މާލެއަށް ބޯކޮށް ވާރޭވެހޭ ކޮންމެ ފަހަރަކު ކުރިމަތިވާ ފެންބޮޑުވުމުގެ މައްސަލައަށް ދާއިމީ ހައްލެއް ހޯދުމަށްޓަކައި، މާލޭގެ ފެން ހިންދާ ނިޒާމު ހަރުދަނާ ކުރުމުގެ އައު މަޝްރޫއެއް ފެށުމަށް ސަރުކާރުން މިހާރު ވަނީ ތައްޔާރުވެފައެވެ. މި މަޝްރޫއަކީ ’ޕްރޮޖެކްޓް ފޮ ޑިޒާސްޓް ރެޒިލިއެންސް އެންހޭންސްމަންޓް އިން މާލެ އައިލެންޑް‘ ގެ ދަށުން ކުރިއަށްގެންދާ މަސައްކަތެކެވެ.
މި މަޝްރޫއުގެ ކޮންސްޓްރަކްޝަން ފޭސްގެ ޕެކޭޖް ދޭއްގެ އެއްބަސްވުމުގައި މިހާރު ވަނީ ރަސްމީކޮށް ސޮއިކޮށްފައެވެ. މިއީ ޖަޕާނު ސަރުކާރުގެ އިކޮނޮމިކް އެންޑް ސޯޝަލް ޑިވެލޮޕްމަންޓް ޕްރޮގްރާމުގެ ދަށުން ދިވެހިރާއްޖެއަށް ލިބޭ އެހީތެރިކަމެކެވެ. މި އެއްބަސްވުމުގައި ކޮންސްޓްރަކްޝަން މިނިސްޓްރީގެ ފަރާތުން ސޮއިކުރެއްވީ ސްޓޭޓް މިނިސްޓަރު ޙަސަން ރަޝީދެވެ. އަދި ޖަޕާންގެ ޓެކް އިންޓަނޭޝަނަލް އިންކޯޕަރޭޝަންގެ ފަރާތުން ސޮއިކުރެއްވީ އެ ކުންފުނީގެ ޑިރެކްޓަރު މަކޯޓޯ ޔޮކޮށީ އެވެ.
މި މަޝްރޫއުގެ ދަށުން މާލޭގެ ފެން ހިންދާ ނިޒާމަށް ބޮޑެތި ބަދަލުތަކެއް ގެނައުމަށް ވަނީ ރޭވިފައެވެ. އޭގެ ތެރޭގައި މާލޭގެ އެކި ސަރަހައްދުތަކުގައި ގާއިމްކޮށްފައިވާ 16 ޕަންޕް ސްޓޭޝަނެއް އޮޓޮމޭޓް ކުރުމަށް ބޭނުންވާ ޒަމާނީ އާލާތްތައް ހަރުކުރުން ހިމެނެއެވެ. މީގެ ސަބަބުން،، ފެންބޮޑުވާ ހާލަތްތަކުގައި އަމިއްލައަށް ޕަންޕްތައް މަސައްކަތްކޮށް ފެން ހިންދުމުގެ ގާބިލުކަން އިތުރުވެގެންދާނެއެވެ.
ޕަންޕް ސްޓޭޝަންތައް އޮޓޮމޭޓް ކުރުމުގެ އިތުރުން، މި ނިޒާމު މޮނިޓަ ކުރުމަށްޓަކައި ’ސެންޓްރަލައިޒްޑް މޮނިޓަރިންގް ސްޓޭޝަން‘ އެއް ގާއިމްކުރުމަށް ވަނީ ހަމަޖެހިފައެވެ. މި މަރުކަޒުގެ އެހީގައި ހުރިހާ ޕަންޕްތަކެއްގެ ހާލަތު އެއް ތަނަކުން ބަލައިލެވޭނެއެވެ. އަދި ނިޒާމުގެ މެއިންޓެނަންސް ނުވަތަ ބެލެހެއްޓުމުގެ މަސައްކަތްތަކަށް ބޭނުންވާ ހާއްސަ ޖެޓިންގ ވެހިކަލެއްވެސް މި މަޝްރޫއުގެ ދަށުން ފޯރުކޮށްދިނުމަށް ވަނީ އެއްބަސްވެފައެވެ.
މާލެއަކީ ބިމުގެ ނިސްބަތުން ތޮއްޖެހިފައިވާ ރަށަކަށްވެފައި، ތާރު އަޅައިގެން މަގުތައް ހަދާފައިވުމުން ވާރޭފެން ބިމަށް ހިފެހެއްޓުމުގެ ފުރުސަތު ކުޑައެވެ. އެހެންކަމުން، މިފަދަ ޒަމާނީ ފެން ހިންދާ ނިޒާމެއް ގާއިމްވުމަކީ ރައްޔިތުންގެ މުދަލަށާއި ގެދޮރަށް ލިބޭ ގެއްލުންތައް ކުޑަކުރުމަށް އެޅޭ މުހިންމު ފިޔަވަޅެކެވެ. ޖަޕާނު ސަރުކާރުގެ ފަންނީ އަދި މާލީ އެހީތެރިކަމާއެކު ކުރިއަށްދާ މި މަޝްރޫއަކީ މާލޭގެ އުމްރާނީ ތަރައްގީއަށް ލިބޭނެ ބޮޑު ކުރިއެރުމެކެވެ.
މާލޭގެ ފެން ހިންދާ ނިޒާމު ހަރުދަނާ ކުރުމުގެ މި މަޝްރޫއަކީ ވެރިރަށުގެ މަގުތަކުގައި ފެންބޮޑުވުމުގެ މައްސަލައަށް އޮތް އުންމީދީ ހައްލެކެވެ. ޓެކްނޮލޮޖީގެ އެހީގައި ނިޒާމު އޮޓޮމޭޓް ކުރެވި، މޮނިޓަރިންގް ވަރުގަދަ ކުރެވުމުން، ކުރިމަތިވެދާނެ ގުދުރަތީ ކާރިސާތަކުން ސަލާމަތްވުމަށް ދިވެހިރާއްޖެއަށް އިތުރު ބާރަކަށް މި މަޝްރޫއު ވެގެންދާނެއެވެ.
