ސަރުކާރުން ދާދިފަހުން 206 އެއްބަސްވުމުގައި ސޮއިކުރުމަށް ބޭއްވި ރަސްމިއްޔާތަކީ އެއީ ރާއްޖޭގައި ދުވަހަކުވެސް ނުފެންނަ ވަރުގެ ބޮޑު ލޫޓުވުމެއްގެ ލައިވް މަންޒަރު ކަމަށް ކުރީގެ ފިނޭންސް މިނިސްޓަރ އިބްރާހިމް އަމީރު ވިދާޅުވެއްޖެއެވެ.
އެމްޑީޕީގެ ގައުމީ މަޖިލީހުގައި ވާހަކަފުޅު ދައްކަވަމުން އަމީރު މިފަދައިން ވިދާޅުވީ، ރަސްމިއްޔާތުގެ ތެރެއިން 200 އަށްވުރެ ގިނަ މަޝްރޫޢުގެ އެއްބަސްވުމުގައި ސޮއިކޮށްފައިވާތީ، އެކަމަށް ފާޑުވިދާޅުވަމުންނެވެ.
އަމީރު ވިދާޅުވީ، 2.7 ބިލިއަން ރުފިޔާގެ ޕްރޮޖެކްޓުތައް ކޮންޓްރެކްޓަރުންނަށް ހަވާލު ކުރީ މާލިޔަތު ގަވައިދަށް އިސްލާހު ގެނެސްގެން ކަމަށް އެންމެންވެސް ގަބޫލުކުރާ ކަމަށެވެ. އޭނާ އިތުރަށް ވިދާޅުވީ، ގާނޫނެއް ހަދައިގެން ނުވަތަ ގަވައިދެއް ބަދަލުކޮށްގެން ކަމުގައިވިޔަސް، ވާދަވެރިކަމެއް ނެތް އަދި ހާމަކަމެއް ނެތް ސިއްރު ގޮތެއްގައި ރައްޔިތުންގެ ފައިސާ ބަހާނުލެވޭނެ ކަމަށެވެ.
އަމީރު މިސާލު ނަންގަވައި ވިދާޅުވީ، ރައީސް މުއިއްޒުގެ ސަރުކާރުން ހުރިހާ ޕްރޮޖެކްޓެއް ކޮންމެވެސް ބޮޑު ކުންފުންޏަކަށް ދޭން ނިންމިޔަސް އެކަން އެހެން ނުވާނެ ކަމަށާއި، އެފަދަ ކަމެއް ހިނގިޔަސް އެއީ ސައްހަ ނިންމުމަކަށް ނުވާނެ ކަމަށެވެ.
އަމީރު ފާހަގަކުރެއްވި ގޮތުގައި، ކުރީގެ ހުރިހާ ސަރުކާރުތަކުން ވެސް ޕްރޮޖެކްޓުތައް ދިނީ ވާދަވެރި ބީލަމަށް ހުށައަޅައިގެންނެވެ. އޭރު ބީލަމުގެ ޑޮކިއުމަންޓުތަކުގައި ވެސް ޕްރޮޖެކްޓުތަކަށް ކުރިމަތި ލެވޭނެ ކުންފުނިތަކުގެ ޝަރުތުތައް ބަޔާންކޮށްފައި ހުރެއެވެ.
”މިސާލަކަށް 100 މިލިއަން ރުފިޔާގެ ޕްރޮޖެކްޓަކަށް ކުރިމަތި ލެވޭނީ ޝަރުތު ހަމަވާ ބަޔަކަށް. ހައުސިންގ މިނިސްޓްރީގެ އެބްސައިޓުގައި މިހާރުވެސް އެބަހުރި އެ ގަވައިދުތައް،“ އަމީރު ވިދާޅުވިއެވެ.
އޭނާ ތުހުމަތުކުރެއްވި ގޮތުގައި މިހާރު ޕްރޮޖެކްޓުތައް ބޭނުންވާ ބަޔަކަށް ދިނީ ކޮންސްޓްރަކްޝަންގެ ގަވާއިދާއި ހިލާފަށް ކަމަށާއި، އެއްވެސް ކޮންސްޓްރަކްޝަން މަސައްކަތެއް ނުކުރާ ކުންފުނިތަކަށް ވެސް ޕްރޮޖެކްޓުތައް އެވޯޑުކޮށްފައިވާ ކަމަށެވެ.
އަމީރު ވަނީ އެމްޑީޕީގެ ސަރުކާރުގައި ވެސް ޕްރޮޖެކްޓުތައް އެވޯޑުކުރި ކަމަށް ވިދާޅުވެފައެވެ. ނަމަވެސް އެކަން ކުރި ގޮތުގެ ތަފްސީލް ފިނޭންސް މިނިސްޓްރީގެ ވެބްސައިޓުގައި މިހާރުވެސް ފެންނަން ހުރި ކަމަށް އޭނާ ވިދާޅުވިއެވެ. އެގޮތުން، އެމްޑީޕީ ސަރުކާރުގައި ކަންކަން ކުރީ ވާދަވެރި ބީލަމެއްގެ ތެރެއިން ހާމަކަން ބޮޑުގޮތަކަށް ކަމަށް އަމީރު ފާހަގަކުރެއްވިއެވެ. އަމީރުގެ މި ބަސްފުޅުތަކަކީ ސަރުކާރުގެ ބޮޑެތި މަޝްރޫޢުތައް ހިންގުމުގައި ގެންގުޅޭ އުސޫލުތަކާމެދު ސިޔާސީ ދާއިރާގައި ބަހުސް އާވެގެންދާނެ ކަމެއް ކަމަށް ބެލެވެއެވެ.
