ދާރުލްއާސާރު ތަރައްގީ ކުރުމަށް ކުރަމުންދާ މަސައްކަތްތަކުގެ ތެރެއިން އެއްވެސް ތަރިކައެއް ނައްތާލާފައި ނުވާނެކަމަށް މިނިސްޓަރ އޮފް ދިވެހި ލެންގުއޭޖް، ކަލްޗަރ އެންޑް ހެރިޓޭޖް އާދަމް ނަސީރު އިބްރާހީމް ވިދާޅުވެއްޖެއެވެ.
މިއަދުގެ ރައްޔިތުންގެ މަޖިލީހަށް މިނިސްޓަރު ހާޒިރުކޮށްފައިވަނީ، ތޮއްޑޫ ދާއިރާގެ މެންބަރު ހުސައިން ސަމީރު ކުރައްވާ ސުވާލަށެވެ.
އެގޮތުން ސުވާލުކޮށްފައި ދާރުލްއާސާރުގެ އެތެރެ އިތުރަށް ރަނގަޅުކުރަން މަސައްކަތް ފެށިއިރު، 12 ލޮރީގެ ކުނި ދާރުލްއާސާރުން ބޭރުކުރިކަމަށް، 16 އޭޕްރިލް 2025 ގައި ވަޒީރު ވިދާޅުވެފައިވާކަމަށް ފާހަގަކޮށްފައިވެއެވެ. އެތަކެތީގެ ރިކޯޑުތައް ނުވަތަ ފޮޓޯއާއި ވީޑިއޯ ނަގާފައިވޭތޯ ސުވާލުކޮށްފައިވެއެވެ. އަދި ދާރުލްއާސަރުގައި ހުރި އާސާރީ ތަކެތީގެ ތެރެއިން އެއްވެސް އެއްޗެއް ނައްތާލާފައިނުވާކަމުގެ ޔަގީންކަން އެބައޮތްތޯ ސުވާލުކުރިއެވެ.
މިނިސްޓަރު ވިދާޅުވީ ގައުމީ ދާރުލްއާސާރު އިތުރަށް ތަރައްގީ ކުރުމުގެ މަސައްކަތަކީ، ދާރުލްއާސާރު ހުރި އިމާރާތުގެ އެތެރެއާއި، އިމާރާތުގެ ބޭރު ސަރަހައްދާއި ގުޅިފައިވާ މަސައްކަތެއްކަމަށެވެ. އާސާރުގެ ގޮތުގައި ހިމެނޭ އެތައް އެއްޗެއް ދާރުލްއާސާރު ހުންނަ އިމާރާތުގެ ބޭރުގައިވެސް އާސާރުގެ ގޮތުގައި ދައްކަން ބަހައްޓާފައި އެބަހުރިކަމަށެވެ.
އެގޮތުން އެ ސަރަހައްދާއި، ގައުމީ ދާރުލްއާސާރު ހުންނަ އިމާރާތަށް އިތުރު ތަރައްގީ ގެނައުމަށްޓަކައި ކުރެވެމުންދާ މަސައްކަތުގެ ތެރޭގައި، ކުރިން އެތަނުގައި ހުރި އެތައް ބައިވަރު ކުންޏެއް ވަނީ ނަގާފައިކަމަށެވެ. އޭގެ ތެރޭގައި ދާރުލްއާސާރު ހުންނަ އިމާރާތުގެ އެތެރޭގައި ހުންނަ ކުންޏާއި، އިމާރާތުގެ ބޭރުން ދާރުލްއާސާރުގެ ބޭރު ތެރޭގައި ހުރި ކުނިވެސް ހިމެނޭކަމަށާއި، ކުނިކަމަށް ކަނޑައަޅަން ޖެހޭ ތަކެތި އެއީ ނައްތާލަން ޖެހޭ ކުނިކަމަށް ކަނޑައަޅާފައިވާނީ ގާނޫނު ނަންބަރު 3/2006، ދައުލަތުގެ މާލިއްޔަތު ގާނޫނާއި، އެ ގާނޫނުގެ ދަށުން އެކުލަވާލެވިފައިވާ ގަވާއިދާ، ދައުލަތުގެ މުދާ އެއް އޮފީހުން އަނެއް އޮފީހަށް ބަދަލުކުރުމާއި، ބާވެ ހަލާކުވެގެން ނުވަތަ ބޭނުންކުރެވެން ނެތް މުދާނީލަން ކިޔުމާއި، ނައްތާލުމުގައި އަމަލުކުރާނެ އުސޫލާއި އެއްގޮތްވާ ގޮތުގެ މަތިންކަމަށް މިނިސްޓަރު ވިދާޅުވިއެވެ.
ކުނި އުކާލާފައިވާނީ އެ ގާނޫނާއި، ގަވާއިދާ، އުސޫލުތަކުގެ ދަށުންކަމަށް މިނިސްޓަރު ވިދާޅުވިއެވެ.
ދާރުލްއާސާރުގެ އެތެރެއިން އުކާލެވުނު ކުނި ހުރީ އާސާރީ ތަކެތި ހުންނަ ބައިގައި ނޫންކަމަށާއި، އެހެންކަމުން އެތަން ތަރައްގީ ކުރުމަށް ކުރަމުންދާ މަސައްކަތްތަކުގެ ތެރެއިން އެތަނުގައި ހުރި އެއްވެސް ތަރިކައެއް ނައްތާލާފައި ނުވާނެކަން ވާނީ ކަށަވަރުކޮށްފައިކަމަށް މިނިސްޓަރު ވިދާޅުވިއެވެ.
އަނެއްކާވެސް މެންބަރު ވަނީ، މިތަކެތީގެ ފޮޓޯ ނުވަތަ ވީޑިއޯ ނަގާފައިވާނެތޯ ސުވާލުކޮށްފައެވެ. އަދި އުކާލި ތަކެއްޗަކީ ކުނިކަން ކަށަވަރުކުރީ ކިހިނެއްތޯ ސުވާލުކުރިއެވެ. މިނިސްޓަރު ތަކުރާރުކޮށް ވިދާޅުވީ ކަން ކޮށްފައިވާނީ އުސޫލާއި އެއްގޮތަށްކަމަށެވެ.
