ސަރުކާރުން ރައްޔިތުންނަށް ފޯރުކޮށްދޭން ބޭނުންވާ އަސާސީ ހިދުމަތްތަކާއި ތަރައްގީގެ މަޝްރޫއުތަކަށް ބައެއް ކައުންސިލްތަކުން ގަސްދުގައި ހުރަސްއަޅަމުންދާތީ، އެކަންކަން ހައްލުކުރުމަށް ގާނޫނީ ގޮތުން ވެސް އެނގުންތައް ފޮނުވާފައިވާނެކަމަށް ލޯކަލް ގަވަރްމަންޓް އޮތޯރިޓީ (އެލްޖީއޭ) ގެ ރައީސް މުހައްމަދު ނިމާލް ވިދާޅުވެއްޖެއެވެ.
އަންނަ އޭޕްރިލް މަހުގެ 4 ގައި ލޯކަލް ކައުންސިލް އިންތިހާބު ބާއްވާއިރު، އެންމެ ބޮޑަށް ދެކެވޭ އެއް ވާހަކައަކީ ސަރުކާރަށް އެއްބާރުލުން ދޭނެ ކައުންސިލެއް ހޮވުމާއި ގުޅޭގޮތުންނެވެ. އެގޮތުން ޕީއެންސީގެ ޖަލްސާއެއްގައި ރައީސް ޑރ. މުހައްމަދު މުއިއްޒު ވެސް ވަނީ، ތަރައްގީގެ މަޝްރޫއުތަކަށް ބައެއް ކައުންސިލްތަކުން ހުރަސް އަޅާކަމަށް ވިދާޅުވެފަ އެވެ. އެގޮތުން އެ ކައުންސިލްތަކުން ޕްރޮޖެކްޓުތަކަށް ބޭނުންވާ ބިން ދޫނުކޮށް ލަސްކުރުމާއި، ކައުންސިލްގެ ތެރެއިން ދޭން ޖެހޭ ހުއްދަތައް ނުދީ ހިފެހެއްޓުން ފާހަގަކުރެއްވި އެވެ.
އެކަން ދޮގުކޮށް، އެމްޑީޕީ ބުނެފައި ވަނީ ރައީސް މުއިއްޒު ދެއްކެވީ އެއްވެސް އަސްލެއް ނެތް ވާހަކަތަކެއް ކަމަށެވެ. އަދި ސަރުކާރަށް ހުރަސްއެޅީ ކޮން ކައުންސިލްތަކަކުންތޯ ސުވާލު އުފައްދައި، ނަންތައް ހާމަކުރުމަށް ވެސް ގޮވާލި އެވެ. ކައުންސިލްތަކުން ސަރުކާރަށް އުނދަގޫވާ ގޮތަށް މަސައްކަތް ކުރާތީ، އެލްޖީއޭ މައްސަލައިގެ ތެރެއަށް ވަދެ ބައެއް ކަންކަން ހައްލުކޮށްފައި ވެއެވެ.
އެލްޖީއޭ އެޅި ފިޔަވަޅުތަކާއި ގުޅޭގޮތުން ”ސަންގު“ އާއި ވާހަކަ ދައްކަވަމުން ނިމާލް ވިދާޅުވީ ބައެއް ރަށްރަށުގެ ކައުންސިލްތަކުން ސިޔާސީ މަގްސަދުތަކުގައި ރައްޔިތުންނަށް ވަރަށް ބޮޑަށް ދަތިވާނެ ގޮތަށް އުނދަގޫ ހާލަތްތަކަށް ކަންކަން ގެންގޮސްފައިވާ ކަމަށެވެ. އިންތިހާބެއް އޮއްވައި، އަދި އޭގެ ތެރެއިން ބައެއް މެމްބަރުންނަކީ ދެވަނަ ދައުރަކަށް ވާދަކުރާ ކެންޑިޑޭޓުންކަމަށް ވާތީ ވަކިވަކި ކައުންސިލްތަކުގެ ނަންތައް މިވަގުތު ހާމަކުރުމަކީ އިންތިހާބީ ހައްގަކަށް އުނިކަން އަތުވެދާނެކަމެއްގެ ގޮތުގައި ނިމާލް ފާހަގަކުރެއްވި އެވެ.
ކައުންސިލްތަކުގެ ސަބަބުން ދިމާވާ ދަތިތަކާއި ގުޅޭ މިސާލެއް ދެއްވައި ނިމާލް ވިދާޅުވީ، އެއް ރަށެއްގެ ދެ އަވަށުގައި ހުންނަ ދެ މިސްކިތުގެ ތެރެއިން، ކައުންސިލް މެންބަރުން ނިސްބަތްވާ އަވަށުގެ މިސްކިތް ބެހެއްޓުމަށް ފަހު އަނެއް އަވަށުގެ މިސްކިތް ބަންދުކުރުން ފަދަ އާންމު މަސްލަހަތު ގެއްލޭ ކަންކަން ތަކުރާރުވަމުންދާ ކަމަށެވެ. އެކަމުގެ ކަންބޮޑުވުންތައް ސީދާ އިސްލާމިކް މިނިސްޓަރުގެ ފަރާތުން ލިބޭއިރު، ނިމާލް ވިދާޅުވީ މިސްކިަތުގައި ނަމާދު ކުރުމުގެ ހުއްދަ ދޫކުރުމުން ވެސް ކައުންސިލުން އެކަމަށް ހުރަސްއަޅާ ކަމަށެވެ.
