2025 ވަނަ އަހަރަކީ ދިވެހިރާއްޖޭގެ ސިއްހީ ދާއިރާއަށް އިންގިލާބީ ބަދަލުތަކެއް އައި އަހަރެކެވެ. ރައްޔިތުންނަށް ބޭނުންވާ އަސާސީ ސިއްހީ ޚިދުމަތްތައް ފުޅާކޮށް، ދިމާވެފައިވާ ގިނަ ގޮންޖެހުންތަކަށް ހައްލު ހޯދުމަށް ސަރުކާރުންވަނީ މުހިންމު ފިޔަވަޅުތަކެއް އަޅާފައެވެ.
އާސަންދަ ސްކީމުގެ ދަށުން ދިވެހި ކޮންމެ ރައްޔިތަކަށް އަހަރަކު ދެފަހަރު ހިލޭ މެޑިކަލް ޗެކަޕް ހެދުމުގެ ފުރުސަތު ސަރުކާރުންވަނީ ފަހިކޮށްދީފައެވެ. މިގޮތުން، މިދިޔަ އަހަރުގެ ޖެނުއަރީ 1 ވަނަ ދުވަހުން ފެށިގެން 50 އަހަރުން މަތީގެ ފަރާތްތަކަށާއި، އޭޕްރީލް 1 ވަނަ ދުވަހުން ފެށިގެން 35 އަހަރާއި 49 އަހަރާ ދެމެދުގެ ޢުމުރުފުރައިގެ މީހުންނަށާއި 19 އަހަރުން ދަށުގެ ކުދިންނަށް އާސަންދައިގެ ދަށުން މެޑިކަލް ޗެކަޕް ހެދޭނެ އިންތިޒާމް ހަމަޖެއްސިއެވެ. އަދި އެއަށްފަހު މިދިޔަ ޖުލައި މަހުން ފެށިގެން ހުރިހާ ރައްޔިތުންނަށްވެސް މި ޚިދުމަތްވަނީ ހުޅުވާލާފައެވެ.
ދާއިމީ ބޮޑެތި ބަލިތައް ގިނަވެ، ދައުލަތުން ބޭސްފަރުވާއަށް ކުރާ ހޭދަ އަހަރުން އަހަރަށް އިތުރުވަމުން އަންނަކަން މީގެ ކުރިން ސަރުކާރުން ފާހަގަކޮށްފައިވެއެވެ. ދައުލަތުން ބޭސްފަރުވާއަށް ކުރާ ހޭދަ ކުޑަކޮށް، ދުޅަހެޔޮ މުޖުތަމަޢެއް ބިނާކުރުމަށް ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ވެވަޑައިގެންފައިވާ ވަޢުދުފުޅުގެ ދަށުން ހުޅުވާލި މި މެޑިކަލް ޗެކަޕްގެ ފުރުޞަތުގެ ބޭނުން، ވީހާވެސް ގިނަ ފަރާތްތަކުން ހިފުމަށް ކަމާބެހޭ އިދާރާތަކުންވަނީ އިލްތިމާސްކުރައްވާފައެވެ.
މީގެއިތުރުން، އެމްބިއުލާންސް ޚިދުމަތްވެސް މިހާތަނަށް އެތައް ބަޔަކަށް ފޯރުކޮށްދެވިފައިވެއެވެ. އަދި ރައީސްގެ ވަޢުދާއި އެއްގޮތްވާ ގޮތުގެ މަތިން، ބޯންމެރޯ ޓްރާންސްޕްލާންޓް ބޭނުންވާ ކުދިން ފޮނުވައިފިއެވެ. ހިލޭ ބޯންމެރޯ ޓްރާންސްޕްލާންޓް ހެދުމަށް ފަސޭހަ އަދި ދެމެހެއްޓެނިވި ނިޒާމެއް ޤާއިމުކުރުމުގެ ގޮތުން، ކުރު ރާސްތާގައި ހުރިހާ އެސެސްމެންޓެއް ހެދި ބޯންމެރޯ ހެދުމަށް ފައިނަލްވާ ކުދިން، ކޮންމެ އަހަރަކު ކަނޑައެޅިފައިވާ މިންވަރަކުން ފޮނުވަމުންދިއުމަށްވަނީ ނިންމާފައެވެ. އަދި ދުރު ރާސްތާގެ ޙައްލެއްގެ ގޮތުން، އަހަރަކު 10 ކުދިންނަށް ބޯންމެރޯ ހެދޭނެ އިންތިޒާމް ކަށަވަރުކޮށްދެއްވުމަކީ ރައީސުލްޖުމްހޫރިއްޔާގެ ވަޢުދެކެވެ.
