ސިޔާސީ ގޮތުން މަންފާއެއް ހޯދުމަށް އިސްލާމްދީން ހަތިޔާރަކަށް ނަގައިގެން އެމްޑީޕީއިން ކުރާ ކަންކަން ބަލައެއް ނުގަނެވޭނެކަމަށް މަތިވެރި ދާއިރާގެ މެމްބަރު ހަސަން ޒަރީރު ވިދާޅުވެއްޖެއެވެ.
މެމްބަރު މިހެން ވިދާޅުވީ ސަންގުޓީވީގެ ޚަބަރަށްފަހު ޕްރޮގްރާމްގައި ވާހަކަ ދައްކަވަމުންނެވެ.
މެމްބަރު މިހެން ވިދާޅުވީ މިސްކިތްތަކަށް ގެންލުންދީ މިސްކިތްތަކަށް ވަދެ ގެއްލުންދޭ މީހުނަށް ޓެރަރިޒަމްގެ ޤާނޫނުގެ ދަށުންދޭންއޮތް އެންމެ ހަރުކަށި އަދަބު ދޭން ހުށައަޅާފައިވާ އިސްލާހާއި ގުޅޭގޮތުން ވާހަކަދައްކަވަމުންނެވެ.
މެމްބަރު ޒަރީރުވަނީ އެމްޑީޕީއިން މިއިސްލާހު ހުށައެޅީ ހަމަ ހަޤީގަތުގައި އެކަން އެގޮތަށް ބޭނުންވެގެން ކަމާއިމެދު ޝައްކުކުރައްވާފައެވެ. އެހެނީ އެމްޑީޕީއިން ހުށައެޅި އިސްލާހަށް ވާހަކަދައްކާނެ މީހެއް ނެތިގެން އެކަން ޕީގީ ލީޑަރ ފާހަގަކުރެއްވީމައިވެސް ބަހުސް ކޮށްފައިވަނީ އެންމެ ދެ މެމްބަރުން ކަމަށްވެފައި އެމްޑީޕިގެ ވެރިކަމުގައި ކަންކަން އިސްލާހު ކުރުމުގެ ފުރުސަތު ލިބި އެކަންކަން ކުރުމުގެ އާރާއި ބާރު ލިބިމެ އެއްވެސް ކަމެއް ނުކޮށް ދޫކޮށްލާފައި މިއަދު އިސްލާހުތަކުގެ ވާހަކަ ދެއްކާތީ ކަމަށް މެމްބަރު ވިދާޅުވިއެވެ.
މިކަމުންވެސް ދޭހަވަނީ މިއީ އިސްލާހު ހުށައެޅުއްވި މެމްބަރު އަމިއްލަފުޅަށް ހުށައެޅުއްވި އިސްލާހެއްގެ ގޮތުގައި ޤަބޫލުފުޅު ކުރެވޭ ކަމުގައި ޒަރީރު ވިދާޅުވިއެވެ. ކިތަންމެ ރަނގަޅު އިސްލާހެއް ހުށައެޅިކަމުގައި ވިޔަސް އެމްޑީޕީއިން ކަންކަން ސިޔާސީ ކުރާކަން ފާހަގަކުރައްވާ މެމްބަރުވަނީ ކަންބޮޑުވުން ފާޅުކުރައްވާފައެވެ.
ވަކިން ޙާއްސަކޮށް ދީނީ ކަންކަމަކީ ސިޔާސީ ކުރަންޖެހޭ ކަމެއް ނޫންކަމަށް މެމްބަރު ވިދާޅުވިއެވެ. މިގޮތުން އެއްބަޔަކު އަނެއްބަޔަކަށް ލާދީނީ ގޮވާ ހެދުމަކީ އެމަނިކުފާނު އެއްގޮތަކަށްވެސް ޤަބޫލްކުރައްވާ ކަމެއް ނޫންކަމަށް މެމްބަރު ވިދާޅުވިއެވެ. އެހެނީ އެއީ މަތްވެގެންވާ އިސްލާމް ދީނުގައިވެސް ނަހީ ކުރައްވާފައިވާ ކަމެއްކަމަށް މެމްބަރު ވިދާޅުވިއެވެ. އެހެންކަމުން ސިޔާސީ ކަންކަމުގެ ތެރެއަށް ދީނީ ކަންކަން ވައްދާ މައްސުނި ނުކުރުމަށް މެމްބަރު އެދިވަޑައިގަތެވެ.
