ކަށިމިޔަރުގެ މަސްވެރިކަން ކުރުމަކީ ވަރަށް ރަނގަޅަށް ބަލަހައްޓަން ޖެހޭނެ ކަމެއް ކަމަށާއި، އެހެން ނޫން ނަމަ އެއީ ކުރަން ހެޔޮވާވަރުގެ ކަމެއް ނޫންކަމަށް ވައިކަރަދޫ ދާއިރާގެ މެމްބަރު ހުސައިން ޒިޔާދު ވިދާޅުވެއްޖެއެވެ.
ރާއްޖޭގައި މިޔަރު ހިފުމަށާއި މިޔަރުގެ މަސްވެރިކަމަށް ފުރުސަތު ނުދިނުމަށް ގޮވާލައި ހުށަހަޅާފައިވާ ޤަރާރަށް ބަހުސް ކުރައްވަމުން މެމްބަރު ވިދާޅުވީ، މިއީ ހަގީގަތުގައިވެސް މުހިއްމު ޤަރާރެއް ކަމަށާއި، ޤަރާރުގައި ހިމެނޭ ކަންކަމާމެދު ފުންކޮށް ވިސްނަންވެސް ޖެހޭނެ ކަމަށެވެ.
މީގެ އިތުރުން، މި މައްސަލައިގައި އެމްޑީޕީން ވަކި ސްޓޭންޑެއް ނަގާފައިވާކަމަށް ދެކެވޭ ވާހަކަތަކަށް ރައްދު ދެއްވައި މެމްބަރު ވިދާޅުވީ، ސިޔާސީ ބޭފުޅުން ވާހަކަ ދައްކަވާއިރު އެއް ފަހަރު ދައްކަވާ ވާހަކަ ފަހުން ބަދަލުވެސް ވާ ކަމަށެވެ. އެގޮތުން މި ދައްކަނީ ތިމާވެށީގެ ވާހަކަ ކަމަށާއި، އަބަދު އެއްގޮތަކަށް ކަންކަންވެސް ނޯންނާނެކަމަށް މެމްބަރު ވިދާޅުވިއެވެ.
މެމްބަރު ޒިޔާދު އިތުރަށް ވިދާޅުވީ، ކޮވިޑް-19 ގެ ޙާލަތަށް ބަލާއިރު ދަސްވެގެންދާ އެއް ފިލާވަޅަކީ އެއް އިޤްތިސާދަކަށް ބަރޯސާވެގެން ތިބެވެން ނެތްކަން ކަމަށެވެ. އޭރު ފަތުރުވެރިކަން ހުއްޓުމުން މުޅި ޤައުމު ހުއްޓޭ ހިސާބަށް ގޮސްގެން ނުވާނެ ކަމަށާއި، އިތުރު އިޤްތިސާދީ ދާއިރާތައް މި ޤައުމުގައި ހުންނަން ޖެހެނީވެސް އެ ސަބަބާހުރެކަމަށް މެމްބަރު ވިދާޅުވިއެވެ.
މީގެ އިތުރުން، މިޔަރުގެ މަސްވެރިކަން މީގެ ކުރިން ހުއްޓާލީ ބޭރުގެ ޤައުމުތަކާއި ކަމާ ގުޅުންހުރި ފަރާތްތަކާ މަޝްވަރާ ކުރުމަށްފަހު ކަމަށާއި، އޭރު އެކަމުގެ ނަތީޖާވެސް ރަނގަޅުކަމަށް މެމްބަރު ވިދާޅުވިއެވެ. އަދި މިހާރު އަލުން އެކަން ކުރަން ބަލާއިރު، އެކަށީގެންވާ ރަނގަޅު އުސޫލުތަކެއް ހުންނަންޖެހޭނެކަމަށް މެމްބަރު ވިދާޅުވިއެވެ.
