2026 ވަނަ އަހަރަކީ ރައީސުލްޖުމްހޫރިއްޔާ ޑރ. މުޙައްމަދު މުޢިއްޒުގެ މެނިފެސްޓޯގައި ހިމެނޭ އިސްލާމީ ވަޢުދުތަކަށް އިތުރު ފުރިހަމަކަމެއް ލިބި، އިސްލާމީ ގޮތުން ރާއްޖެއަށް ފާގަތި އަހަރަކަށް ވެގެންދާނެ ކަމަށް އިސްލާމީ ކަންތައްތަކާ ބެހޭ ވަޒީރު ޑރ. މުޙައްމަދު ޝަހީމް އަލީ ސަޢީދު ވިދާޅުވެއްޖެއެވެ. ވަޒީރު މިހެން ވިދާޅުވީ އެކްސްގައި ކުރެއްވި ޕޯސްޓެއްގައެވެ.
ވަޒީރު ޝަހީމް ވިދާޅުވި ގޮތުގައި، 2026 ވަނަ އަހަރުގެ ތެރޭގައި އިސްލާމީ ވުޒާރާއާއި އެ ވުޒާރާގެ ދަށުން ހިނގާ މުއައްސަސާތަކުގެ 10 އަހަރުގެ އިސްތިރާޖީ ޕްލޭން އެކުލަވައިލެވިގެން ދާނެއެވެ. އަދި ޒުވާން އިމާމުންނާއި، ޒުވާން ޚަޠީބުންނާއި ޙާފިޒުންގެ ޤައުމީ މަހާސިންތާ ބޭއްވުމުގެ އިތުރުން، ޒުވާން ޚަޠީބުންގެ އަދަދު 1,000 އަށް އަދި ރާއްޖޭގެ ޙާފިޒުންގެ އަދަދު 300 އަށް ވުރެ މަތިވެގެންދާނެ ކަމަށް ވަޒީރު ފާހަގަކުރެއްވިއެވެ.
މިސްކިތްތަކުގެ މަޝްރޫޢުތަކާ ގުޅޭގޮތުން ވަޒީރު ވިދާޅުވީ، ހުޅުމާލެ ފޭސް 1 އަދި 2 ގައި 5 ދާއިމީ މިސްކިތެއް ހުޅުވި، އިތުރު 4 މިސްކިތެއްގެ މަސައްކަތް ފެށިގެންދާނެ ކަމަށެވެ. މީގެ އިތުރުން ރާއްޖޭގެ އެކި ސަރަޙައްދުތަކުގައި ގިނަ މިސްކިތްތަކާއި ސެންޓަރުތަކާއި ވަޤުފު މަޝްރޫޢުތަކުގެ މަސައްކަތް ކުރިއަށްދާނެ ކަމަށާއި، ގިނަ ޢަދަދެއްގެ އިލްމީ ރިފަރެންސް ފޮތްތަކުގެ ދިވެހި ތަރުޖަމާ ނެރެވިގެންދާނެ ކަމަށްވެސް ވަޒީރު ވިދާޅުވިއެވެ.
ދީނީ ތަޢުލީމާއި ޚިދުމަތްތައް ފުޅާކުރުމުގެ ގޮތުން ޤުރުއާން މަރުކަޒުގެ ގިނަ ގޮފިތައް ހުޅުވި، ޙާފިޒުން އުފެއްދުމުގެ މަޝްރޫޢު ފުޅާކުރެވިގެންދާނެއެވެ. އަދި ރައީސުލްޖުމްހޫރިއްޔާ އިޢުލާންކުރައްވާފައިވާ ޤުރުއާނަށް ޚާއްޞަ ވަޤުފު ބިލްޑިންގްގެ މަޝްރޫޢު އަމަލީ ގޮތުން ފެށި، ޒަކާތު ފަންޑާއި ވަޤުފު ފަންޑުގެ އިންވެސްޓްމަންޓްތައް އިތުރުވެގެންދާނެ ކަމަށް ވަޒީރު ވިދާޅުވިއެވެ.
އިޖުތިމާޢީ ރައްކާތެރިކަމުގެ ދާއިރާއިން ޒަކާތު ޤާނޫނަށް ޢަމަލުކުރަން ފެށުމާއެކު، ފަޤީރުންގެ ދަފްތަރުގައި ހިމެނޭ ފަރާތްތަކަށް ”ޒަކާތު ބެނެފިޝަރީ ކާޑު“ ލިބިގެންދާނެ ކަމަށް ވަޒީރު ޝަހީމް ވިދާޅުވިއެވެ. ވަޒީރުގެ ޕޯސްޓް ނިންމަވާލައްވާފައިވަނީ މި ހުރިހާ މަސައްކަތްތަކާއެކު ރާއްޖޭގެ އިސްލާމީ ޙަޟާރަތުގެ އަސާސްތައް އިތުރަށް ވަރުގަދަވެގެންދާނެ ކަމުގެ ޔަޤީންކަން ދެއްވަމުންނެވެ.
