ރައީސް ޑރ. މުހައްމަދު މުއިއްޒާއި އެކު އިހުލާސްތެރިކަމާއި އެކު ދެމި ހުންނަވާނެކަމަށާއި، ހިޔާލުތަފާތުވެ އެކި ދުވަހު އެކި ގޮތަށް ވާހަކަ ދެއްކުންފަދަ އެއްވެސް ކަމެއް ނެތްކަމަށް ރައްޔިތުންގެ މަޖިލީހުގެ ރައީސް އަބްދުއްރަހީމް އަބްދުﷲ ވިދާޅުވެއްޖެއެވެ.
އަބްދުއްރަހީމް މިފަދައިން ވިދާޅުވީ ރައީސް މުއިއްޒު ލ. އަތޮޅުގެ ރަށްތަކަށް ކުރައްވަމުން ގެންދަވާ ދަތުރުފުޅުގެ ތެރެއިން، މިރޭ ފޮނަދޫގައި އޮތް ޖަލްސާގައި ވަހަކަ ދައްކަވަމުންނެވެ. އަބްދުއްރަހީމްގެ އުފަން ރަށް، ފޮނަދޫއަށް ރައީސް މުއިއްޒު ވަޑައިގެންނެވި މިއީ ދެވަނަ ފަހަރެވެ.
މިރޭގެ ޖަލްސާގައި އަބްދުއްރަހީމް ވަނީ، މަޝްރޫއުތަކާއި ޕްރޮޖެކްޓުތައް ކުރިޔަށް ނުދާކަމަށް ބުނެ ސަރުކާރަށް އަމާޒު ކުރާ ފާޑުކިއުންތަކަށް ރައްދު ދެއްވާފަ އެވެ. އަދި ވިދާޅުވީ ސަރުކާރަށް ދަތި ދުވަސްތަކާއި، ކުރިމަތިލާން ޖެހުނީ ބަޔަކު ގަސްދުގައި ވައްޓާލި އަނދަވަޅެއްގެ ސަބަބުން ކަމަށެވެ.
އަބްދުއްރަހީމް ވިދާޅުވީ، މަޝްރޫއުތައް ލަސްވުމުގެ ސަބަބުން ކުރާނެ ޝަކުވާއެއް ނެތް ކަމަށާއި، ރައީސް މުއިއްޒު ވެރިކަމާ ހަވާލުވެވަޑައިގެންނެވިއިރު ގައުމު އޮތް ހާލަތު އެންމެ ރަނގަޅަށް އެނގޭނީ، އެންމެ ގާތުން ކަންކަން ފެނުނު ބަޔަކަށް ކަމަށެވެ. އަދި ވާދަވެރި ސިޔާސީ ފަރާތްތަކުން ތިބީ ގައުމު ބަނގުރޫޓުވެދާނެކަމަށް ބަލައިގެން އެކަމަށް އެދިއެދިކަމަށް އަބްދުއްރަހީމް ވިދާޅުވި އެވެ. އަދި އެއީ މިހާލަތަށް ގައުމު ވައްޓާލި މީހުންކަމަށް އަބްދުއްރަހީމް ފާހަގަކުރެއްވިއެވެ.
ނަމަވެސް ރައީސް މުއިއްޒު ވަނީ ފަހަރަކު ކަންކަން ހައްލު ކުރައްވަމުން ގޮސް، ތަރައްގީގެ މަޝްރޫއުތައް ފައްޓަވާދެއްވާފައި ކަމަށް އަބްދުއްރަހީމް ވިދާޅުވިއެވެ. މި ސަރުކާރަކީ މި މުއްދަތުގެ ތެރޭގައި، ނުވަތަ ދެ އަހަރެއްގެ ތެރޭގައި އެންމެ ގިނަ މަޝްރޫއުތައް ފެށި ހަމައެކަނި ސަރުކާރު ކަމަށާއި، އެކަން ސަރުކާރުގެ މަސައްކަތްތަކާއި، މިހާތަނަށް އިއުލާނުކޮށް ފެށުނު ޕްރޮޖެކްޓުތަކުން އެނގޭނެކަމަށް އަބްދުއްރަހީމް ވިދާޅުވިއެވެ.
