އެމްޑީޕީއިން ޕެންޝަން ގާނޫނަށް އިސްލާހު ހުށައެޅި ސަރުކާރަށް ދަތިކުރަންކަމަށް ޕީއެންސީގެ ނައިބު ރައީސް އަދި ބާރަށު ދާއިރާގެ މެމްބަރު އިބްރާހިމް ޝުޖާއު ވިދާޅުވިއެވެ.
ގަލޮޅު އުތުރު ދާއިރާގެ އެމްޑީޕީ މެންބަރު މުހައްމަދު އިބްރާހީމް ޕެންޝަން ގާނޫނަށް ހުށައަޅުއްވާފައިވާ އިސްލާހަށް ބަހުސް ކުރައްވަމުން ޝުޖާއު ވިދާޅުވީ މިއީ ރަނގަޅު ނިޔަތެއްގައި ހުށައަޅާފައިވާ އިސްލާހެއްކަމަށް ގަބޫލުކުރަން ދަތިކަމަށެވެ. ރާއްޖޭގައި ގިނަ އަދަދަކަށް ދާއިމީ ބަލި މީހުން އުޅޭތާ ފުދޭވަރަކަށް ޒަމާންވެފައިވާކަމަށް ފާހަގަކޮށް ޝުޖާއު ވިދާޅުވީ، އެހެން ނަމަވެސް ގައުމުގައި ހުރި މިފަދަ މުހިންމު ކަންކަން އެމްޑީޕީއަށް އިހުސާސްވަނީ ޕީއެންސީއަށް ވެރިކަން ލިބުމުންކަމަށެވެ.
އެމްޑީޕީގެ ދެ ވެރިކަން ނިމިގެންދިޔައިރުވެސް، މިފަދަ މުހިންމު ކަންކަން ވިސްނިފައި ނެތުމަކީ ކަންބޮޑުވާކަމެއްްކަމަށް ޝުޖާއު ވިދާޅުވިއެވެ. އަދި ވިދާޅުވީ އާސަންދައާއި އެންސްޕާގެ ތެރެއިން ބޭސް ފަރުވާއަށް ވަކި ހާއްސަ ނިޒާމެއް ރާއްޖޭގައި އެބައޮތްކަމަށެވެ. ޕެންޝަން ސްކީމްގެ ތެރެއިން ބޭސް ފަރުވާއާއި ހުރިހާ ކަމަކަށް ހައްލު ހޯދުމުގެ ބަދަލުގައި، އެންސްޕާ އާއި އާސަންދައިގެ ނިޒާމު ހަރުދަނާ ކުރުން މާ މުހިންމުކަމަށް ޝުޖާއު ވިދާޅުވިއެވެ.
ދާއިމީ ބޮޑެތި ބަލިތަކަށް ފަރުވާ ހޯދާ ފަރާތްތަކަށް އެންސްޕާ އާސަންދައިގެ ތެރެއިން ހަރުދަނާ ވަކި ނިޒާމެއް ގާއިމްކުރުން މާ ރަނގަޅުވާނެކަމަށް ޝުޖާއު ވިދާޅުވިއެވެ. އެހެން ނަމަވެސް މިވަގުތު ޕެންޝަން ގާނޫނަށް ހުށައަޅާފައި އޮތް ބިލު އޮތް ގޮތުން ސިފަވަނީ ސަރުކާރަށް އެމްޑީޕީގެ މެންބަރުން ކުރާ ޖެއްސުމެއްގެ ގޮތުގައިކަމަށް ފާހަގަކުރެއްވިއެވެ.
އާސަންދަ އެންސްޕާ މި ސަރުކާރު ވުޖޫދުވެގެން އައި އިރުގައި އޮތީ ނަހަމަ ގޮތުގައި ބޭނުންކޮށްފަ، ތަފާސް ހިސާބުތަކުން ފެންނަން އެބަހުރި.
ޝުޖާއު ވިދާޅުވިއެވެ.
ޝުޖާއު ވިދާޅުވީ ޕީއެންސީއިން ޒިންމާދާރު އިދިކޮޅު ސިޔާސީ ޕާޓީއެއްގެ ހައިސިއްޔަތުން ހަރަކާތްތެރިވީއިރު، އެމްޑީޕީއިން އެންސްޕާއާއި އާސަންދައިން ކުރި ވައްކަން ފެނިފައިވާކަމަށް ޝުޖާއު ވިދާޅުވިއެވެ. އަދި ތަފާސް ހިސާބުތަކުންވެސް މިކަން ހާމަވާކަމަށް އޭނާ ވިދާޅުވިއެވެ.
