ދުނިޔޭގެ ތިމާވެށީގެ ދުވަހުގެ މުނާސަބަތުގައި ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ކުރެއްވި އެކްސްގައި ކުރެއްވި ޕޯސްޓެއްގައި، ރާއްޖޭގެ ތިމާވެށި ޙިމާޔަތްކުރުމަށާއި އިޤްތިޞާދު ވަރުގަދަކުރުމަށް ސަރުކާރުން ގެންގުޅުއްވާ މުހިންމު ސިޔާސަތުތައް ހާމަކުރައްވައިފިއެވެ.
ރައީސުލްޖުމްހޫރިއްޔާ ވިދާޅުވީ، ރާއްޖޭގެ ގުދުރަތީ ރީތި ތިމާވެށި ޙިމާޔަތްކޮށް، ދެމެހެއްޓެނިވި ތަރައްޤީގެ ލަނޑުދަނޑިތައް ޙާޞިލްކުރެވޭނީ އިޢާދަކުރުވަނިވި ސާފު ހަކަތަ ބޭނުންކުރުން އިތުރުކޮށްގެން ކަމަށެވެ.
ވޭތުވެ މިދިޔަ ދެ އަހަރަކީ ރާއްޖޭގެ ތާރީޚުގައި މި ރޮނގުން އެންމެ އެދެވޭ އަދި އެންމެ ރަނގަޅު ނަތީޖާއެއް ޙާޞިލްކުރެވުނު ދެ އަހަރުކަން އެމަނިކުފާނު ފާހަގަކުރެއްވިއެވެ.
މީގެ އިތުރުން، ސަރުކާރުގެ އަމާޒަކީ މި ފަސް އަހަރުގެ ދައުރުގެ ތެރޭގައި ރާއްޖޭގައި އިޢާދަކުރުވަނިވި ހަކަތައިން ކަރަންޓު އުފައްދާ މިންވަރު 33 އިންސައްތައަށް މަތިކުރުން ކަމަށް ރައީސް ވިދާޅުވެފައިވާއިރު، މި ލަނޑުދަނޑި ޙާޞިލްކުރުމުގެ ސަބަބުން ތިމާވެށްޓަށް ކުރާ ފައިދާގެ އިތުރުން، ޤައުމުގެ އިޤްތިޞާދަށް ވެސް ބޮޑެތި ހެޔޮ ބަދަލުތަކެއް އަންނާނެކަމުގެ ޔަޤީންކަން ރައީސުލްޖުމްހޫރިއްޔާ ދެއްވިއެވެ.
ތިމާވެށީގެ ދުވަހާ ގުޅިގެން ރައީސް މިފަދަ މެސެޖެއް ދެއްވާފައިވަނީ، ތިމާވެށި ރައްކާތެރިކުރުމަކީ ދިވެހިރާއްޖޭގެ ދެމިއޮތުމާ ސީދާ ގުޅިފައިވާ ކަމަކަށްވާތީއާއި، ތެލަށް ބަރޯސާވާ މިންވަރު ކުޑަކޮށް ޚަރަދު ކުޑަކުރުމަށް ސަރުކާރުން އިސްކަންދޭ ދަނޑިވަޅެއްގައެވެ.
