ލާމަރުކަޒީ ގާނޫނުގެ އެއްވެސް ތަނެއްގައި ކައުންސިލްތަކަކީ ސަރުކާރު ޖަވާބުދާރީ ކުރުވަން ޖެހޭ ބައެއްކަން ބަޔާންކޮށްފައި ނުވާކަމަށް މާލޭ ސިޓީ ގްރޫޕް އޮފް ހޮސްޕިޓަލްސްގެ ސީއީއޯ އަބްދުއްރައްޒާގް ހަލީމް ވިދާޅުވެއްޖެއެވެ.
ހަލީމް މިހެން ވިދާޅުވީ ކޮންގްރެސް ޕާޓީގެ ގަލޮޅު ދެކުނު ކެމްޕެއިން ޖަގަހަ އިފްތިތާޙް ކުރުމުގެ ޙަފްލާގައި ވާހަކަފުޅު ދައްކަވަމުންނެވެ.
ލާމަރުކަޒީ ގާނޫނުގެ ބައެއް މާއްދާތަކަށް އަލިއަޅުއްވާލައްވަމުން ހަލީމް ވިދާޅުވީ، ގާނޫނު އެއްކޮށް ވިދާޅުވިއިރުވެސް ސަރުކާރު ޒިންމާދާރު ކުރުވަން ޖެހޭ މާއްދާއެއް ފެނިވަޑައިގެންފައި ނުވާ ކަމަށެވެ. އަދި އިދިކޮޅު ފަރާތްތަކުން ރައްޔިތުންގެ ލޮލުގައި އަނދުން އެޅުވުމަށް މަސައްކަތް ކުރަމުންދާ ކަމަށްވެސް އޭނާ ތުހުމަތު ކުރެއްވިއެވެ.
ހަލީމް ފާހަގަކުރެއްވި ގޮތުގައި ގާނޫނުގައި އޮތީ ކައުންސިލްތައް ޖަވާބުދާރީ ވާންޖެހޭ ވާހަކަ ކަމަށާއި، ސަރުކާރު ޖަވާބުދާރީ ކުރުވުމުގެ ވާހަކައެއް ނެތް ކަމަށެވެ.
”ވަރަށް ތަފްސީލުކޮށް ގާނޫނުގައި މިއޮތީ ބަޔާންކޮށްފައި އުސޫލުން ހިންގުމުގެ ބޭނުން. އެހެންވީމާ މިކަމުގައި އަޅުގަނޑުމެންގެ ސަރުކާރާއި ގުޅިގެން މިކަން ކޮށްދެއްވާނެ ކެންޑިޑޭޓުން ހޮވުމަކީ އަޅުގަނޑުމެންގެ މަގްސަދު. އަދި މިކަމުގައި އަޅުގަނޑުމެންގެ ރައީސުލްޖުމްހޫރިއްޔާ މާލެ ސަރަހައްދަށް ކުރައްސަވާފައިވާ ތަސައްވުރު ހަގީގަތަކަށް ހެއްދެވޭނީ ހަމައެކަނި މި އުސޫލުން މި ބޭނުމުގައި ހޮވައިގެން،“ ހަލީމް ވިދާޅުވިއެވެ.
ސިޓީ ކައުންސިލްތަކުގެ ބާރުތަކާ ގުޅޭގޮތުން ވާހަކަ ދައްކަވަމުން ހަލީމް ވިދާޅުވީ، ކައުންސިލްތަކުން ޕްރައިމަރީ ހެލްތުކެއަރގެ ހިދުމަތްތައް ވެސް ދޭން ޖެހޭ ކަމަށެވެ. ނަމަވެސް، ގިނަ ކަންކަން ކައުންސިލްތަކުގެ ބާރުގެ ތެރޭގައި ނުވަތަ ކައުންސިލަށް މަތިކޮށްފައި އޮންނައިރުވެސް، ސަރުކާރުގެ މިނިސްޓްރީތަކާއި އެކި ކުންފުނިތަކުން އެ މަސައްކަތްތައް ކުރަމުންދާކަން އޭނާ ފާހަގަކުރެއްވިއެވެ.
ހަލީމްގެ ވާހަކަ ނިންމާލަމުން ވިދާޅުވީ، ޕީއެންސީގެ ކެންޑިޑޭޓުން އިންތިޚާބުވުމުން މިހާރަށްވުރެ ފުޅާކޮށް މި މަސައްކަތްތައް ކުރިއަށްގެންދާނެ ކަމަށެވެ. އަދި ސަރުކާރާ ގުޅިގެން މަސައްކަތް ކުރާނެ ކެންޑިޑޭޓުން ހޮވުމަކީ ރައީސުލްޖުމްހޫރިއްޔާގެ ތަސައްވުރުތައް ހަގީގަތަކަށް ހެދުމަށް އޮތް އެންމެ ރަނގަޅު މަގު ކަމަށްވެސް އޭނާ ވިދާޅުވިއެވެ.