ސަރުކާރު އަބަދުވެސް ކުރިޔަށް ދާނީ، ރައްޔިތުންނަށް އެންމެ ފައިދާވާނެ ގޮތަށް ކަމަށް ވެސް އަބްދުއްރަހީމް ވިދާޅުވިއެވެ.
އަބްދުއްރަހީމް ފާހަގަކުރެއްވި ގޮތުގައި، 2023 ނޮވެމްބަރު 17 ގައި އުފެދިގެން އައީ ހެޔޮވެރިކަމެއްގެ ފެށުމެވެ. މިއީ ގައުމުގެ މިނިވަންކަމާއި ސިޔާދަތު ކަށަވަރުވެގެން އައި ދުވަސްކަމަށް ވެސް އަބްދުއްރަހީމް ވިދާޅުވިއެވެ. މިހާތަނަށް ސަރުކާރުން ވަނީ ވަރަށް ބޮޑެތި ކާމިޔާބީތައް ހާސިލުކޮށްފައި ކަމަށާއި، އޭގެ ތެރޭގައި ހިމެނޭ އެންމެ ބޮޑު ކާމިޔާބަކީ ރާއްޖެ ބަނގުރޫޓުވިޔަ ނުދީ ހިފެހެއްޓުންކަމަށް އަބްދުއްރަހީމް ވިދާޅުވިއެވެ.
މިކަން ފާހަގަކުރާނީ ރައީސް މުއިއްޒުގެ އެންމެ ކާމިޔާބު މަސައްކަތްތަކުގެ ގޮތުގައިކަމަށް ވެސް އަބްދުއްރަހީމް ވިދާޅުވިއެވެ.
ފޮނަދޫގައި މިރޭ އެކަނި ވެސް ގިނަ މަޝްރޫއެއް ފެށުމުގެ އެއްބަސްވުމުގައި ސޮއި ކުރެވުނު ކަން ފާހަގަކުރައްވައި އަބްދުއްރަހީމް ވިދާޅުވީ، މި މަސައްކަތްތައް އެއްވެސް ލަސްވުމެއް ނެތި ކުރިޔަށް ގެންދާނެކަމުގެ ޔަގީންކަން އެބައޮތް ކަމަށެވެ. ފޮނަދޫއަކީ ތަރައްގީގެ މަސައްކަތުގެ ތެރޭގައި ހިމެނޭ ރަށެއް ކަމަށާއި، އެގޮތުން އާބަން ސެންޓަރ ތަރައްގީ ކުރާނެ ހަތް ސަރަހައްދެއް އިއުލާނު ކުރިއިރު އޭގެ ތެރޭގައި ފޮނަދޫ ހިމެނޭކަމީ އޭގެ ހެއްކެއްގެ ގޮތުގައި އަބްދުއްރަހީމް ވިދާޅުވި އެވެ.
ފޮނަދޫގެ ރައްޔިތުން އެންމެ ބޮޑަށް ބޭނުންވާކަމަކީ، ޒަމާނީ ރަނގަޅު ފެންވަރެއްގެ ހޮސްޕިޓަލެއް ގާއިމުވެގެން ދިއުން ކަމަށާއި، ރައީސް މުއިއްޒުގެ ވެރިކަމުގެ ދައުރުގައި މިކަން ފުރިހަމަވާނެކަމުގެ ޔަގީންކަން އެބައޮތްކަމަށް އަބްދުއްރަހީމް ވިދާޅުވިއެވެ.
ރައްޔިތުންނާ ގާތުން ހިދުމަތް ކުރާ ވެރިން އެ ރައްޔިތުންނަށް އެ ބޭފުޅެއްގެ މަސައްކަތްތަކުން އެނގޭނެކަން މިރޭގެ ޖަލްސާގައި އަބްދުއްރަހީމް ފާހަގަކުރެއްވި އެވެ. އެގޮތުން ވިއްސާރަ ދުވަސްވަރެއްގައި ވެސް ރައީސް މުއިއްޒު ދަތުރު ކުރައްވަމުން ގެންދަވަނީ ރައްޔިތުންގެ ގާތަށް ކަމަށާއި، މި ދަތުރުތަކުގައި ރައީސް ގެންދަވަނީ ކައުންސިލްތަކާއި ވެސް ބައްދަލު ކުރައްވައި، ކަންކަން އޮޅުންފިލުވުމަށް މަަސައްކަތް ކުރައްވަމުންކަމަށް ވިދާޅުވިއެވެ.
