އުމްރާގެ އަޅުކަން އަދާކުރުމަށް ސައުދީ އަރަބިއްޔާއަށް ގޮސްހުރި ދިވެއްސަކު ކުއްލި ގޮތަކަށް ނިޔާވެއްޖެއެވެ. މި ހާދިސާގައި ނިޔާވެފައިވަނީ މ. ސައްކެޔޮމާގެ، މުޙައްމަދު އިމްތިޔާޒްއެވެ.
މައުލޫމާތު ލިބިފައިވާ ގޮތުގައި އިމްތިޔާޒް ނިޔާވީ ރޭ 11 ޖަހާކަންހާއިރު ހާޓް އެޓޭކެއް ޖެހިގެންނެވެ. އޭނާއަކީ މަނާސިކް ގްރޫޕްގެ ހަވާލުގައި އުމްރާގެ އަޅުކަމަށް ދިޔަ މީހެކެވެ. އިމްތިޔާޒް ނިޔާވީ ޒިޔާރަތް ދަތުރުތައް ނިންމުމަށްފަހު، އުމްރާގެ އަޅުކަމުގެ ތެރެއިން ސަފާ އާއި މަރުވާގައި އުޅެނިކޮށް ހޭނެތިގެން ވެއްޓިގެންނެވެ. އޭނާ ވެއްޓުމާއެކު ވަގުތުން ހޮސްޕިޓަލަށް ގެންދެވުނު ނަމަވެސް، އޭރުވެސް އޭނާ ވަނީ ނިޔާވެފައެވެ.
މުޙައްމަދު އިމްތިޔާޒްގެ ހަށިގަނޑު ޑިސެމްބަރު މަހުގެ 31 ވަނަ ދުވަހު މައްކާގައި ވަނީ ވަޅުލައިފައެވެ.
ސްކޫލް ބޮޑު ޗުއްޓީއާ ދިމާކޮށް ގިނަ އަދަދެއްގެ ދިވެހިން އުމްރާގެ އަޅުކަމަށް ދާއިރު، އިސްލާމިކް މިނިސްޓްރީން ހާމަކޮށްފައިވާ ގޮތުގައި މިދިޔަ ޑިސެމްބަރު މަހާއި މި އަހަރުގެ ޖެނުއަރީ މަހު ރާއްޖެއިން ޖުމްލަ 7,726 މީހުން އުމްރާއަށް ދާނެއެވެ. މީގެ ތެރެއިން އެންމެ ފުރަތަމަ ގްރޫޕް ފުރާފައިވަނީ ޑިސެމްބަރު 21 ގައެވެ.
ޗުއްޓީ ބަންދާ ދިމާކޮށް އުމްރާއަށްދާ އެންމެ ފަހު ގްރޫޕް ފުރުމަށް ހަމަޖެހިފައިވަނީ މި މަހުގެ 9 ވަނަ ދުވަހުއެވެ. އެ ދުވަހު 298 އުމްރާވެރިން ފުރާނެ ކަމަށް މައުލޫމާތު ލިބެއެވެ. ކޮންމެ އަހަރަކުވެސް ސްކޫލް ބަންދާ ދިމާކޮށް ރާއްޖެއިން ގިނަ އަދަދެއްގެ ބަޔަކު އުމްރާގެ އަޅުކަމަށް މައްކާއަށް ދެއެވެ.
