މަޝްހޫރު ”އަރާކުރި ސީރީސް“ ގެ 47 ވަނަ ފޮތް ”ދިވެހީންގެ ވަތަން“ ނެރެފި އެވެ.
މި ފޮތަކީ ދިވެހިރާއްޖޭގެ ތާރީޚާއި، ސަގާފަތާއި، އާދަކާދައަށް އަލިއަޅުވައިލާ، ޤައުމިއްޔަތުގެ ރޫޙު އާލާކުރުމަށް އެކުލަވާލާފައިވާ މުހިންމު ލިޔުމެކެވެ.
މި ސީރީސްގެ މުޞައްނިފަކީ ދިވެހި އަދަބިއްޔާތަށް ގިނަ ޚިދުމަތްތަކެއް ކުރައްވާފައިވާ ޢާއިލާއަކަށް ނިސްބަތްވާ ޙުސްނާ ފަހްމީއެވެ. ޙުސްނާ ފަހްމީއަކީ މަޝްހޫރު ޝާއިރު އަދި އަދީބު ޢަލީ ޙުސައިން ދީދީއަށް ކާފަވިދާޅުވާ ބޭފުޅެކެވެ. އެކަމަނާގެ ބައްޕާފުޅު ޙުސައިން ފަހްމީއަކީ ވެސް ދިވެހި އަދަބިއްޔާތަށް، ޚާއްޞަކޮށް ޅެންވެރިކަމުގެ ދާއިރާއިން، އެތައް ޚިދުމަތެއް ކުރައްވާފައިވާ ބޭފުޅެކެވެ. މީގެ އިތުރުން ދިވެހި އަދަބިއްޔާތުގައި ކުޅަދާނަ ޝާއިރު އަދި އަދީބު، ޢަބްދުﷲ ޖަލާލުއްދީން (ޢަބްދުﷲ ފަހްމީ ދީދީ) އަކީ ޙުސްނާގެ ބޮޑުބޭބޭފުޅެވެ.
ޙުސްނާ ފަހްމީއަކީ ރާއްޖޭގެ ތަޢުލީމީ ދާއިރާގައި 42 އަހަރަށް ވުރެ ގިނަ ދުވަހު އިޚުލާޞްތެރި ޚިދުމަތްތަކެއް ކޮށްދެއްވާފައިވާ ފަރާތެކެވެ. އަދި މެދުނުކެނޑި 37 އަހަރަށް ވުރެ ގިނަ ދުވަހު ދިވެހި ދައުލަތަށް ޚިދުމަތްކުރައްވާފައި ވާތީ، 2021 ވަނަ އަހަރު ރައީސުލްޖުމްހޫރިއްޔާ ދެއްވާ ދައުލަތަށް ގިނަ ދުވަހު ޚިދުމަތް ކުރުމުގެ އިނާމު އެކަމަނާއަށް ލިބިވަޑައިގެންފައިވެއެވެ. މީގެ އިތުރުން ”އިޖުތިމާޢީ ގޮތުން ބާރުވެރިކުރުވުން“ މި ރޮނގުން 2023 ވަނަ އަހަރު ”ރެހެންދި އެވޯޑް“ ވެސް ޙުސްނާ ފަހްމީއަށް ލިބިވަޑައިގެންފައިވެއެވެ. އަދި ދިވެހި އަދަބިއްޔާތުގެ ދާއިރާއިން ދިވެހިބަހުން ފޮތްލިޔެ އެކުލަވައިލުމާއި، ޝާއިޢުކުރުމުގެ ރޮނގުން ހިތްވަރުދިނުމުގެ ޤައުމީ އިނާމު، 2025 ވަނައަހަރު އެކަމަނާއަށް ލިބިވަޑައިގެންފައިވާ ކަމަށް ވަނީ ހާމަވެފައެވެ.
