ރާއްޖޭގެ މަސްވެރިކަމުގެ ސިނާޢަތުގައި ފާއިތުވެދިޔަ 23 އަހަރު ޚިދުމަތްދެމުން އަންނަ ސައްތައިން ސައްތަ ދިވެހި ކުންފުނި، އެންސިސްއިން ހުޅުމާލޭގައި ހުންނަ އެ ކުންފުނީގެ ކޭނިންގ ފެކްޓަރީ ވިއްކާލުމުގެ މަޝްވަރާތަކާއި ގުޅޭގޮތުން ޙަޤީޤަތާ ޚިލާފް ވާހަކަތައް ފެތުރެމުންދާކަމަށް ބުނެ އެކަން ކުއްވެރިކޮށްފިއެވެ. މިފަދަ މަޢުލޫމާތުތައް ފެތުރުމުގެ ސަބަބުން ކުންފުނީގެ އަގު ވެއްޓޭ ކަމަށް އެންސިސްއިން ބުނެއެވެ.
އެންސިސްއިން ބުނި ގޮތުގައި ކުރީގެ ރައީސް އިބްރާހިމް މުހައްމަދު ސާލިޙްގެ ސަރުކާރުން މަސްގަންނަ އަގު މަތިކުރުމާ ގުޅިގެން ކޭނިންގ ފެކްޓަރީ ބަންދުކުރަން މަޖުބޫރުވެ، ކުންފުންޏަށް ލިބެމުންދާ ގެއްލުން ކުޑަކުރުމަށްޓަކައި މިހާރު މިފްކޯއާއި ބައިނަލްއަޤްވާމީ ފަރާތްތަކާއެކު ވާހަކަ ދައްކަމުންދެއެވެ.
އެންސިސްއަކީ ދިވެހިރާއްޖޭގެ މަސްވެރިކަމުގެ ސިނާޢަތުގައި ދިގު މުއްދަތެއްގައި ޚިދުމަތްދެމުން އަންނަ ފަޚުރުވެރި ކުންފުންޏެކެވެ. އެންމެ ފުރަތަމަ މި ކުންފުނިން ޤާއިމުކުރީ ކަންނެލި ފެކްޓަރީއެކެވެ. އޭގެ ފަހުން، 2019 ވަނަ އަހަރު ހުޅުމާލޭގައި ޤާއިމުކުރި ކޭނިންގ ފެކްޓަރީއަކީ އެންމެ ޒަމާނީ މެޝިނަރީތަކާއި ވަސީލަތްތައް ހިމެނޭ، ކުންފުނީގެ އެންމެ ބޮޑު އިންވެސްޓްމަންޓެވެ.
މި ފެކްޓަރީ ޤާއިމުކުރެވިފައިވަނީ ޖަރުމަނުވިލާތުގެ ޑިވެލޮޕްމަންޓް ބޭންކާއި ރާއްޖޭގެ ބޭންކުތަކުން ނެގި ލޯނުތަކުގެ އެހީގައެވެ. މިއީ މަސްވެރިކަމުގެ ސިނާޢަތުގައި ރާއްޖޭގައި އޮތް އެންމެ އަގުހުރި އެސެޓްތަކުގެ ތެރެއިން އެއް އެސެޓްކަމަށް އެންސިސްއިން ފާހަގަކުރެއެވެ.
އެންސިސްއިން ނެރުނު ބަޔާނުގައި ބުނެފައިވާ ގޮތުގައި، ރައީސް ސާލިޙްގެ ސަރުކާރުން މަސް ގަންނަ އަގު އެކި ފަހަރުމަތިން ބޮޑުކުރަމުން ގޮސް، ކިލޯއަކަށް 25 ރުފިޔާއަށް އަގު ބޮޑުކުރުމާ ގުޅިގެން، ކުންފުންޏަށް ލިބޭ އާމްދަނީއަށް ނުބައި އަސަރުކޮށް، ކޭނިންގ ފެކްޓަރީ ބަންދުކުރަން އެންސިސްއަށް މަޖުބޫރުވިއެވެ.
