ރާއްޖޭގައި ގަވާއިދާ ހިލާފަށް އުޅޭ ބިދޭސީން ދެނެގަތުމަށް ކުރިއަށްގެންދާ ހާއްސަ މަސައްކަތްތަކުގެ ތެރެއިން، މާލޭގެ އެކި ސަރަހައްދުތަކުން 60 ބިދޭސީއަކު ހުއްޓުވައި ބަލައި ފާސްކޮށްފިއެވެ.
މި އޮޕަރޭޝަނަކީ ރާއްޖޭގައި ގަވާއިދާ ހިލާފަށް އުޅޭ ބިދޭސީންގެ މައްސަލަ ހައްލުކުރުމަށް ސަރުކާރުން ކުރަމުންދާ މަސައްކަތުގެ ބައެކެވެ.
މޯލްޑިވްސް އިމިގްރޭޝަނުން ”އެކްސް“ ގައި ކުރި ޕޯސްޓެއްގައި ބުނީ، މާލޭގެ އެކި ސަރަހައްދުތަކުގައި ހަރަކާތްތެރިވަމުން ދިޔަ ބިދޭސީން ހުއްޓުވައި ސުވާލުކޮށްފައިވާ ކަމަށެވެ. މިގޮތުން ބަލައި ފާސްކުރި 60 ބިދޭސީންގެ ފަރާތުން ވެސް ފުރިހަމަ އެއްބާރުލުން ލިބިފައިވާ ކަމަށް އެ އިދާރާއިން ފާހަގަކޮށްފައިވެއެވެ.
އިމިގްރޭޝަނުން އިތުރަށް ހާމަކޮށްފައިވާ ގޮތުގައި، މި އޮޕަރޭޝަންގެ ތެރެއިން އެއްވެސް ބިދޭސީއަކު އެ އިދާރާގެ ބެލުމުގެ ދަށަށް ގެންގޮސްފައެއް ނުވެއެވެ. މިއީ މައިގަނޑު ގޮތެއްގައި ބިދޭސީންގެ ލިޔެކިޔުންތައް ހުރި ގޮތް ބަލައި، އެމީހުންގެ މައުލޫމާތު ސާފުކުރުމަށް ކުރިއަށް ގެންދިޔަ ހަރަކާތެކެވެ.
ތަފާސްހިސާބުތަކަށް ބަލާއިރު، 17 ނޮވެމްބަރު 2023 އިން ފެށިގެން 3 ފެބްރުއަރީ 2026 ގެ ނިޔަލަށް ގަވާއިދާ ހިލާފަށް އުޅުނު 11,496 ބިދޭސީއަކު ވަނީ އަނބުރާ ގައުމަށް ފޮނުވާލެވިފައެވެ. މީގެ އިތުރުން، ގަވާއިދާ ހިލާފަށް އުޅޭ ބިދޭސީން ގަވާއިދުގެ ތެރެއަށް ފެއްތުމަށް (ލީގަލައިޒް ކުރުމަށް) 1 ޖެނުއަރީ 2026 ގައި ފެށި މަސައްކަތުގެ ދަށުން މިހާތަނަށް 3,700 އެޕްލިކޭޝަން ލިބިފައިވާ ކަމަށް ވެސް އިމިގްރޭޝަނުން ބުނެއެވެ.
އިމިގްރޭޝަނުން ކުރަމުން އަންނަ މި މަސައްކަތަކީ ރާއްޖޭގައި އެތައް އަހަރެއް ވަންދެން ގަވާއިދާ ހިލާފަށް ވިޔަފާރިކޮށް ހަރަކާތްތެރިވަމުން އަންނަ ބިދޭސީންނަށް އަމާޒުކޮށްގެން، ރާއްޖޭގެ ގާނޫނުތަކާއި ގަވާއިދުތަކަށް އެމީހުން އަހުލުވެރިކުރުވައި، ގަވާއިދާ ހިލާފަށް އުޅޭ މީހުން މަދުކުރުމަށް ކުރިއަށްގެންދާ މުހިންމު އޮޕަރޭޝަނެކެވެ.
