ގަވައިދާ ހިލާފަށް ޕާކުކޮށްފައި ހުންނަ ވެހިކަލްތައް ޓޯކުރަމުން ދާނެކަމަށް ފުލުހުން ބުނެފި އެވެ.
ގަވާއިދާ ހިލާފަށް ޕާކުކޮށްފައި ހުރި ވެހިކަލްތައް ނެގުމަށް މިއަދަކީ ފަހު ދުވަހެވެ. އަދި މާދަމާއިން ފެށިގެން ވެހިކަލްތައް ޓޯކުރަން ފަށާނެކަމަށް ފުލުހުން ވަނީ ބުނެފަ އެވެ.
ފުލުހުން އިތުރަށް ބުނީ، މާލޭގެ އެކި ތަންތަނުގައި ބަހައްޓާފައި ހުރި އެއްގަމު އުޅަނދުތައް، މިމަހުގެ 22 ވަނަ ދުވަހުގެ 23:30 ގެ ކުރިން ނަގަން ޖެހޭނެ ކަމަށާއި އެ ތާރީހުގެ ފަހުން މާލޭގައި ގަވާއިދާއި ހިލާފަށް ޕާކުކޮށްފައި ހުރި އުޅަނދުތަކާއި، ރަޖިސްޓްރީނުކޮށް ބަހައްޓާފައި ހުރި އުޅަނދުތަކާއި އަދި އޭ ޒޯން ފިޔަވައި އެހެން ޒޯންޓަކަށް ރަޖިސްޓްރީކޮށްފައި ހުރި އުޅަނދުތައް ޓޯކޮށް ފުލުހުން ކަނޑައަޅާ ތަނަކަށް ގެންދެވޭނެ ކަމަށެވެ.
މާލޭގައި ގަވާއިދާ ހިލާފަށް ޕާކުކޮށްފައި ހުރި އުޅަނދުތަކާއި، ރަޖިސްޓްރީ ނުކޮށް ބަހައްޓާފައި ހުރި އުޅަނދުތަކާއި އަދި އޭ ޒޯން ފިޔަވާ އެހެން ޒޯންތަކަށް ރަޖިސްޓްރީކޮށްފައި ހުރި އުޅަނދުތައް ކަމާއި ގުޅުން ހުރި އިދާރާތައް ގުޅިގެން މިމަހުގެ 23 ވަނަ ދުވަހުން ފެށިގެން ޓޯ ކުރަން ފަށާނެ ކަން ފުލުހުން އެންމެ ފުރަތަމަ ހާމަކުރީ މިމަހުގެ 20 ވަނަ ދުވަހުއެވެ.
އެގޮތަށް ގެންދާ އުޅަނދުތައް ގެންދިއުމުގަ އާއި ފުލުހުންގެ ހިދުމަތުން ކަނޑައަޅާ ތަނެއްގައި ބަހައްޓާފައި ހުންނަ ހުރުމުގައި ލިބޭ އެއްވެސް ގެއްލުމަކަށް ޒިންމާ ނުވާނެ ކަމަށް ފުލުހުން ވަނީ ވިދާޅުވެފައެވެ. އަދި ޓޯ ކުރެވޭ އުޅަނދުތައް ޓޯ ކުރުމަށްފަހު ބަހައްޓާފައި ހުންނަ ތަނުން އެހެން ތަނަކަށް ގެންދިއުމުގެ ޒިންމާ އުފުލަން ޖެހޭނީ އުޅަނދުތަކުގެ ވެރިފަރާތުން ކަމަށް ވެސް ފުލުހުން ވަނީ ބުނެފަ އެވެ.