މި މައްސަލާގައި އިސްލާމިކް މިނިސްޓަރު ޑރ. މުހައްމަދު ޝަހީމް އަލީ ސައީދު ވެސް ތަފާތު އެކި ފަހަރުމަތިން ކަންބޮޑުވުން ފާޅުކުރައްވައި، މިކަން ހުއްޓުވޭނެ ގޮތެއް ހޯދައިދިނުމަށް އެލްޖީއޭގެ ކިބައިން އެދިވަޑައިގެންފައިވާކަމަށް ނިމާލް ވިދާޅުވި އެވެ.
ރަށްރަށުގައި މި އޭޓީއެމް މެޝިން ބެހެއްޓުމުގައިވެސް މިއީ ހަމަ ވަރަށް ގިނަ ރަށްރަށުން އެކަމުގައި ސަރުކާރާއި އިދިކޮޅު ކައުންސިލްތައް އޮންނަ ފަރާތްތަކުން ކުރަމުން މިގެންދާ ކަންތައްތަކުގެ ތެރޭގައި ބިން ހަމަޖައްސައިދިނުމުގެ ކަންތައްތަކުގަވެސް ވަރަށް ބޮޑަށް ދަތިކުރޭ… މި ފަހަރު މި ގާނޫނަށް ގެނައި މި އިސްލާހުގަ މި އޮންނަނީ އެލްޖީއޭއަށް އެ ބާރުތަކެއް ދީފަ ސަރުކާރުން ހިންގާ ތަރައްގީގެ މަޝްރޫއުތަކަށް މި ހުރަސް އަޅާކަމަށް ވެއްޖިއްޔާމު އެލްޖީއޭއިން އެ ތަންތަނުގައި ބިން ކަނޑާފަ ދެވިދާނެ ކަމަށް. އެ ގާނޫނު އަސްލުގަ ވުޖޫދުވާން ޖެހުނު މައިގަނޑު ސަބަބަކީ ވެސް ސަރުކާރުން ރައްޔިތުންނަށް ވެފައިވާ ވައުދުތައް ފުއްދުމުގަ ތަރައްގީގެ މަޝްރޫއުތައް ކުރިއަށް ގެންދިއުމުގައި އެކަންކަމަށް ހުރަސް އަޅާތީވެ… ގިނަ ފަހަރަށް އެ ރަށްރަށުގެ ރައްޔިތުންނަކަށް މިކަމެއް ނުއެއް އެނގޭނެ.. މީ ހަމަ ކައުންސިލުން އެގޮތަށް އެމީހުން މި ސިޔާސީ މަގްސަދެއްގަ އެކަންކަން ކުރީމަ.
މީގެ އިތުރުން، ރަށްރަށުގައި އޭޓީއެމް ބެހެއްޓުމާއި، ފުޓްސަލް ދަނޑު އެޅުން ފަދަ ކަންކަމުގައި ވެސް ސަރުކާރާ އިދިކޮޅު ކައުންސިލްތަކުން ބިން ހަމަޖައްސައިދިނުމަށް ދެކޮޅު ހަދައި، އެކަންކަމަށް ހުރަސް އަޅަމުންދާކަމަށް ނިމާލް ވިދާޅުވިއެވެ. ނިމާލް ވިދާޅުވީ، ގާނޫނަށް ގެނައި އިސްލާހުގެ ދަށުން، ސަރުކާރުގެ ތަރައްގީގެ މަޝްރޫއުތަކަށް ހުރަސްއަޅާ ނަމަ އެލްޖީއޭއަށް އެ ތަންތަނުން ބިން ކަނޑައި ދިނުމުގެ ބާރު ލިބިފައިވާތީ، މިހާރު ބައެއް ކަންކަމުގައި އެ ބާރުގެ ބޭނުންކުރަން ޖެހިފައިވާ ކަމަށެވެ.
ދާދިފަހުން ދިމާވި އިތުރު މިފަދަ މައްސަލައެއް ހިއްސާ ކުރައްވައި ނިމާލް ވިދާޅުވީ ސަރުކާރުން މިދިޔަ އަހަރުގެ ފަހުކޮޅު ރައްޔިތުންގެ ލާބައަށް ވަކި ކަމެއް ކޮށްދިނުމަށް، ސިޓީ ކައުންސިލަކަށް ފޮނުވި ސިޓީއަކަށް އަމަލުނުކޮށް ބޭއްވުމަށް ފަހު، މިހާރު ކުއްލިއަކަށް އެކަން ”އެކްޓިވޭޓް“ ކުރަން އުޅެނީ އެއީ އެ ސިޓީ ކައުންސިލްގެ މޭޔަރު ކޮށްދިން ކަމެއްގެ ގޮތުގައި ދެއްކުމަށް ކަމަށެވެ.