”ދީނީ ކަންކަމަކީ ސިޔާސީ ކުރަންޖެހޭ ކަމެއް ނޫން…. އެއްބަޔަކު އަނެއްބަޔަކު ލާދީނީގޮވާ އެއްބަޔަކު އަނެއްބަޔަކު އަދި ދީނާއިބެހޭ ގޮތުން ވަކިމީހަކީ ދީނަށް ލޯބިކުރާ މީހެއްނޫނޭ ބުނެ ނުވަތަ ކާފަރެކޭ ބުނެ އެގޮތަށް ވާހަކަ ދެއްކުމަކީ ހަޤީގަތުގައި ޒަމީރު ޤަބޫލުކުރާކަމެއް ނޫން“
މެމްބަރުގެ ވާހަކަ އިތުރަށް ކުރިއަށް ގެންދަވަމުން ވިދާޅުވީ އަޅުގަނޑުމެންނަކީ އެއް ދީނަކަށް ، އެއްބަހަކަށް އެއްބައިވަންތަ ކަމާއިއެކީ އުޅެމުންދާ ބައެއްކަމަށެވެ. މިސާލެއްގެ ގޮތުން މީގެ އެތަކެއް އަހަރުތަކެއް ކުރިންވެސް އޭރުގައި ރާއްޖޭގައި ރަސްކަންކުރެއްވި ބޭފުޅުންވެސް ދިޔައީ މާތްވެގެންވާ އިސްލާމްދީނުގެ ދިފާއުގައި ގިނަ ގުނަ މަސައްކަތްތަކެއް ކުރައްވަމުން ކަމަށް މެމްބަރު ވިދާޅުވިއެވެ.
މާތް ﷲ ސުބުޙާނަހޫ ވަތައާލާ އެންމެ މާތްކުރައްވާފައިވާ ގެއަކީ އެކަލާގެ ގެކޮޅުކަމުގައިވާ މިސްކިތްކަމަށް މެމްބަރު ވިދާޅުވިއެވެ. މިގޮތުން މިސްކިތަކީ އަޅުގަނޑުމެން ހެއްދެވި ފަރާތާއި އެންމެ ގާތްވެވޭ ތަން ނުވަތަ ވަގުތު ކަމުގައި މެމްބަރު ވިދާޅުވިއެވެ. އަޅުކަންކުރާތަނަކީ ނުވަތަ މިސްކިތަކީ އާޙިރަތް ލިބިގެންވާ ގެ ކަމުގައި މެމްބަރު ވިދާޅުވިއެވެ. ނަމަވެސް ބައެއް ފަހަރު ދޭތެރެ ދޭތެރެއިން ބައެއް މީހުން މިސްކިތްތަކަށް ގެންލުންދީ މިސްކިތައް ވަދެ ނަމާދުކުރަންތިބޭ މީހުނަށް އުނދަގޫކޮށް މިސްކިތުގެ ތަކެއްޗަށް ގެންލުންދީ ވައްކަންކޮށް ހަދާކަން މެމްބަރު ހިތާމައާއިއެކު ފާހަގަކުރެއްވިއެވެ.
މިފަދަ ނޭއްގާނީ އަމަލުތައް ހުއްޓުވުމަކީ އަޅުގަނޑުމެން ކުރަންޖެހޭ ކަމެއްކަމަށް ވިދާޅުވެ މެމްބަރުވަނީ ހުށައެޅުނު މިއިސްލާހަށް ފުރިހަމައަށް ތާއީދު ކުރައްވާކަމަށް ވިދާޅުވެފައެވެ.