ޙުސްނާ ވިދާޅުވި ގޮތުގައި ”ދިވެހީންގެ ވަތަން“ ނެރުމުގެ ޚިޔާލު އުފެދުނީ 2024 ވަނަ އަހަރު ރާއްޖޭގެ ސްކޫލްތަކުގައި ”ޤައުމިއްޔަތު“ މާއްދާއެއް ކިޔަވައިދެއްވަން ދިވެހި ސަރުކާރުން އިޢުލާންކުރެއްވުމާ ގުޅިގެންނެވެ. އެ ޚިޔާލު އުފެދުމާގުޅިގެން ނެރެއްވި މި ފޮތަކީ ކިޔަވާ ކުދިންނަށާއި، ދިރާސާތައްކުރައްވާ ފަރާތްތަކަށް ވެސް ވަރަށް މުހިންމު ބޭނުންތެރި މަޢުލޫމާތު މުއްސަނދި ފޮތަކަށް ވެގެންދާނެކަމަށް ފޮތުގެ މުޞައްނިފު އުންމީދުކުރައްވައެވެ.
”އަރާކުރި ސީރީސް“ އަކީ ދިވެހިބަހުގެ ހަތަރު ހުނަރަށް އަމާޒުކޮށްގެން ނާސަރީ ކުދިންނަށް ޚާއްޞަކުރެވުނު ދަސްކުރާ ފޮތްތަކުން ފެށިގެން ޕްރައިމަރީ އަދި މެދުމަދަރުސީ ގްރޭޑްތަކުގެ ކުދިންނަށް ޚާއްޞަކޮށްގެން ފޮތްތައް ނެރެމުންދާ ސީރީސްއެކެވެ. މި ސީރީސްގައި މަޖާ ޢިބްރަތްތެރި ވާހަކަތަކާއި، މަސައްކަތު ފޮތްތަކާއި، ކިޔުމުގެ ދޭހައިގެ ފޮތްތަކާއި އަދި އުފެއްދުންތެރި ލިޔުމުގެ ފޮތްތައް ހިމެނެއެވެ. މި ސީރީސްގައި މިހާރު 47 ފޮތް މުޖުތަމަޢަށް މިވަނީ ނެރެވިފައެވެ.
”ދިވެވެހީންގެ ވަތަން“ މި ފޮތަކީ ދިވެހިރާއްޖޭގެ ތާރީޚާއި ސަގާފަތާ އާދަކާދައާބެހޭ ގޮތުން އެންމެ ގިނަ މަޢުލޫމާތު އެއްފޮތަކުން މިހާތަނަށް ގެނެސްދެވިފައިވާ ހަމައެކަނި ފޮތެވެ. އަދި މަޢުލޫމާތާ އެކު ކުލަ ފޮޓޯތައް ހިމަނުއްވާފައި ވުމުން މި ފޮތަށް ފޮތުގެ މުޞައްނިފު އެ ވަނީ އިތުރު ފުރިހަމަކަމެއް ގެނެސްދެއްވާފައެވެ.
324 ސަފުހާގެ މި ފޮތަކީ މި ފަހުގެ ތާރީޚެއްގައި ލިއެވިފައިވާ ފޮތްތަކަށް ބަލާއިރު އެއް ފޮތަކުން ދިވެހީންގެ ތާރީޚާ ބެހޭ އެންމެ ގިނަ ދިމަދިމާއަށް ނަޒަރު ހިންގާލާފައިވާ ފޮތެވެ. މި ފޮތުގައި ދިވެހި ޤައުމިއްޔަތުގެ ބަހާތަކުގެ ހުރިހާ ދާއިރާއަކަށް ޙުސްނާ އަލިއަޅުވައިލައްވާފައި ވެއެވެ. މިސާލަކަށް، ރާއްޖެ އުފެދުން، ރާއްޖޭގެ ވަޒަންވެރިން، ރާއްޖޭގެ ވެރިކަން، ރާއްޖޭގެ ދީން، ރާއްޖޭގެ ސަގާފަތާއި ތަރިކަ، ސިއްޙީ ދާއިރާ، ޢުމްރާނީ ތަރައްގީ، މަސައްކަތްތެރިކަން، ކުޅިވަރު މިފަދަ އެތައް މައުޟޫއަކަށް އިންސާފުކުރައްވާފައި ވަނީ މައުޟޫއަކާ ގުޅޭ ކުލަ ފޮޓޯތައް ހިމަނުއްވައިގެން ވަރަށް ފުރިހަމައަށެވެ.
