ވާރޭވެހުމުން، ވައި ކޮންމެވެސް ވަރަކަށް ސާފުވެގެން ދާނެ ކަމަށް މޯލްޑިވްސް މީޓިއޮރޮލޮޖިކަލް ސާވިސް (މެޓް)އިން ބުނެފިއެވެ.
”ސަންގު“ އަށް މައުލޫމާތު ދެމުން މެޓް އޮފީހުން ބުނީ، މިވަގުތު ރާއްޖޭގައި އެންމެ ވައި ނުސާފުވާން ފަށަނީ، ރާއްޖޭގެ އުތުރުންކަމަށެވެ. މިއީ ބޮޑަށް ޖިއޮގްރަފީއާ ގުޅިފައިވާކަމަކަށް ވާތީ، ސްރީލަންކާގެ ފަރާތުން ރާއްޖޭގެ އެންމެ އުތުރުގެ އަތޮޅުތަކަށް ފޯރާކަމަށް މެޓް އޮފީހުން ބުންޏެވެ.
މީގެ އިތުރުން، މިވަގުތު އެންމެ ބޮޑަށް ވައި ނުސާފުވެފައި ވަނީ މެދުރާއްޖެތެރެއަށްކަމަށް މެޓުން ބުނެއެވެ.
ވައިގެ ނުސާފުވުމަކީ މޫސުމީކަމެއްގެ ގޮތުގައި ފާހަގަކޮށް މެޓް އޮފީހުން ބުނީ ކޮންމެ އަހަރެއްގެ ވެސް އިރުވައި މޫސުން ފެށުމުގެ ކުރިން، ވައިގެ މަތީ ފަށަލައާއި ތިރީ ފަށަލައިގައި ހުންނަ ވައި އިރު ނުވަތަ އިރުއުތުރަށް ބަދަލުވުމުން، ރާއްޖޭގެ ސަރަހައްދަށް ދުން ފުސް އުފެދޭ ކަމަށެވެ.
ރާއްޖޭގެ ސަރަހައްދަށް ދުން ފުސް އައުމުގެ ސަބަބެއް ކަމަށް މެޓުން ބުނެފައިވަނީ، މި ދުވަސްވަރު އެކަށީގެންވާ މިންވަރަށް ވާރޭ ނުވެހި ގިނަ ދުވަސްތަކެއް ވުމުގެ ސަބަބުން ދުން ފުސް އެކިއުމިލޭޓްވެފައިވާތީއެވެ.
މެޓުން ބުނި ގޮތުގައި، އާންމުކޮށް ވާރޭވެހުމުން، ދުން ފުހުގައި ހުންނަ ސަސްޕެންޑެޑް ޕާޓިކަލްސް ސާފުވާން ފަށާނެއެވެ. އަދި، މެޓުން ލަފާކުރާ ގޮތުގައި، މި ހަފްތާގެ ބުރާސްފަތި ދުވަހުން ފެށިގެން ގާތްގަނޑަކަށް ރާއްޖޭގެ ހުރިހާ ސަރަހައްދަކަށް ވިއްސާރަ ކުރާނެއެވެ. އަދި ވާރޭވެހުމުގެ ސަބަބުން ވައި ކޮންމެވެސް ވަރަކަށް ސާފުވެގެންދާނެކަމަށް ވަނީ ލަފާކޮށްފަ އެވެ.
ވައިނުސާފުވުމުގެ ސަބަބުން، އެޗްޕީއޭއިން ވަނީ، މިދިޔަ ހަފްތާ ހުކުރު ދުވަހު އޮރެންޖު އެލާޓް ނެރެފައެވެ. އެގޮތުން، ނުރައްކާތެރި މިންވަރަކަށް މާލެ ސަރަހައްދުގެ ވައި ނުސާފުވުމުގެ ސަބަބުން، އައިކިއު އެއާއިން އެ ދުވަހު ދެއްކި ގޮތުގައި މާލޭގައި ޔޫއެސް އައިކިއުއައި ހުރީ 117ގައެވެ. މިއީ އޮރެންޖު ސަމާލު ނެރޭ މިންވަރެވެ. އެހެންކަމުން، މާލޭގައި ފައިން ޕާޓިކިއުލޭޓް މެޓާ ނުވަތަ ޕީއެމް 2.5 ގެ މިންވަރު ކިއުބިކް މީޓަރަކަށް 42 މައިކްރޯގްރާމް ހުރިއެވެ.
މީގެ އިތުރުން، އެޗްޕީއޭއިން ވަނީ ރައްކާތެރިކަމުގެ ފިޔަވަޅުތައް އެޅުމަށް އިލްތިމާސްކޮށްފައެވެ. އެގޮތުން، ސިއްހީ ގޮތުން ނާޒުކު ފައްތަރެއްގައި ތިބި ފަރާތްތަކުން ބޭރަށް ނިކުންނަން ޖެހޭ ހާލަތްތަކުގައި މެނުވީ ނުނިކުމެ، ނިކުންނަން ޖެހޭ ހާލަތްތަކުގައި މާސްކު އަޅައި، ވައި ނުވަންނާނެހެން ދޮރުތައް ލައްޕާ ބެހެއްޓުމަށް އެޗްޕީއޭއިން ވަނީ އެދިފައެވެ.
