ތ. ވިލުފުށީގައި ދިމާވެފައިވާ ބޯހިޔާވަހިކަމުގެ މައްސަލައަށް ހައްލު ހޯދައިދިނުމަށް ސަރުކާރުން ކުރިއަށްގެންދާ ބޯހިޔާވަހިކަމުގެ ސިޔާސަތުގެ ދަށުން، އެ ރަށުގައި އިމާރާތްކޮށްފައިވާ 100 ހައުސިންގް ޔުނިޓަށް އެދި ފޯމު ހުށައެޅުމުގެ ފުރުސަތު ހައުސިން މިނިސްޓްރީން ހުޅުވާލައިފިއެވެ. މި ހައުސިންގް ޔުނިޓްތަކަށް އެދި ފޯމު ހުށަހަޅަންޖެހެނީ ރަސްމީ ’ހިޔާވެހި‘ ޕޯޓަލް މެދުވެރިކޮށެވެ.
މިނިސްޓްރީން ކުރި އިއުލާނުގައިވާ ގޮތުން، މި ހައުސިންގް ޔުނިޓްތަކަށް އެދުމުގެ ފުރުސަތު ހުޅުވާލުމަށް ހަމަޖެހިފައިވަނީ 11 ޖެނުއަރީ 2026 ގައެވެ. ޝަރުތު ހަމަވާ ފަރާތްތަކުން hiyaavehi.housing.gov.mv ޕޯޓަލް މެދުވެރިކޮށް ފޯމު ހުށަހެޅޭނެ ކަމަށް މިނިސްޓްރީން ބުނެފައިވެއެވެ.
ޕޮއިންޓު ދިނުމުގެ އުސޫލާއި ޝަރުތުތައް
މި މަޝްރޫޢުގެ ދަށުން ޕޮއިންޓު ދިނުމުގައި ވިލުފުށީގެ ރަށްވެހިންނަށާއި، އެ ރަށަށް ހިޖުރަކޮށް މެދުނުކެނޑި 10 އަހަރު ދުވަހު ދިރިއުޅެމުންދާ ފަރާތްތަކަށް ޚާއްޞަ އިސްކަމެއް ދިނުމަށް ވަނީ ނިންމާފައެވެ. މީގެ އިތުރުން ސުނާމީ ކާރިސާއާ ގުޅިގެން ސަރުކާރުން އިމާރާތްކޮށް، ބަދަލުގެ ގޮތުގައި ވިލުފުށިން ގެ ލިބިފައިވާ ނަމަވެސް ރަޖިސްޓަރީ ނުކުރެވި ހުރި ފަރާތްތަކަށްވެސް މި އުސޫލުގެ ތެރެއިން ހައްގުތައް ކަށަވަރުކޮށްދީފައިވެއެވެ.
ހައުސިންގް ޔުނިޓަށް ކުރިމަތިލާ ފަރާތްތަކުގެ މަހު އާމްދަނީ 60,000 ރުފިޔާއަށްވުރެ އިތުރުވެގެން ނުވާނެއެވެ. އަދި ޕޮއިންޓު ދިނުމުގައި އާމްދަނީގެ ނިސްބަތާއި، ދިރިއުޅުމުގެ ހާލަތުގެ އިތުރުން، މައިންބަފައިން ބަލަހައްޓާ ފަރާތްތަކަށާއި ޚާއްޞަ އެހީއަށް ބޭނުންވާ ފަރާތްތައް ބަލަހައްޓާ ފަރާތްތަކަށް އިތުރު ޕޮއިންޓު ލިބޭނެ އިންތިޒާމު ވަނީ ހަމަޖައްސާފައެވެ.
މުހިންމު ޝަރުތުތައް
ކުރިމަތިލާ ފަރާތްތަކަކީ އުމުރުން 18 އަހަރު ފުރިފައިވާ ދިވެހިންނަށް ވާންޖެހޭއިރު، އެ ފަރާތެއް ނުވަތަ އަނބިމީހާ/ފިރިމީހާގެ ނަމުގައި ރާއްޖޭގެ އެއްވެސް ރަށަކުން 600 އަކަފޫޓަށްވުރެ ބޮޑު ބިމެއް ނުވަތަ ސަރުކާރުގެ ބޯހިޔާވަހިކަމުގެ މަޝްރޫޢަކުން ޔުނިޓެއް ލިބިފައި އޮވެގެން ނުވާނެއެވެ. އަދި ފާއިތުވި ތިން އަހަރު ތެރޭގައި އެފަދަ ބިމެއް ވިއްކާލާފައި ނުވަތަ އެހެން ފަރާތަކަށް ދީފައިވާ ފަރާތަކަށް ވެސް ވެގެން ނުވާނެއެވެ. 600 އަކަފޫޓަށްވުރެ ކުޑަ ބިމެއް އޮތް ނަމަ، ހައުސިންގް ޔުނިޓް ލިބުމުން އެ ބިން ދޫކޮށްލަން އެއްބަސްވާން ޖެހޭނެ ކަމަށްވެސް އުސޫލުގައި ބަޔާންކޮށްފައިވެއެވެ.