ރަށްތަކަށް އެންމެ ބޭނުންވެފައިވާ ކަންކަމަކީ ކޮބައިތޯ، ބައްލަވައި ރައްޔިތުންނަށް ހިތްހަމަޖެހުމެއް ލިބޭނެ ޖަވާބުތަކެއް ރައީސް ވަނީ ދެއްވާފައިކަމަށް އަބްދުއްރަހީމް ވިދާޅުވި އެވެ.
މީގެއިތުރުން އަބްދުއްރަހީމް ވިދާޅުވީ، ސަރުކާރާ އެކު ކުރިޔަށް ދިއުމަށް ފޮނަދޫގެ ރައްޔިތުން ހަވާލު ކުރައްވާފައި ވަނީ ބޮޑު މަސްއޫލިއްޔަތެއް ކަމަށެވެ. އެއަށް ފަހު އަބްދުއްރަހީމް ދެއްވީ، ދެބަސްވުމާއި ހިޔާލުތަފާތުވުމެއް ނެތި ސަރުކާރާއި އެކު ދެމިތިބޭނެކަމުގެ ޔަގީންކަމެވެ.
އަބްދުއްރަހީމް ވިދާޅުވީ އެކި މަންސަތަކުގައި، ތަފާތު އެކި ގޮތްގޮތަށް ވާހަކަ ދެއްކުމެއް ނެތްކަމަށެވެ. އަދި އެކި ދުވަހު، އެކި ގޮތަށް ވާހަކަ ދައްކަވަމުން ނުދާކަމަށް ވެސް ވިދާޅުވި އެވެ. އެހެންކަމުން މި ސަރުކާރާއި އެކު އިހުލާސްތެރިކަމާއި އެކު ދެމިހުންނަވާނެކަމަށް އަބްދުއްރަހީމް ވިދާޅުވި އެވެ.
އިރާދަކުރެއްވިއްޔާ މަނިކުފާނަށް އަޅުގަނޑުމެންގެ ފަރާތުން ފެންނާނީ އިހުލާސްތެރިކަން.. ތެދުވެރިކަން.. ހިޔާލުތަފާތުވުމެއް އަޅުގަނޑުމެންގެ ނެތޭ.. އަޅުގަނޑުމެން ތިބޭނީ އެ ތިބި ގޮތެއްގައި ސާބިތުވެގެން.. އެކި ދުވަހު، އެކި ގޮތަށް، އެކި ތަންތަނުގައި ވާހަަކަ ދައްކަމުންނެއް އަޅުގަނޑުމެންނެއް ނުދާނަން.. އަޅުގަނޑާއި ފޮނަދޫގެ ރައްޔިތުން ހަވާލުކުރި މަސްއޫލިއްޔަތު އަދާކުރާނީ އެ ރައްޔިތުން ބޭނުންވާ ގޮތަށް
އަބްދުއްރަހީމް ވަނީ، ރައްޔިތުންގެ ގާތުން ވެރިކަން ކުރައްވައި، ރައްޔިތުންގެ ކަންކަން ކުރިޔަށް ގެންދިއުމަށް މަސައްކަތް ކުރައްވާ ރައީސް މުއިއްޒު ފަދަ ވެރިއެއް ނެތް ކަމަށް ވެސް ވިދާޅުވެފައެވެ.
އަބްދުއްރަހީމް ވިދާޅުވީ ތަރައްގީއާއި، ވައުދުގެ ލިސްޓު ދިގު ކަމަށެވެ. އެއާއި އެކު ސަރުކާރުން މިހުރިހާކަމެއް ވެސް އެންމެ ރަނގަޅު ގޮތުގައި ފުރިހަމަ ކުރުމަށްޓަކައި މަސައްކަތް ކުރަމުންގެންދާކަމަށް ވިދާޅުވި އެވެ.
