ބޭސްފަރުވާއަށް ރާއްޖޭން ބޭރަށް ދަތުރުކުރާ ދިވެހިންނަށް ޑޮލަރު ހޯދުމުގައި ކުރިމަތިވާ ދަތިތަކަށް ހައްލެއް ހޯދައިދިނުމުގެ ގޮތުން، ބޭންކް އޮފް މޯލްޑިވްސް (ބީއެމްއެލް) ގެ މޮބައިލް އެޕްލިކޭޝަން މެދުވެރިކޮށް ޑޮލަރަށް އެދި ހުށަހެޅޭނެ ފަސޭހަ އިންތިޒާމެއް އެ ބޭންކުން ތައާރަފްކޮށްފިއެވެ.
މި ޚިދުމަތް ތައާރަފްކުރުމާއެކު، ބޭސްފަރުވާއަށް ރާއްޖޭން ބޭރަށް ދަތުރުކުރާ ފަރާތްތަކަށް މިހާރުން ފެށިގެން ބީއެމްއެލް މޮބައިލް އެޕް މެދުވެރިކޮށް ކޮންމެ ތަނެއްގައި ހުރެގެންވެސް ފަސޭހަކަމާއެކު ޑޮލަރަށް އެދި ހުށަހެޅޭނެއެވެ.
ޑޮލަރު ގަތުމަށް އެދި ހުށަހަޅާއިރު ބޭނުންވާނެ ލިޔެކިޔުންތަކާއި މައުލޫމާތު އެޕް މެދުވެރިކޮށް އަޕްލޯޑް ކުރެވޭއިރު، ހުށަހަޅާފައިވާ އެޕްލިކޭޝަން އޮތް ހިސާބު ނުވަތަ ސްޓޭޓަސްވެސް ހަމަ އެޕް މެދުވެރިކޮށް ބަލައިލެވޭނެއެވެ.
ބީއެމްއެލްއިން ހާމަކޮށްފައިވާ ގޮތުގައި، އާސަންދަ ނުވަތަ އެންސްޕާގެ އެހީގައި ބޭސްފަރުވާއަށް ދަތުރުކުރާ ފަރާތްތަކަށް 2,000 ޑޮލަރާ ހަމައަށް ބޭންކުން ޑޮލަރު ވިއްކާނެއެވެ. އަދި އަމިއްލަ ޚަރަދުގައި ބޭސްފަރުވާއަށް ދަތުރުކުރާ ފަރާތްތަކަށް 1,000 ޑޮލަރާ ހަމައަށް ޑޮލަރު ވިއްކުމަށް ވަނީ ހަމަޖެހިފައެވެ.
މި ޚިދުމަތުގެ ދަށުން ވިއްކާ ޑޮލަރު ޖަމާކޮށްދޭނީ ޑޮލަރަށް އެދި ހުށަހަޅާ ފަރާތުގެ ބީއެމްއެލް އެކައުންޓަށެވެ. ބީއެމްއެލްގައި އެކައުންޓެއް ނެތް ފަރާތްތަކަށްވެސް ބޭންކުގެ އެޕްލިކޭޝަން މެދުވެރިކޮށް ފަސޭހަކަމާއެކު އައު އެކައުންޓެއް ހުޅުވޭނެ އިންތިޒާމު މިހާރު ވަނީ ހަމަޖެހިފައެވެ.
ރައީސުލްޖުމްހޫރިއްޔާ ޑރ. މުހައްމަދު މުއިއްޒުގެ ސަރުކާރުން ރައްޔިތުންނަށް ފޯރުކޮށްދޭ ޚިދުމަތްތައް ލުއިފަސޭހަކުރުމަށް ކުރަމުންދާ މަސައްކަތްތަކާ އެއްގޮތްވާ ގޮތުގެ މަތިން، ބީއެމްއެލްއިން ގެނައި މި ބަދަލަކީ ބޭސްފަރުވާއަށް ރާއްޖޭން ބޭރަށް ދާ ފަރާތްތަކަށް ވަގުތު ސަލާމަތްވެ، ބޭންކަށް ނުގޮސް ޚިދުމަތް ހޯދުމަށް މަގުފަހިވެގެންދާނެ ކަމެކެވެ.
މި ޚިދުމަތާ ގުޅޭ އިތުރު މައުލޫމާތު ބޭންކުގެ ވެބްސައިޓް www.bankofmaldives.com.mv/foreign-currency-support-to-maldivians އިން ލިބޭނެއެވެ.
