ ތަކެތީގެ އަގު ބޮޑުކުރަން ވިޔަފާރިވެރިންނަށް މަޖުބޫރުވީ.. ކުދި ވިޔަފާރިތަކަށް މަޖުބޫރުވީ ތަކެތީގެ އަގު ބޮޑުކުރަން…
މީގެއިތުރުން މަމްދޫހު ވިދާޅުވީ 2023 ގެ ރިޔާސީ އިންތިހާބު ރައީސް ޑރ. މުހައްމަދު މުއިއްޒު ކާމިޔާބު ކުރެއްވީ ސަބަބުތަކެއް އޮވެގެން ކަމަށެވެ. ރައްޔިތުން ބޭނުންވީ އިގްތިސާދު ހަމަޔަކަށް އެޅި، މާލީ ގޮތުން ގައުމުގެ ހާލަތު ރަނގަޅުވުންކަމަށް މަމްދޫހު ވިދާޅުވި އެވެ.
ވެރިކަމަށް ދޮޅު އަހަރުވެގެން ދިޔައިރު، މަމްދޫހު ވިދާޅުވީ މިހާރު ފެންނަނީ އިގްތިސާދު މަޑުމަޑުން ރަނގަޅުވަމުންދާ މަންޒަރު ކަމަށެވެ. އަދި އޭގެ އެންމެ ބޮޑު ހެއްކަކީ ސުކޫކުގެ އަގު ވެސް 64 ގައި ހުރުމަށް ފަހު 87 އަށް އުފުލިގެން ދިއުންކަމަށް މަމްދޫހު ވިދާޅުވި އެވެ.
