ސަރުކާރު ހިއްސާވާ ކުންފުނިތަކުން ފެންވަރު ރަނގަޅު ރިސޯޓުތަކެއް ތަރައްގީކޮށްފިނަމަ، އެކަމުގެ ސަބަބުން ގައުމަށް ލިބޭ ފައިދާ ބޮޑުވާނެ ކަމަށް ރައްޔިތުންގެ މަޖިލީހުގެ ކެންދޫ ދާއިރާގެ މެމްބަރު މައުރޫފު ޒާކިރު ވިދާޅުވެއްޖެއެވެ.
މައުރޫފު މިހެން ވިދާޅުވީ، ގާނޫނު ނަމްބަރު 2/99 (ދިވެހިރާއްޖޭގެ ޓޫރިޒަމާ ބެހޭ ގާނޫނު)އަށް އިސްލާހު ގެނައުމުގެ ބިލާ ގުޅޭގޮތުން އިގުތިސާދީ ކޮމިޓީން ނިންމި ރިޕޯޓަށް ރައްޔިތުންގެ މަޖިލީހުގެ ތަޅުމުގައި ބަހުސްކުރައްވަމުންނެވެ.
މެމްބަރު މައުރޫފު ފާހަގަކުރެއްވި ގޮތުގައި، ޓޫރިޒަމާ ބެހޭ ގާނޫނަށް ހުށަހެޅިފައިވާ އިސްލާހުތަކުން މައިގަނޑު ގޮތެއްގައި ހާސިލުކުރެވެނީ ދެ ކަމެކެވެ. އޭގެ ތެރެއިން އެއްކަމަކީ، ޓޫރިސްޓު ރިސޯޓު ހެދުމަށް، ސަރުކާރު ހިއްސާވާ ކުންފުނިތަކަށް، ކުއްޔަށް ދޫކުރެވޭ ގޮތަށް ގާނޫނަށް ބަދަލު ގެނައުމެވެ. މި ބަދަލާއިއެކު، ސަރުކާރުގެ 45 އިންސައްތައިގެ ހިއްސާ އޮންނަ ކުންފުނިތަކަކީ، ރިސޯޓު ތަރައްގީ ކުރުމަށް ސަރުކާރުން ދޫކުރެވޭ ކުންފުނިތަކުގެ ގޮތުގައި މި ގާނޫނު ބަދަލުކުރެވެއެވެ.
މައުރޫފު ވިދާޅުވީ، މީގެ ކުރިންވެސް ސަރުކާރު ހިއްސާވާ ކުންފުނިތަކުން ފަތުރުވެރިކަމުގެ ސިނާއަތުގައި ވިޔަފާރި ކުރުމަށް ގިނަ މަސައްކަތްތަކެއް ކޮށްފައިވާ ކަމަށެވެ. ނަމަވެސް، ޓޫރިޒަމް ދާއިރާ ތަރައްގީކޮށް ވިޔަފާރިކުރުމުގައި ޕްރައިވެޓް ސެކްޓަރގެ ކުންފުނިތަކަށް ލިބިފައިވާ ކާމިޔާބީ، ސަރުކާރު ހިއްސާވާ ކުންފުނިތަކަށް ހޯދިފައިނުވާކަން އެންމެންވެސް ގަބޫލުކުރަންޖެހޭ ހަގީގަތެއް ކަމަށް އޭނާ ފާހަގަކުރެއްވިއެވެ. އަދި އެކަމުގެ ފަހަތުގައިވާ ހަގީގަތަށް ވިސްނާ ފިކުރު ކުރުން މުހިއްމު ކަމަށްވެސް މައުރޫފު ވިދާޅުވިއެވެ.
މައުރޫފު އިތުރަށް ވިދާޅުވީ، ރާއްޖޭގެ ޕްރައިމަރީ އިންޑަސްޓްރީއަކީ ފަތުރުވެރިކަމުގެ ސިނާއަތް ކަމަށާއި، މި ސިނާއަތުގެ މުޅި ކޮންޓްރޯލް އޮތީ ހަމައެކަނި ޕްރައިވެޓް ސެކްޓަރއަށް ދޫކޮށްލެވިފައި ކަމަށެވެ. އޭނާ ވިދާޅުވީ، ދުނިޔޭގެ ގިނަ ގައުމުތަކުގައި ޕްރައިމަރީ އިންޑަސްޓްރީގެ ބާރު ސަރުކާރުގެ ތެރޭގައި ބޭއްވުމަކީ އާންމުކޮށް ކޮށް އުޅޭ ކަމެއް ކަމަށެވެ.
މައުރޫފު ގަބޫލުކުރައްވާ ގޮތުގައި، ސަރުކާރު ހިއްސާވާ ކުންފުނިތަކުން ރަނގަޅު ރިސޯޓުތަކެއް ތަރައްގީކުރެވޭ ކަމުގައިވާނަމަ، އޭގެން ގައުމަށް ލިބޭ ފައިދާ ބޮޑުވާނެއެވެ. އަދި، އެ ކުންފުނިތަކުގައި މަސައްކަތް ކުރާ މުވައްޒަފުންނަށްވެސް ނުސީދާ މަންފާތައް ލިބިގެންދާނެ ކަމަށް މެމްބަރު މައުރޫފު ޒާކިރު ވިދާޅުވިއެވެ.
