ތެލަސީމިއާ އެލަވަންސަށް އެދި ހުށައެޅުމުގެ ފުރުޞަތު ހުޅުވާލައިފި

ދިވެހިރާއްޖޭގައި ތެލަސީމިއާ ބަލި ތަޙައްމަލު ކުރަމުންދާ ކުދިންނާއި މީހުންނަށް ދައުލަތުގެ ފަރާތުން ދިނުމަށް ނިންމާފައިވާ ޚާއްޞަ މާލީ އެހީތެރިކަން ނުވަތަ ތެލަސީމިއާ އެލަވަންސަށް އެދި ހުށައެޅުމުގެ ފުރުޞަތު މިއަދުން ފެށިގެން ނޭޝަނަލް ސޯޝަލް ޕްރޮޓެކްޝަން އޭޖެންސީ (އެންސްޕާ) އިން ހުޅުވާލައިފިއެވެ.

ތެލަސީމިއާ ކުދިންނަށް ޚާއްޞަ އެލަވަންސެއް ދެއްވާނެކަން ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު އިޢުލާން ކުރެއްވީ މިދިޔަ އަހަރުގެ އޮކްޓޯބަރު މަހުގެ ތެރޭގައެވެ. މި ނިންމެވުމުގެ މައިގަނޑު މަޤްޞަދަކީ ތެލަސީމިއާ ކުދިންގެ ފަރުވާއާއި ބެލެހެއްޓުމުގައި އާއިލާތަކުން ކުރަންޖެހޭ ޚަރަދުތަކަށް އެހީތެރިވެދިނުމެވެ. މިގޮތުން ކޮންމެ މަހަކު ކޮންމެ ކުއްޖަކަށް 2000 ރުފިޔާ ދިނުމަށް ވަނީ ކަނޑައަޅާފައެވެ.

އެލަވަންސް ލިބޭނެ ފަރާތްތަކާއި ޝަރުޠުތައް

މި އެލަވަންސް ދިނުމަށްޓަކައި އެންސްޕާ އިން ވަނީ ޚާއްޞަ އުޞޫލުތަކެއް އެކުލަވާލާފައެވެ. މި އެލަވަންސް ލިބޭނީ ތެލަސީމިއާ އެންޑް އަދަރ ހިމޮގްލޮބިނޯޕަތީސް ސެންޓަރުގައި ބަލަހައްޓަމުންދާ ތެލަސީމިއާ ހުންނަ މީހުންގެ ޤައުމީ ދަފްތަރުގައި ރަޖިސްޓްރީކޮށްފައިވާ ފަރާތްތަކަށެވެ.

މި ދަފްތަރުގައި ކުދިންގެ ޞިއްޙީ ޙާލަތާއި، ފަރުވާގެ ތަފްޞީލުތައް ހިމެނިފައި އޮންނަންވާނެއެވެ. އެލަވަންސް ލިބެން ފަށާނީ އެޕްލިކޭޝަން ހުށައަޅައި އެޕްރޫވްވުމަށްފަހު، ޖެހިގެން އަންނަ މަހުން ފެށިގެންނެވެ.

ހުށައަޅަންޖެހޭ ގޮތާއި މުހިންމު މަޢުލޫމާތު

އެލަވަންސަށް އެދި ހުށައަޅާއިރު، އެ ފަރާތެއްގެ ދާއިމީ އެޑްރެހާއި، ގުޅޭނެ ފޯނު ނަންބަރު އަދި އީމެއިލް އެޑްރެސް ފަދަ މަޢުލޫމާތު ހިމަނަންޖެހެއެވެ. އެލަވަންސަށް އެދޭ ފަރާތަކީ 18 އަހަރު ނުފުރޭ ކުއްޖެއްނަމަ، ފޯމު ހުށައަޅަންވާނީ ބެލެނިވެރިޔާގެ މަޢުލޫމާތާއެކުގައެވެ. މީގެ އިތުރުން، ތެލަސީމިއާ ސެންޓަރުން ބަލަހައްޓާ ދަފްތަރުގައި އެ ކުއްޖެއްގެ އުމުރުފުރާއާއި، ބަލީގެ ބާވަތާއި، އަދި ޞިއްޙީ މިންގަނޑުން ފަރުވާ ހޯދަންޖެހޭ ކަމަށް ކަނޑައަޅާފައިވާ ތަފްޞީލުތައް ހިމެނުން ލާޒިމެވެ.

އެލަވަންސް މެދުކަނޑާލުމާއި އަލުން ދިނުން

ޤަވާއިދުގައިވާ ގޮތުން ބައެއް ޙާލަތްތަކުގައި އެލަވަންސް ދިނުން މެދުކަނޑާލެވޭނެއެވެ. އޭގެ ތެރޭގައި، ކުއްޖާ ނިޔާވުން، ނުވަތަ ޞިއްޙީ މިންގަނޑުން ބަލާއިރު އިތުރަށް ފަރުވާ ކުރަން ނުޖެހޭ ކަމަށް ސެންޓަރުން ކަނޑައެޅުން، ނުވަތަ އަމިއްލައަށް އެލަވަންސް ބޭނުންނުވާކަމަށް އެދުން ހިމެނެއެވެ. ނަމަވެސް، ފަރުވާ މެދުކަނޑާލާފައިވާ ކުއްޖެއްގެ ޙާލަތު ބަދަލުވެ، އަލުން ފަރުވާ ހޯދަންޖެހޭ ކަމަށް ޞިއްޙީ މިންގަނޑަކުން ކަނޑައަޅައިފިނަމަ، އަލުން އެލަވަންސް ދޭން ފެށޭނެއެވެ.