ކަނޑުމަތީގައި ކުރާ މަސްވެރިކަމެއްގެ ވާހަކަ އަޅުގަނޑުމެން މި ދައްކަނީ، އަޅުގަނޑު މި ދަންނަވަނީ މިއީ ވަރަށް ރަނގަޅަށް ބެލެންޏާ މެނުވީ ކުރަން ހެޔޮވާވަރުގެ ކަމެއް ނޫނޭ
މެމްބަރު އިތުރަށް ވިދާޅުވީ، އަބަދުވެސް ވިސްނަން ޖެހޭނީ ތިމާވެއްޓާ އެއް ހަމައެއްގައި ކަމަށެވެ. އެގޮތުން ފަޅުތަކާއި ކަނޑުތައް ހިއްކުމުގައިވެސް ވަކި އުސޫލުތަކެއް ގެންގުޅެން ޖެހިފައިވާކަން މެމްބަރު ފާހަގަ ކުރެއްވިއެވެ. އެހެންކަމުން މި ހުރިހާ ކަންކަމާ ގުޅޭގޮތުން އިލްމީ ދިރާސާތަކެއް ކުރުން މުހިއްމުކަމަށް މެމްބަރު ވިދާޅުވިއެވެ.
ކަށިމިޔަރުގެ މަސްވެރިކަން ކުރަން އެންމެ ގިނަވެގެން ހުއްދަ ދެވޭނީ 40 އުޅަނދަށް ކަމަށް ކަނޑައަޅައި ކަށިމިޔަރުގެ މަސްވެރިކަން ރާވައި ހިންގައި ބެލެހެއްޓުމާބެހޭ ގަވާއިދު އާންމުކޮށް ދާދި ފަހުން ވަނީ އަމަލުކުރަން ފަށާފައެވެ.
ގަވައިދުގައިވާ ގޮތުން ލައިސަންސްގެ މުއްދަތަކީ ކޮންމެ އަހަރެއްގެ ނޮވެންބަރު މަހުގެ ފުރަތަމަ ދުވަހުން ފެށިގެން ޖެހިގެން އަންނަ އަހަރުގެ އޮކްޓޫބަރު މަހުގެ ނިޔަލެވެ. ލައިސަންސް އައުކުރަން ހުށަހަޅައިފައިނުވާ ނަމަ ހުސްވާ ޖާގައަށް ލައިސަންސް ދޫކުރެވޭނީ ދަފުތަރުގައިވާ ތަރުތީބުން ކަމަށް ވެސް ގަވައިދުގައިވެއެވެ.
ކަށިމިޔަރުގެ މަސްވެރިކަމުގެ ހަރަކާތްތައް ހިންގަން ހުއްދަ ދީފައިވަނީ އަތޮޅުދުނިން ބޭރުގެ ސަރަހައްދުތަކުގައެެވެ. އަދި ކަަށިމިޔަރުގެ މަސްވެރިކަން ކުރެވޭނ،ީ މިނިސްޓްރީން ކަނޑައަޅާ އިޢުލާނުކުރާ ގޮތެއްގެ މަތީން ކޮންމެ އަހަރަކު ހަތް މަސްދުވަހަށް ވުރެ ދިގު ނޫން މުއްދަތަކަށެވެ.
މީގެ އިތުރުން ކަށިމިޔަރާއި ކަށިމިޔަރުގެ އުފެއްދުންތައް އެކްސްޕޯޓުކުރާ ފަރާތްތަކުން ކަށިމިޔަރު ގަންނަންވާނ،ީ މަސްވެރިކަން ކުރުމުގެ ނުވަތަ ޕްރޮސެސްކުރުމުގެ ނުވަތަ ސަޕްލައިކުރުމުގެ ލައިސަންސެއް ލިބިފައިވާ ފަރާތަކުންނެވ.ެ މި ގަވައިދާ ހިލާފުވާ ފަދަ ކަމެއް ކޮށްފިނަމަ 400،000 ރުފިޔާއާ ހަމައަށް ޖޫރިމަނާ ވެސް ކުރެވެއެވެ. އެގޮތުން ކަށިމިޔަރުގެ މަސްވެރިކަމުގައި ކަށިމިޔަރު ފިޔަވައި އެހެން އެއްވެސް ބާވަތެއްގެ މިޔަރަކަށް އަމާޒުކޮށް މަސްވެރިކަންކޮށްފި ނަމަ 100،000 ރުފިޔާއާ ހަމައަށް ޖޫރިމަނާ ކުރެެވެއެވެ.
