އޮންލައިންކޮށް ޒަކާތް ދެއްކުމަށް އަހުލުވެރި ނޫން ފަރާތްތަކަށް ޚާއްޞަކޮށް، ނަގުދު ފައިސާއާއި ކޭޝް ކާޑުން ޒަކާތް ބަލައިގަންނަން ފަށައިފި

އޮންލައިންކޮށް ޒަކާތް ދެއްކުމަށް އަހުލުވެރި ނޫން ފަރާތްތަކަށް ޚާއްޞަކޮށް، ނަގުދު ފައިސާ އަދި ކޭޝް ކާޑުން ޒަކާތް ބަލައިގަތުމުގެ އިންތިޒާމު މޯލްޑިވްސް ޒަކާތު ހައުސްއިން މިއަދު ހަމަޖައްސައިފިއެވެ. މާލޭގައި ޒަކާތް ބަލައިގަތުމަށް ހަމަޖެހިފައިވަނީ އިސްލާމީ މަރުކަޒުގެ ޖަލްސާކުރާ މާލަމުގައި ޤާއިމުކޮށްފައިވާ ކައުންޓަރުތަކުންނެވެ.

ކައުންޓަރުތަކުން ޒަކާތް ބަލައިގަންނަ ވަގުތުތައް

ކައުންޓަރުތަކުން ޒަކާތް ބަލައިގަތުމަށް ހަމަޖެހިފައިވަނީ ދެ މަރުހަލާއަކަށް ބަހާލައިގެންނެވެ. އެގޮތުން 22 ފެބުރުވަރީން 9 މާރިޗަށް، ރަސްމީ ބަންދު ނޫން ކޮންމެ ދުވަހަކު ހެނދުނު 10:00 އިން މެންދުރު 13:00 އަށެވެ. އަދި 10 މާރިޗުން 19 މާރިޗަށް، ހުކުރު، ހޮނިހިރު ފިޔަވައި ކޮންމެ ދުވަހަކު ހެނދުނު 11:00 އިން މެންދުރު 14:00 އަށެވެ.

އަތޮޅުތެރޭގެ ރަށްރަށުގައި އޮންލައިންކޮށް ޒަކާތް ދެއްކުމަށް އަހުލުވެރި ނޫން ފަރާތްތަކުން ފިޠުރު ޒަކާތް ދައްކާނީ އެ ރަށެއްގެ ލޯކަލް ކައުންސިލު އިދާރާއަށެވެ. ކައުންސިލުތަކުން ޒަކާތް ބަލައިގަތުމުގައި ބޭނުންކުރާނީ އެކަމަށް ޚާއްޞަކޮށްފައިވާ ފިޠުރު ޕޯޓަލްއެވެ. މި ޕޯޓަލް މެދުވެރިކޮށް ފައިސާ ދެއްކުމުން، އެ މުޢާމަލާތް ވަގުތުން ރެކޯޑުކުރެވި، ފައިސާ ދެއްކި ފަރާތަށް އެސް.އެމް.އެސް އެއްގެ ޒަރީޢާއިން ކަށަވަރުކޮށްދެވޭނެއެވެ.

އޮންލައިންކޮށް ޒަކާތް ދެއްކޭނެ ގޮތްތައް

ނަގުދު ފައިސާއިން ޒަކާތް ބަލައިގަންނަން ފެށި ނަމަވެސް، ރަމަޟާން މަހުގެ ފުރަތަމަ ދުވަހުން ފެށިގެން އޮންލައިންކޮށް ޒަކާތް ދެއްކުމުގެ ފުރުޞަތު ވަނީ ހުޅުވާލާފައެވެ. އެގޮތުން ޖުމްލަ 7 ޕްލެޓްފޯމަކުން ޒަކާތް ދެއްކޭނެއެވެ. އޭގެ ތެރޭގައި ދިރާގު، އުރީދޫ، މޯލްޑިވްސް އިސްލާމިކް ބޭންކް، ބޭންކް އޮފް މޯލްޑިވްސް، ފަހިޕޭ، އަވަސް އެޕް އަދި ބަނޑޭރި ޕޭ ހިމެނެއެވެ.

މީގެ ތެރެއިން ބަނޑޭރިޕޭއާއި ފަހިޕޭ މެދުވެރިކޮށް ރަމަޟާން މަހުގެ އެންމެ ފަހު ދުވަހާ ހަމައަށް ޒަކާތް ދެއްކޭނެއެވެ. ނަމަވެސް އެހެން ޕްލެޓްފޯމުތަކުން ޒަކާތް ބަލައިގަންނާނީ ރަމަޟާން މަހުގެ 27 ވަނަ ދުވަހުގެ ހެނދުނު 06:00 އާ ހަމައަށެވެ.

މި އަހަރުގެ ޒަކާތުގެ ރޭޓުތައް

މި ރަމަޟާން މަހު ފިޠުރު ޒަކާތުގެ ގޮތުގައި ދައްކަން ޖެހޭ އަދަދުތަކަކީ:

• އާދައިގެ ހަނޑޫ: 12 ރުފިޔާ
• ތައިލެންޑް ހުދު ހަނޑޫ: 53 ރުފިޔާ
• ބާސްމަތީ ހަނޑޫ (އާދައިގެ): 77 ރުފިޔާ
• ބާސްމަތީ ހަނޑޫ (އެންމެ މޮޅު): 136 ރުފިޔާ
• އާދައިގެ ފުށް: 10 ރުފިޔާ

ފިޠުރު ޒަކާތަކީ ކޮންމެ މުސްލިމެއްގެ މައްޗަށް ދެއްކުން ވާޖިބު، ދީނުގެ މުހިންމު ރުކުނެކެވެ.