ޒަކާތުގެ މަސައްކަތް ރަނގަޅު ގޮތުގައި ކޮށްފިކަމުގައިވާނަމަ، އެއީ މި ޒަމާނުގައި ރާއްޖެއަށް ބޭނުންވާ ކަމެއް ކަމަށް ކަމަށް ރަޔިތުންގެ މަޖިލީހުގެ ވައިކަރަދޫ ދާއިރާގެ މެމްބަރު ހުސައިން ޒިޔާދު ވިދާޅުވެއްޖެއެވެ.
މެމްބަރު ޒިޔާދު މިހެން ވިދާޅުވީ، ރައްޔިތުންގެ މަޖިލީހުގެ ޖަލްސާގައި، ޒަކާތު ބިލު، އިޖުތިމާއީ ކޮމިޓީން ދިރާސާކޮށް، ނިންމި ގޮތުގެ ރިޕޯޓު މަޖިލީހަށް ހުށަހެޅުމަށްފަހު، އެ ބިލާ ބެހޭގޮތުން ބަހުސްކުރައްވަމުންނެވެ.
ޒިޔާދު ވަނީ ޒަކާތު ބިލުގެ ނަމުގައި ރައްޔިތުންގެ މަޖިލީހަށް ފޮނުވައިފައިވާ، އިޖުތިމާއީ ކޮމިޓީން ފޮނުވައިފައި އޮތް ރިޕޯޓަށް ތާއިދުކުރައްވާ ކަމަށް ހާމަކުރައްވާފައެވެ. އޭނާ ގަބޫލުކުރައްވާ ގޮތުގައި، މި ވަގުތަށް، މި ޒަމާނަށް ބަދަލުތައް އަންނަމުންދާއިރު، ކޮންމެހެން ގާނޫނެއް ހަދަން ނުޖެހޭ ކަހަލަ ކަންކަންކަމުގައި ދެކެވުނުކަމުގައިވީނަމަވެސް، މި ބާވަތުގެ ކަންތައްތަކުގައި ގާނޫނެއް ހަދައިގެން، އުސޫލެއްގެ ތެރެއިން، މިކަން ކުރުން އެއީ އެންމެ ރަނގަޅު ގޮތެވެ.
މެމްބަރު ޒިޔާދު ފާހަގަކުރެއްވި ގޮތުގައި، ދިވެހީންނަކީ ފިތުރު ޒަކާތަށް ޝައުގުވެރި އަދި ސަމާލުކަންދޭ ބައެކެވެ. އެހެންނަމަވެސް، މުދަލު ޒަކާތުގައި ކޮންމެވެސް ވަރެއްގެ މައުލޫމާތާއި ހޭލުންތެރިކަމުގެ މައްސަލަ އޮތްކަން ގަބޫލުކުރެވެއެވެ. އެހެންކަމުން، ޒަކާތާއި ބެހޭ ގާނޫނެއް އުފައްދާއިރު، މި ގާނޫނުގެ ދަށުން އުފެދިގެން އަންނަ މުއައްސަސާގެ އެންމެ އިސް ވާޖިބެއްގެ ގޮތުގައި ވާންޖެހޭނީ، މުދަލު ޒަކާތާއި ބެހޭ ގޮތުން، ރައްޔިތުންގެ މެދުގައި ހޭލުންތެރިކަން އިތުރުކޮށް، އެކަމަށް ބާރުއެޅުން ކަމަށް އޭނާ ވިދާޅުވިއެވެ.
މީގެ އިތުރުން، އެ މުވައްސަސާއިން ޒަކާތް ލިބޭ ފަރާތްތަކަށް ނުވަތަ އެ މުދަލުގެ ހައްގުވެރިންނަށް، އެ މުދާތައް ރައްކާތެރިކަމާއިއެކު ފޯރުކޮށްދިނުންވެސް މުހިއްމުކަމަށް ޒިޔާދު ފާހަގަކުރެއްވިއެވެ. މި ދެ ޒިންމާ އުފުލުމަށް ޒަކާތު ހައުސްއާއި ކޮމިޓީއެއް ނެގިގެން ދާނެ ކަމަށާއި ގާނޫނެއްވެސް އުފެދިގެން އަންނަ ކަމަށް އޭނާ ވިދާޅުވިއެވެ.
ނަމަވެސް، ކޮންމެ ކަމެއް ކުރާއިރުވެސް ސަމާލުކަން ދޭންޖެހޭ ކަންކަން ހުންނަ ކަމަށް ޒިޔާދު ވިދާޅުވިއެވެ. އެގޮތުން، މުވައްސަސާތައް ގިނަވެ، މުވައްޒަފުން ގިނަކޮށްގެން ބައެއް ހާލަތްތަކުގައި އެއީ ނަތީޖާ ނެރެވޭ ކަންކަމެއް ނޫނެވެ. އެހެންކަމުން، މި ޒަކާތުގެ ބިލުގެ ދަށުން އުފެދިގެން އަންނާނެ މުވައްސަސާއަކީ، ނަތިޖާ ހާސިލު ނުކުރެވޭ މުވައްސަސާއަކަށް ނުވުމަށް ވިސްނުން އެއީ ބުއްދިވެރި ކަމެއްގެ ގޮތުގައި ޒިޔާދު ފާހަގަކުރެއްވިއެވެ.
ޒިޔާދު ވިދާޅުވީ، އެކަށީގެންވާ އަދި ގާބިލު ބޭފުޅުން އެ މުވައްސަސާއަށް އައްޔަނުކޮށް، ޒަކާތުގެ މަސައްކަތް ރަނގަޅު ގޮތުގައި ކޮށްފިކަމުގައިވާނަމަ، އެއީ މި ޒަމާނުގައި ރާއްޖެއަށް އަންނަން ޖެހޭ ކަމެއް ކަމަށާއި، މި ބިލުގެ މަސައްކަތް ކުރިއަށް ގެންދިއުމަށް އޭނާ ތާއީދުކުރައްވާ ކަމަށެވެ.
