ސްކޭމުގެ މައްސަލަތައް ހުއްޓުވުމުގެ ގޮތުން ސްކޭމްކޮށްގެން ފައިސާ ހޯދުމަށް ގެންގުޅޭ ނަމްބަރުތަކާއި ބޭނުންކުރާ އެކައުންޓްތަކުގެ ނަމްބަރުތައް އެނގޭނެ މޮބައިލް އެޕްލިކޭޝަނެއް ފަރުމާ ކުރަމުންދާކަން ހާމަކޮށްފިއެވެ.
މިކަމާއި ގުޅޭ ގޮތުން މައުލޫމާތު ދެމުން ފުލުހުން ބުނީ، މި އެޕްލިކޭޝަންގައި މި މައުލޫމާތުތައް ރައްކާތެރިކޮށްފައި ހުންނައިރު، ފިޝިން ލިންކާއި ޕްރޮމްޓް މެސެޖުގެ މައުލޫމާތުތައްވެސް ފެންނަން ހުންނާނެކަމަށެވެ.
އެޕަށް މައުލޫމާތު އެޅޭޏީ ސްކޭމް ކޯލެއް ކޮށްފިނަމައެވެ. ނަމަވެސް މައުލޫމާތު އާންމުނަށް ފެންނާނެހެން އާންމުކުރާނީ އެ މައުލޫމާތު ކަށަވަރު ކުރުމަށްފަހުކަމަށް ބުންޏެވެ. އެޕް ފަރުމާ ކުރާނީ ކޮންމެ އަށް ގަޑިއިރަކުން އެޕަށް އެ މައުލޫމާތު އަޕްޑޭޓްވާ ގޮތަށްކަމަށްވެސް ވިދާޅުވިއެވެ.
މި މައުލޫމާތުތައް އެޕްގައި އާންމުކުރާ ހިސާބުން، އިންޓަނެޓްގެ ހިދުމަތް ފޯރުކޮށްދޭ ފަރާތްތަކުން ފިޔަވަޅު އަޅަންޖެހޭނެކަމަށް ފުލުހުން ބުންޏެވެ. ފުލުހުން ވަނީ މިފަދަ މައްސަލަތަކުގައި ފިޔަވަޅު އެޅުން ވީހާވެސް އަވަސްކުރުމުގެ މުހިންމުކަން ފާޙަގަކުރައްވާފައެވެ.
ގިނަ އަދަދެއްގެ ބަޔަކު އަންނަނީ މިފަދަ ލިންކުތަކުގެ ޝިކާރައަކަށް ވަމުންނެވެ. އޭރެއްގައި ހިނގަމުންދާ ކަމަކާއި ގުޅުވައި ސްކޭމްގެ އުކުޅުތައް ކުރި އަރަމުން އަންނައިރު، ވަކިން ހާއްސަކޮށް ގެދޮރުވެރިޔާ ސްކީމުން ބޯހިޔާވަހިކަން ލިބޭ މީހުންގެ މައުލޫމާތު އާންމުކުރުމަށް ދައުލަތުން ތައްޔާރުވަމުންދާ މި ދަނޑިވަޅުގައި އެފަދަ ލިންކުތަކަށް ކްލިކްކުރާ މީހުން އިތުރުވެގެންދިޔުމަކީ އެކަށީގެންވާކަމަށްވާއިރު، ކަމާބެހޭ އިދާރާތަކުގެ އިލްތިމާސަށް ބޯލަނބާ، އެ އިދާރާތަކުން ދޭ އިރުޝާދުތަކަށް ސަމާލުކަމެއް ދިނުމަކީ، އެންމެންގެ ސަލާމަތާއި ރައްކާތެރިކަމަށް މުހިއްމުކަކަމެއްކަމަށް ފުލުހުން އަންނަނީ ފާހަގަކުރަމުންނެވެ. ދާދި ފަހުންވެސް މިފަދަ ގޮތަކަށް ހައުސިން ޑިވެލޮޕްމެންޓް ކޯޕަރޭޝަން (އެޗްޑީސީ) ގެ ނަމުގައި ސްކޭމް ކުރަމުންދާ މައްސަލައެއް ވަނީ ފެންމަތިވެފައެވެ.
ހަ މަސްދުވަހުގެ ތެރޭގައި އެންޓި-ސްކޭމް ސެންޓަރަށް ރިޕޯޓުކުރި 1059 މައްސަލައިގެ ތެރޭގައި 491 އީ-ކޮމާސް ސްކޭމްގެ މައްސަލަ ހިމެނެއެވެ. އަދި ބޭރު ފައިސާ މާރުކުރުމުގެ 250 މައްސަލައާއި، އެހެން މީހެއްގެ ގޮތުގައި ދެއްކުމުގެ (އިމްޕާސަނޭޝަން) 130 މައްސަލައާއި، އިންވެސްޓްމަންޓް ސްކޭމްގެ 32 މައްސަލަ ހިމެނެއެވެ.
އެންޓި-ސްކޭމް ސެންޓަރުން ވަނީ ފާއިތުވި ހަ މަސް ދުވަހުގެ ތެރޭގައި މާލެ ސަރަހައްދާއި ރާއްޖޭގެ އެކި ހިސާބުތައް ހިމެނޭ ގޮތަށް ރަށްރަށަށް ޒިޔާރަތްކޮށް، ސްކޫލުތަކުގެ ދަރިވަރުންނާއި އާންމު ރައްޔިތުންނަށް ހޭލުންތެރިކަމުގެ މައުލޫމާތު ދީފައެވެ. ސޯޝަލް މީޑިއާ، ޓީވީ، އަދި ރޭޑިޔޯ ޕްރޮގްރާމްތައް މެދުވެރިކޮށް ވެސް މައުލޫމާތު ފޯރުކޮށްދެވިފައިވާއިރު، ރާއްޖޭގެ އާބާދީގެ ގާތްގަނޑަކަށް %40 މީހުންނަށް މައުލޫމާތު ފޯރުކޮށްދެވިފައިވާ ކަމަށް އެ ސެންޓަރުން ބުނެއެވެ. އަދި ”ސްކޭމް އައްޑަނަ“ގެ ނަމުގައި ހާއްސަ ކެމްޕެއިނެއް މުޅި ރާއްޖޭގައި ގެންދިއުމަށް ވަނީ ލޯންޗުކޮށްފައެވެ.
އެންޓި-ސްކޭމް ސެންޓަރަކީ ސްކޭމާ ގުޅޭ ހުރިހާ މައްސަލަތަކަކާ ދެކޮޅަށް މަސައްކަތްކުރާ މައި މަރުކަޒެވެ. އެންޓި-ސްކޭމް ސެންޓަރުގެ އަމާޒަކީ ދިވެހި ރައްޔިތުންނަށް ސްކޭމްގެ ސަބަބުން ލިބޭ މާލީ ގެއްލުންތައް ނައްތާލައި، ރައްކާތެރިކަން ދެމެހެއްޓުމާއި، ރައްކާތެރި ޑިޖިޓަލް މާހައުލެއް އުފެއްދުމެވެ.
