ރާއްޖޭގެ 11 ރަށެއްގައި ލެބޯޓްރީ ގާއިމްކޮށް ހިދުމަތްދޭން ފަށައިފިއެވެ.
2026 ވަނަ އަހަރު ނިމުމުގެ ކުރިން، ލެބޯރެޓަރީ ނެތް 76 ރަށެއްގައި ލެބޯރެޓަރީ ގާއިމުކުރުމަށް ކުރެވިގެންދާ މަސައްކަތުގެ ތެރެއިން، މި މަހުގެ 18 ގެ ނިޔަލަށް 11 ރަށެއްގައި ލެބޯރަޓަރީ ގާއިމުކުރެވި ހިދުމަތް ދޭން ފަށާފައިވާކަމަށް ސިއްހީ ވުޒާރާއިން މައުލޫމާތުދެއެވެ.
ރާއްޖޭގެ 76 ރަށެއްގައި މި އަހަރު ނިމުމުގެ ކުރިން ލެބޯޓްރީ ހިދުމަތް ދިނުމުގެ ޕްރޮގްރާމަކީ ރައީސުލްޖުމްހޫރިއްޔާ ޑރ. މުހައްމަދު މުއިއްޒުގެ ރިޔާސީ ވައުދުފުޅެކެވެ. އެގޮތުން އެންމެ ފަހުން ލެބޯޓްރީ ހުޅުވާފައިވަނީ ނ. މާފަރު، ނ. މިލަދޫ އަދި ނ. މާޅެންދޫގައެވެ.
ސިއްހަތާއި ބެހޭ ވަޒީރު އަބްދުﷲ ނާޒިމް އިބްރާހިމް ވިދާޅުވީ ރައީސް މުއިއްޒުގެ ސިޔާސަތަކީ މީހުން ދިރިއުޅޭ ކޮންމެ ރަށެއްގައި ލެބޯޓްރީއެއް ގާއިމް ކުރުމާއެކު ރައްޔިތުންނަށް ލުއިފަސޭހަކަމާއެކު އެ ޚިދުމަތް ލިބޭނެ މަގުފަހިކުރުން ކަމަށެވެ. އަދި މި ސަރުކާރުގެ އެންމެ ބޮޑު އަމާޒަކަށް ހެދީ އެ 76 ރަށުގައި ޕޮއިންޓް އޮފް ކެއާގެ އުސޫލުން ނަމަވެސް ވީހާވެސް އަވަހަކަށް ހިދުމަތް ފަށައިގަތުން ކަމަށެވެ.
އަތޮޅުތަކުގެ ބައެއް ރަށްރަށުގައި އެކަށީގެންވާ ގޮތެއްގައި ލެބޯޓްރީ ޓެސްޓު ހެދޭނެ އިންތިޒާމު ނެތުމުގެ ސަބަބުން، އެރަށްތަކުގެ އަތޮޅުތެރޭގެ ރައްޔިތުން ޓެސްޓު ހެދުމަށް ހޮސްޕިޓަލެއް ހުންނަ ރަށަކަށް ނުވަތަ މާލެއަށް ދަތުރުކުރަން ވަނީ މަޖުބޫރުވެފައެވެ. މިކަމަށް ޙައްލެއް ގެނައުމަށްޓަކައި ސަރުކާރުން މަސައްކަތް ފައްޓަވާފައިވާއިރު، މީހުން ދިރިއުޅޭ ކޮންމެ ރަށެއްގައި ލެބޯޓްރީގެ ޚިދުމަތް ޤާއިމްކުރުމަކީ ސަރުކާރުގެ މުހިންމު ވަޢުދެކެވެ.
އެކަށީގެންވާ ލެބޯޓަރީ ޓެސްޓުތައް ހެދޭނެ އިންތިޒާމު ގިނަ ރަށްރަށުގައި ނެތުމަކީ ރައްޔިތުންގެ އޮތް ބޮޑު ކަންބޮޑުވުމަކަށްވާއިރު މިއަހަރު ނިމޭއިރު ކޮންމެ ރަށެއްގެ އާބާދީގެ ނިސްބަތުން އެރަށެއްގައި ލެބޯޓަރީގެ ޚިދުމަތް ޤާއިމުވެގެންދާނެކަމަށް ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ވިދާޅުވެފައިވާކަން ފާހަަގަކުރެވެއެވެ.