2025 ވަނަ އަހަރު ގެނެވުނު އެންމެ ބޮޑު އެއް ބަދަލަކީ، ތެލެސީމިއާ ބަލި މީހުންނަށް ދިމާވެފައިވާ ގޮންޖެހުންތަކަށް ހައްލެއް ހޯދުމަށް ހުޅުމާލޭގައި ޤާއިމުކުރި ’އޮރެންޖް ހިޔާ‘ ތެލެސީމިއާ ޕޭޝަންޓުންނަށް ޚާއްސަކުރުމެވެ. ތެލެސީމިއާ ކުދިންނަށް ކުރިމަތިވެފައިވާ މައްސަލަ ޙައްލުކުރުމަށް މި މަސައްކަތް ކުރިއަށްނުދާތީ، މި މަސައްކަތް ޤައުމީ މަސައްކަތެއްގެ ގޮތުގައި ޤައުމީ ދިފާޢީ ބާރާ ރައީސުލްޖުމްހޫރިއްޔާ ހަވާލުކުރެއްވީ މިދިޔަ މާރިޗު މަހުގެ 27 ވަނަ ދުވަހުއެވެ. އަދި އެތަން ރަސްމީކޮށް ހުޅުވައިފައިވަނީ މެއި މަހުއެވެ.
ސަރުކާރުންވަނީ ސިއްހީ ދާއިރާއާ ގުޅުންހުރި އިތުރު މުހިންމު ނިންމުންތަކެއްވެސް ނިންމާފައެވެ. އެގޮތުން، ނިމިދިޔަ އަހަރު ވޭޕް ރާއްޖެއަށް އެތެރެކުރުން މަނާކޮށްފައިވާއިރު، ”ޖެނެރޭޝަނަލް ބޭން“ އެއް ވަނީ ތަޢާރަފްކޮށްފައެވެ. ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު މި ”ޖެނެރޭޝަނަލް ބޭން“ ގެނައުމަށް ނިންމެވީ ރާއްޖޭގައި ދުންފަތުގެ އިސްތިޢުމާލު ކުރުން ހުއްޓުވުމަށެވެ. އެގޮތުން، 2007 ވަނަ އަހަރުން ފެށިގެން އުފަންވެފައިވާ އަދި އުފަންވާ ކުދިންނަށް ދުންފަތުގެ އިސްތިޢުމާލުކުރުން މަނާކުރުމަށް އެމަނިކުފާނުވަނީ ނިންމަވާފައެވެ.
މި އިސްލާޙުގެ ދަށުން އިލެކްޓްރޯނިކް ސިނގިރޭޓާއި ވޭޕްގެ ބާވަތްތައް ގެންގުޅެނިކޮށް ނުވަތަ ބޭނުންކުރަނިކޮށް ފެނިއްޖެނަމަ އެތަކެތި އަތުލުމުގެ ބާރު ފުލުހުންނަށް ލިބިގެންދާނެއެވެ. އަދި ރާއްޖެއަށް އެތެރެކުރާ އެފަދަ ތަކެތި އަތުލުމުގެ ބާރު ކަސްޓަމްސް އާއި ފުލުހުންނަށްވެސް ލިބިގެންދާނެއެވެ.
މީގެއިތުރުން، ރައްޔިތުންނަށް ދިމާވެފައިވާ ބޮޑެތި މައްސަލަތަކަށް ހައްލު ހޯދުމަށް ސަރުކާރުގެ ހޮސްޕިޓަލްތައް އިތުރަށް ތަރައްޤީ ކުރުމުގެ މަސައްކަތްވަނީ ފަށާފައެވެ. އެގޮތުން، އައިޖީއެމްއެޗުގައި ޒަމާނީ ވަސީލަތްތަކާއެކު ޤާއިމުކުރި 75 އެނދުގެ މަލްޓި-ސްޕެޝަލިޓީ ސަރޖިކަލް ވިންގެއްވަނީ ހުޅުވާފައެވެ. މި ވިންގަކީ ޖެނެރަލް ސާޖަރީ، ނިއުރޯސާޖަރީ، ޕްލާސްޓިކް ސާޖަރީ، ޔޫރޯ ސާޖަރީ އަދި އޯތޯޕިޑިކްސް ސްޕެޝަލިޓީގެ ދަށުން އެނދުމަތި ކުރެވޭ އޮޕަރޭޝަން ބަލިތަކުގެ ބަލިމީހުންނަށް ޚިދުމަތްތައް ފޯރުކޮށްދިނުމަށް ޚާއްސަކުރެވިފައިވާ ތަނެކެވެ.
އައިޖީއެމްއެޗްގެ އިތުރުން ހުޅުމާލޭގެ ހޮސްޕިޓަލްތަކަށްވެސްވަނީ ބަދަލުތަކެއް ގެނެސްފައެވެ. އެގޮތުން، ހުޅުމާލެ ހޮސްޕިޓަލަށް އިތުރުކުރާ 10 ފަންގިފިލާގެ އިމާރާތުގައި 250 އެނދާއި ޕްރައިވެޓް ރޫމުތަކެއް ޤާއިމުކުރުމަށް ހަމަޖެހިފައިވެއެވެ. މާލޭގެ 4 ހޮސްޕިޓަލްގެ ތަރައްޤީއަށް މުހިންމު މަސައްކަތްތައް ކުރިއަށްގެންދިއުމަށް ނިންމާފައިވާއިރު، ހުޅުމާލެ ހޮސްޕިޓަލްގައި ހުސްކޮށް އޮތް ބިމުގައި އައު އިމާރާތެއް އެޅުމުގެ މަސައްކަތް މާލީ ވުޒާރާއާއި ސިއްޙީ ވުޒާރާ އަދި އިމާރާތްކުރުމާ ބެހޭ ވުޒާރާއާ ގުޅިގެން މިވަގުތުވަނީ ފަށާފައެވެ.
