މިދިޔަ ހަފުތާގައި ރާއްޖެ ޓްރާންސްޕޯޓް ލިންކް (އާރުޓީއެލް) ސްޕީޑު ފެރީގެ ހިދުމަތް ފެށި ފ. އަތޮޅާއި ދ. އަތޮޅުގައި އެ ހިދުމަތް ދޭނެ އަގުތައް ޓްރާންސްޕޯޓް މިނިސްޓްރީން އާންމުކޮށްފިއެވެ.
މި ދެ އަތޮޅުގައި ހިދުމަތް ފެށުމާއެކު، އަތޮޅުތެރޭގެ ދަތުރުފަތުރުގެ ނިޒާމަށް ބޮޑު ލުޔެއް ލިބިގެންދާނެއެވެ.
ޓްރާންސްޕޯޓް މިނިސްޓްރީން ކުރި އިއުލާނެއްގައިވާ ގޮތުން، ފ. އަތޮޅާއި ދ. އަތޮޅުގައި ވެސް އާރުޓީއެލް ފެރީގެ އެއްކޮޅު ދަތުރެއްގެ އަގު ފެށެނީ 35 ރުފިޔާ އިންނެވެ. އަދި އެ އަތޮޅުތަކުގެ އެތެރޭގެ ދަތުރުތަކަށް ދެކޮޅު ޓިކެޓެއްގެ އަގު އެންމެ ބޮޑުވެގެން އުޅެނީ 130 ރުފިޔާ ގައެވެ.
މީގެ އިތުރުން، ފ. އަތޮޅާއި ދ. އަތޮޅާ ދެމެދު ކުރާ ދަތުރުތަކުގެ އަގުތައް ވެސް ވަނީ ކަނޑައަޅާފައެވެ. އެގޮތުން ދެ އަތޮޅު ދެމެދު ކުރާ ދަތުރުތަކުގެ އެއްކޮޅު ޓިކެޓުގެ އަގު ފެށެނީ 130 ރުފިޔާ އިންނެވެ. އަދި ދެކޮޅު ދަތުރަކަށް އެންމެ ބޮޑުވެގެން ދައްކަން ޖެހޭނީ 300 ރުފިޔާ ކަމަށް މިނިސްޓްރީން ބުނެފައިވެއެވެ.
އެމްޓީސީސީން ދެމުން އަންނަ މި ހިދުމަތުގެ ޓިކެޓު ބުކް ކުރެވޭނީ އާރުޓީއެލްގެ ވެބްސައިޓާއި މޮބައިލް އެޕްލިކޭޝަން މެދުވެރިކޮށެވެ. އަގު ނަގައިގެން ހިދުމަތް ދޭން ފެށި ނަމަވެސް، ތިން އަހަރުން ދަށުގެ ކުޑަކުދިންނާއި ހާއްސަ އެހީއަށް ބޭނުންވާ މީހުންނަށް އާރުޓީއެލް ފެރީގައި ހިލޭ ދަތުރުކުރެވޭނެ އިންތިޒާމު ވަނީ ހަމަޖައްސާފައެވެ.
އާރުޓީއެލްގެ ހިދުމަތް އެންމެ ފަހުން ފެށީ ރ. އަތޮޅުގައެވެ. އޭރު ވެސް އެމްޓީސީސީން ވަނީ ހަފުތާއެއްގެ މުއްދަތަށް ހިލޭ ދަތުރުކުރުމުގެ ފުރުސަތު އާންމުންނަށް ހުޅުވާލާފައެވެ. މިހާރު ރާއްޖޭގެ 12 އަތޮޅެއްގެ 123 ރަށަކަށް އާރުޓީއެލް ފެރީގެ ހިދުމަތް އަންނަނީ ފޯރުކޮށްދެމުންނެވެ.