މި ފެކްޓަރީއަކީ ބައިނަލްއަޤްވާމީ ސެޓިފިކޭޝަން ލިބިފައިވާ، އޮޑިޓްކުރެވިފައިވާ، އަދި ބޭރުގެ އެކި މާކެޓްތަކަށް ދަޅުމަސް އެކްސްޕޯޓްކުރަމުންއައި ހަރުދަނާ ވިޔަފާރިއެކެވެ. ފެކްޓަރީ ބަންދުކުރިއިރު 400 އަށްވުރެ ގިނަ މުވައްޒަފުން ވަޒީފާ އަދާކުރަމުން ދިޔަކަން އެންސިސްގެ ބަޔާނުގައި ވަނީ ފާހަގަ ކޮށްފައެވެ. މީގެތެރެއިން 200 މުވައްޒަފުންނަކީ މަސް ސާފުކުރުމަށްޓަކައި ވަޒީފާގައި ތިބި ދިވެހި އަންހެން މުވައްޒަފުންނެވެ. އަދި ޔޫރަޕާއި އެމެރިކާގެ ސުޕަމާކެޓްތަކުގައި ދިވެހި މަހުގެ އުފެއްދުންތައް ވިއްކަމުން ދިޔައީ ދިގު މުއްދަތުގެ ކޮންޓްރެކްޓްތަކުގެ ދަށުންނެވެ.
އެންސިސްއިން ބުނާ ގޮތުގައި މިފަދަ ފެކްޓަރީއެއްގެ އަގު ކަނޑައެޅުމުގައި، ފެކްޓަރީ ހިމެނޭ ބިމާއި، މެޝިނަރީތަކާއި، އިންސާނީ ވަސީލަތްތަކާއި، ސަޕްލައި ކޮންޓްރެކްޓްތައްވެސް ހިމެނިގެންދާނެއެވެ. އެގޮތުން މިފަދަ އަގުހުރި އިންވެސްޓްމަންޓެއް ކޮށްފައިވަނީ، ހުޅުވާލެވިފައިވާ މަސްވެރިކަމުގެ ސިނާޢަތެއްގައި ވާދަވެރި ވިޔަފާރިއެއް ކުރުމުގެ އަޒުމުގައި ކަމަށާއި ނަމަވެސް މަހުގެ އަގު ކޮންޓްރޯލް ކުރެވިފައިވާ މާހައުލެއްގައި، ކުންފުނީގެ ކުރިމަގު ޔަޤީންކުރުމަށްޓަކައި ކުރަންޖެހޭ އެންމެހައި މަސައްކަތްތަކާއި މަޝްވަރާތައް އެންސިސްއިން އަބަދުވެސް ކުރިއަށް ގެންދާނެ ކަމަށް ބަޔާނުގައި ބުނެފައިވެއެވެ.
އެގޮތުން ކޭނިންގ ފެކްޓަރީ ބަންދުކުރަން މަޖުބޫރުވުމުގެ ސަބަބުން، ކުންފުންޏަށް ލިބެމުންދާ ގެއްލުން ކުޑަކުރުމަށްޓަކައި، ފެކްޓަރީ ވިއްކާލުމަށް ނުވަތަ ތިންވަނަ ފަރާތަކާ ހަވާލުކޮށްގެން ހިންގުމަށް އެންސިސްއިން މަސައްކަތްކުރަމުން ދެއެވެ. މި ގޮތުން، މިފްކޯގެ އިތުރުން ޗައިނާ އަދި ސަޢޫދީ ޢަރަބިއްޔާގެ ކުންފުނިތަކާއެކު މަޝްވަރާތައް ކުރިއަށްދެއެވެ.
މިފްކޯގެ އުފެއްދުންތެރިކަމާއި އިތުރު އަގު އުފެއްދުމުގެ ޤާބިލިއްޔަތު އިތުރުކުރުމުގެ މަސައްކަތުގެ ތެރެއިން، އެންސިސްގެ ކޭނިންގ ފެކްޓަރީ މިފްކޯގެ އެސެޓްތަކުގެ ތެރެއަށް އިތުރުކުރުމަށް މިފްކޯއާއި އެންސިސްއާ ދެމެދު މަޝްވަރާތައް ކުރިއަށްދާކަން އެންސިސްގެ ބަޔާނުގައި ވަނީ ފާހަގަ ކޮށްފައެވެ.
މިކަމާ ގުޅޭގޮތުން އަދި ފެކްޓަރީގެ އަގު ކަނޑައެޅުމާ ގުޅޭގޮތުން ޙަޤީޤަތް އޮޅޭގޮތަށް ބައެއް ފަރާތްތަކުން މަޢުލޫމާތު ފަތުރަމުންދާތީ އެކަމާމެދު އެންސިސްއިން ހިތާމަކުރާ ކަމަށް ބުނެއެވެ. އަދި ކުންފުނީގެ އަގު ވެއްޓޭ ގޮތަށް އެއްވެސް ފަރާތަކުން މަޢުލޫމާތު ނުފެތުރުމަށް އެންސިސްއިން އިލްތިމާސްކުރެއެވެ.
