ސަރުކާރުގެ ދޯހަޅި އިގްތިސާދީ ނިންމުންތަކުގެ ސަބަބުން، ރައްޔިތުން ހާލުގައި ޖެހުމަކީ ބަލައިގަނެވޭނެކަމެއް ނޫންކަމަށް
އެކްސްގައި ހިއްސާ ކުރެއްވި ޕޯސްޓެއްގައި ޝާހިދު ވިދާޅުވީ، މޯލްޑިވްސް މަނިޓަރީ އޮތޯރިޓީ (އެމްއެމްއޭ) އިން 2.5 ބިލިއަން ރުފިޔާ، ޕެންޝަން ފަންޑަށް އިންވެސްޓުކުރުމުން، ޕެންޝަން ފަންޑުން އެ ފައިސާ ފިނޭންސް މިނިސްޓްރީގެ ބޮންޑަކަށް އިންވެސްޓު ކުރުމަކީ ކަންބޮޑުވުމެއްކަމަށެވެ.
ކޮވިޑް 19 ގެ ހާލަތުގައި ނަމަ ފިފަދަކަމެއް ކުރަން ޖެހުނީ މަޖުބޫރުންކަމަށާއި، ނަމަވެސް މި ދަނޑިވަޅުގައި މިފަދަ ކަމެއް ކުރަން ޖެހޭ ވަރުގެ ހާލަތެއް ދިމާނުވާކަމަށް ޝާހިދު ވިދާޅުވިއެވެ. މިކަމުގެ ސަބަބުން އިންފްލޭޝަން މަތިވެ، ތަކެތީގެ އަގު މައްޗަށް ގޮސް، ރާއްޖޭގެ ފައިސާގެ އަގު ވެއްޓި، ޑޮލަރަށް ބޭނުންވާ މިންވަރު އިތުރުވެގެންދާނެކަމަށް ޝާހިދު ވިދާޅުވިއެވެ. އަދި އިގްތިސާދީ ގޮތުން ވަރަށް ބޮޑެތި ދަތިތަކާއި ކުރިމަތިވާނެކަމަށް ފާހަގަކޮށްފައިވެއެވެ.
މިއީ ހަރަދަށް ޒިންމާވުމުގެ ގާނޫނުގައި ހިމަނާފައިވާ ލިމިޓުތަކާ ހިލާފަށް ކުރާ ކަމެއްކަމަށް ޝާހިދު ވިދާޅުވިއެވެ.
މިކަން ނުކުރުމަށް ގޮވާލާ ޝާހިދު ވިދާޅުވީ، މިއީ ނުރައްކާތެރިކަމެއްކަމަށެވެ. ސަރުކާރުގެ ދޯހަޅި އިގްތިސާދީ ނިންމުންތަކުގެ ސަބަބުން ރައްޔިތުން ހާލުގައި ޖެހުމަކީ ބަލައިގަނެވޭނެކަމެއް ނޫންކަމަށް ޝާހިދު ވިދާޅުވިއެވެ.
މިކަމުގެ ސަބަބުން ސަރުކާރަށް އޮތް އިތުބާރުވެސް ވަރަށް ބޮޑަށް ގެއްލިގެންދާނެކަމަށް ފާހަގަކުރައްވާފައިވެއެވެ. އަދި ހާއްސަ ގޮތެއްގައި ރައްޔިތުންގެ މެދުގައި އޮތް އިތުބާރު ނަގާލާ، ނިންމާ ނިންމުމަކުން އެކަމުގެ ހިތި ރައްޔިތުން ތަހައްމަލު ކުރަން ޖެހުމަކީ އިންސާފެއް ނޫންކަމަށް ޝާހިދު ވިދާޅުވިއެވެ.
މީގެ ކުރީގައި ޝާހިދު ވިދާޅުވެފައިވާ ގޮތުގައި ސަރުކާރުން ވަނީ ރައްޔިތުންގެ އުއްމީދުތަކާއި، ދައުލަތުގެ ޚަޒާނާ އަދި މުޅި ދައުލަތް ލޫޓުވާލާފައެވެ. މީގެއިތުރުން ރައްޔިތުންގެ އަޑު އުފުލުމަށް މަޖިލީހަށް ހޮވާފައިވާ މަންދޫބުންގެ އަޑުވެސް ސަރުކާރުން ވަނީ ފޭރިގަނެފައިކަމަށް ތުހުމަތު ކުރެއްވިއެވެ.
ޝާހިދު ވިދާޅުވީ ސަރުކާރުން ދަނީ ދައުލަތުގެ ހަޒާނާގައި ހުރި ފައިސާ އެކި ގޮތްގޮތުން ބޭނުންކޮށް ހަގީގަތް އޮޅުވާލަމުންކަމަށެވެ. ޑްރޯންއާއި އެފަދަ އެހެނިހެން ސާމާނު ގަތުމުގެ ނަމުގައި ދައުލަތުގެ ހަޒާނާ ވަނީ ބޮޑުތަނުން ލޫޓުވާލާފައި ކަމަށާއި، ލާމަރުކަޒީ ނިޒާމުވެސް ވަނީ ފުނޑުފުނޑުކޮށްލާފައިކަމަށް ވިދާޅުވިއެވެ.
ނޫސްވެރިކަމުގެ މިނިވަންކަމަށް އަމާޒުކޮށްވެސް ހަމަލާތައް ދެމުންދާކަމަށާއި، ސަރުކާރުން ދަނީ ނޫސްވެރިންގެ އަޑު ކަނޑުވާލުމަށް މަސައްކަތްކުރަމުންކަމަށް ޝާހިދު ވިދާޅުވިއެވެ. ކުރީގެ ރައީސް އިބްރާހިމް މުހައްމަދު ސާލިހުގެ ވެރިކަމުގައި ރައްޔިތުން ކުރި އުންމީދުތައް ވަނީ ފުނޑުފުނޑުވެފައިކަމަށާއި، އާސަންދައިގެ ހިދުމަތްތައް ހަރުދަނާކުރުމަށް ދެއްކި ވާހަކަތަކަކީވެސް ހަމައެކަނި ފޮނި ބަސްތަކެއްކަމަށް ވިދާޅުވިއެވެ.
