އެއްވެސް ނިޒާމަކީ އެ ނިޒާމެއް އަންނަ ދުވަހުން ފެށިގެން ދެން އެއަށް ބަދަލެއް ނާންނަ ގޮތަށް އޮންނަ ނިޒާމެއް ނޫން ކަމަށާއި އެމްޑީޕީން ގެނެއި ނިޒާމުތަކަށް ވެސް ބަދަލު ބޭނުންވާ ކަމަށް ހަނިމާދޫ ދާއިރާގެ މެމްބަރު ޢަބްދުލްޣަފޫރު މޫސާ ވިދާޅުވެއްޖެއެވެ.
މެމްބަރު މުހައްމަދު އިބްރާހިމް ހުށައަޅުއްވާފައިވާ ދިވެހިރާއްޖޭގައި ލޭ ހޯދުމަށް ނުހަނު ދަތިވާކަން ފާހަގަކޮށް އެ މައްސަލަ ހައްލުކުރުމާއި މެދު ރައްޔިތުންގެ މަޖިލީހުގެ މެމްބަރުން ދެކޭގޮތް ބެލުމަށް ހުށައަޅާފައިވާ ގަރާރަށް ބަހުސްކުރައްވަމުން ޣަފޫރު ވިދާޅުވީ މިއީ ހަގީގަތުގައިވެސް ރާއްޖޭގައި އޮތް މައްސަލައެއް ކަމަށާއި މިކަމަށް ހައްލެއް ހޯދަން ޖެހޭ ކަމަށެވެ.
ޣަފޫރު ވިދާޅުވީ މި މަސައްކަތް އެމްޑީޕީގެ ސަރުކާރުގައި ނުކުރީ ކީއްވެތޯ މެމްބަރުން ސުވާލު އުފައްދާ ކަމަށެވެ. އެކަމަށް ރައްދުދެއްވާ ޣަފޫރު ވިދާޅުވީ، އާސަންދަ އާއި، ދަތުރުފަތުރާއި، މެޓާނިޓީ ލީވްއާއި، ހިލޭ ޑިގްރީ އާއި މާލެއާއި ރާއްޖޭގެ އެހެންރަށްތަކުގައި ކަރަންޓު އެއްވަރު ކުރުމާއި، ޕެންޝަން ތައާރަފްކުރުމާއި އެކަނިވެރި މައިންނަށް އިނާޔަތް ދޭން ފެށުމާއި އެފަދަ ހުރިހާ ކަމެއްވެސް ކުރީ އެމްޑީޕީގެ ސަރުކާރުގައި ކަމަށެވެ.
ޣަފޫރު ވިދާޅުވީ އެ ނިޒާމުތަކުގައި މައްސަލަތައްހުރި ކަމަށާއި އެކަންކަން މިއަދު ރަނގަޅު ކުރަންޖެހޭ ކަމަށެވެ. ރައްޔިތުންގެ މަޖިލީހުގެ މެމްބަރުންނަށް މުސާރަ ދީފައި ތަން ހިންގަން އޮންނަނީ، އެ ހުރި ނިޒާމުތަކުގައި ހުރި މައްސަލަ ތަކަށް ހައްލު ހޯދަން ކަމަށް ގަފޫރު ވިދާޅުވިއެވެ.
”މިއަދު ނުބުނާށޭ އެއްވެސް ބޭފުޅަކު ތިޔަ ކަންތައްތައް ކަލޭމެން ކީއްވެހޭ ނުކުރީ. އެވާހަކައެއް ނޫނޭ މިއަދު ދައްކަން ޖެހޭނީ. އެއްވެސް ނިޒާމަކީ އެ ނިޒާމެއް އަންނަ ދުވަހުން ފެށިގެން ދެން އެއަށް ބަދަލެއް ނާންނަ ގޮތަށް އޮންނަ ނިޒާމެއް ނޫން. އަޅުގަނޑުމެން ޓީޗަރުންގެ މުސާރަ ބޮޑުކޮށްދިނީ، އަޅުގަނޑުމެން ސިއްހީ ދާއިރާގެ މުސާރަ ބޮޑުކޮށްދިނީ. އެހެންމަވެސް ޓީޗަރުންގެ މުސާރައިގަވެސް މައްސަލަ އެބަހުއްޓޭ އިއްޒަތްތެރި ރައީސް. މިކަންކަން ހައްލުކޮށްދޭން އެބަޖެހެޔޭ. އެކަންކަން ހައްލުކުރާ ވާހަކަ މިއަދު އަޅުގަނޑުމެން މި ދައްކަނީ“
ޣަފޫރު ވިދާޅުވީ ރައްޔިތުންގެ މަޖިލީސް ދެމިއޮންނަނީ ގައުމުގައި ހުރި މައްސަލަ ތަކާއި، ދުނިޔެ ބަދަލުވަމުންދާ ވަރަކަށް މިއަންނަ ބަދަލުތަކާއި އެއްވަރަށް ކަންކަމަށް ހައްލުތަކެއް ހޯދައިދިނުމަށް ކަމަށެވެ. އެކަންކަން ކުރާނީ އޭރެއްގެ އޮންނަ ސަރުކާރަކުން ކަމަށް ޣަފޫރު ވިދާޅުވިއެވެ.
ޣަފޫރު ވިދާޅޫވީ ޕެންޝަންގެ ނިޒާމުގައިވެސް މައްސަލަތަކެއް ހުރިކަން އެނގިވަޑައިގަންނަވާ ކަމަށް ވިދާޅުވިއެވެ. ޑަބަލް ޕެންޝަން ލިބޭ އެތައް ބަޔަކު ގައުމުގައި ތިބިކަން އެނގިވަޑައިގަންނަވާ ކަމަށް ޣަފޫރު ވިދާޅުވިއެވެ. ޣަފޫރު ވިދާޅުވީ އެކަންކަން ހައްލުކުރަން ޖެހޭ ކަމަށެވެ.
