ފަސް ރަށެއްގައި ވަގުފު އިމާރާތްތައް އަޅަން އިންވެސްޓުކުރުމަށް ނިންމާފައިވާ ކަމަށް އިސްލާމިކް މިނިސްޓަރު ޑރ. މުޙައްމަދު ޝަހީމް އަލީ ސައީދު މިއަދު ވިދާޅުވެއްޖެއެވެ.
ސޯޝަލްމީޑިއާގައި ޝަހީމް ކުރެއްވި ޕޯސްޓެއްގައި ވިދާޅުވީ އިސްލާމީ ޚިދުމަތަށް ބޭނުންވާ ފުރިހަމަ މާލީ ނިޒާމެއް ގާއިމުކުރުމަށްޓަކައި އިސްލާމީ ޙަޟާރަތުގައި މުހިންމު ދައުރެއް އަދާކުރި ވަގުފު ނިޒާމު ފުޅާކުރުމަށް ރައީސް ޑރ. މުޙައްމަދު މުއިއްޒު އިއުލާނުކުރެއްވި ސިޔާސަތުގެ ދަށުން ފަސް ރަށެއްގައި ވަގުފު މަޝްރޫއު ކުރިއަށްގެންދާނެ ކަމަށެވެ.
އެ ރަށްތަކަކީ، އައްޑޫ ސިޓީއާއި ފުވައްމުލައް ސިޓީއާއި ތިނަދޫ ސިޓީއާއި ކުޅުދުއްފުށި ސިޓީގެ އިތުރަށް ގއ. ވިލިނގިއްޔެވެ. އެ ރަށްތަކުގައި ވަގުފު އިމާރާތްތައް އެޅުމަށް އިންވެސްޓުކުރާނެކަން މިނިސްޓަރު ފާހަގަކުރެއްވިއެވެ.
އައްޑޫއަށް 23 މިލިއަން އިންވެސްޓުކުރާއިރު، ފުވައްމުލައް ސިޓީގައި އިމާރާތްކުރާ ވަގުފު ޕްރޮޖެކްޓަށް 15 މިލިއަން އިންވެސްޓުކުރާނެކަމަށް ޝަހީމް ވިދާޅުވިއެވެ. އަދި، ތިނަދުއާއި ކުޅުދުއްފުށީގެ އިތުރުން ވިލިނގިލީގައި އަޅާ ވަގުފު އިމާރާތަށް 10 މިލިއަން ޚަރަދުކުރުމަށް ވަނީ ނިންމާފައެވެ.
އެހެންކަމުން ޖުމުލަ މި މަޝްރޫއުތަކަށް 68 މިލިއަން ޚަރަދުވާނެއެވެ. އެ ތަނުން ލިބޭ ނަފާ ޚަރަދު ކުރާނީ ގުރުއާނުގެ އިލްމު ފެތުރުން ހިމެނޭ ގޮތަށް އެ ސިޓީތަކުގެ އިސްލާމީ ކަންކަމަށް ކަމަށް ޝަހީމް ވިދާޅުވިއެވެ.
މާލެ ސަރަހައްދުގައި ދެ މަޝްރޫޢެއް ކުރިއަށް ގެންދާނެ ކަމަށާއި އޭގެ ނަފާ މުޅި ރާއްޖެއަށް ލިބޭނެ ކަމަށް މިނިސްޓަރު ވަނީ ވިދާޅުވެފައެވެ. މި ހުރިހާ މަޝްރޫއެއްގެ އަމަލީ މަސައްކަތް ލަސްވެގެން އަންނަ ޖަނަވަރީގައި ފެށޭނެކަން ޝަހީމް ފާހަގަކުރެއްވިއެވެ.
