ދިވެހި އުންމަތުގެ ޙައްޤުގައި އެންމެ ބޮޑު މަސައްކަތެއް ކުރި ޕާޓީއަކީ ޕީޕަލްސް ނޭޝަނަލް ކޮންގްރެސް (ޕީއެންސީ) ކަމަށާއި، އެ މަސައްކަތުގެ އެންމެ އިސް ލީޑަރަކީ ރައީސުލްޖުމްހޫރިއްޔާ ޑރ. މުހައްމަދު މުއިއްޒު ކަމަށް ކުޑަހުވަދޫ ދާއިރާގެ މެމްބަރު ހުސެން ހަމީދު ވިދާޅުވެއްޖެއެވެ.
ހަމީދު މިހެން ވިދާޅުވީ ކުރިއަށްއޮތް ލޯކަލް ކައުންސިލު އިންތިހާބާ ގުޅިގެން ކޮންގްރެސް ޕާޓީން ކުރިއަށްގެންދާ ”ދިވެހީންގެ ރާއްޖެ“ ޕްރޮގުރާމުގައި ވާހަކަދައްކަވަމުންނެވެ.
ހަމީދު ވިދާޅުވީ ރައީސުލްޖުމްހޫރިއްޔާ ބޭނުންފުޅުވަނީ އަތޮޅުތެރޭގެ ރައްޔިތުންގެ އަޑުއައްސަވައިގެން، ރައްޔިތުން ބޭނުންވެގެން ގެނައި ނިޒާމުގެ ތެރެއިން ވެރިކަން ކުރެއްވުމަށް ކަމަށެވެ. އަދި ރައްޔިތުން ބޭނުންވާ ތަރައްޤީ ގެނެވޭނީ މި ސަރުކާރަށް ކަމަށް ރައްޔިތުން މިއަދު ޤަބޫލުކުރާ ކަމަށާއި، ސަރުކާރުގެ ވައުދުތައް ފުއްދުމަށްޓަކައި ލޯކަލް ކައުންސިލް އިންތިޚާބުގެ މެޖޯރިޓީ ކޮންގްރެސް ޕާޓީއަށް ލިބުން މުހިންމު ކަމަށް އޭނާ ފާހަގަކުރެއްވިއެވެ.
ރާއްޖޭގެ ސިޔާސީ ތާރީޚަށް އަލިއަޅުއްވާލައްވަމުން ހަމީދު ވިދާޅުވީ، އެއްފަހަރާ އެންމެ ގިނަ ކެނޑިޑޭޓުން ކުރިމަތިލީ ޕާޓީއަކީ ޕީއެންސީ ކަމަށެވެ. އަދި އިންތިޚާބަކާ ނުލައި މިހާރުވެސް 70 ގޮނޑި ކޮންގްރެސް ޕާޓީއަށް ކަށަވަރުވެފައިވާކަން އޭނާ ހާމަކުރެއްވިއެވެ. މިއީ ރާއްޖޭގެ ތާރީޚުގައި ވެރިކަން ކުރާ ޕާޓީއަކުން އިންތިޚާބަކާ ނުލައި މިހާ ގިނަ ގޮނޑި ކާމިޔާބުކުރި ފުރަތަމަ ފަހަރު ކަމަށާއި، މީގެ ސަބަބަކީ ރައީސް މުއިއްޒުގެ ހަރުދަނާ ސިޔާސަތުތައް ރައްޔިތުން ބަލައިގަތުން ކަމަށް އޭނާ ވިދާޅުވިއެވެ.
އިންތިޚާބަށް ވަމުންދާ ތައްޔާރީތަކާ ގުޅޭގޮތުން ހަމީދު ވިދާޅުވީ، ޕާޓީގެ ޖަގަހަތަކަށް ބޭނުންވާ ކެމްޕެއިން މެޓީރިއަލްތަކާއި ކެންޑިޑޭޓުންނަށް ބޭނުންވާ އެހީތެރިކަން ފޯރުކޮށްދެމުންދާ ކަމަށެވެ.
”ކެމްޕެއިން ކަންތައްތައް މިދަނީ ވަރަށް ރަނގަޅަށް ތަރުތީބުވެގެން. އެންމެ ދުރުގައި ހުންނަ ރައްޔިތު މީހާއާއި ހަމައަށް ކެމްޕެއިން ޓީމުތައް މިހާރު ވާސިލުވެފައިވާނެ،“ މެމްބަރު ވިދާޅުވިއެވެ.
މީގެ އިތުރުން، ރީ-ރެޖިސްޓްރޭޝަންގެ މަސައްކަތްތައް ނިމިފައިވާކަން ފާހަގަކުރައްވައި ހަމީދު ވިދާޅުވީ، މީގެ ކުރިން ވެރިކަން ކުރި ޕާޓީތަކުން ލޯކަލް ކައުންސިލް އިންތިޚާބަށް ދީފައި ނުވާ ފަދަ ބޮޑު އަހަންމިއްޔަތުކަމެއް ކޮންގްރެސް ޕާޓީން މިފަހަރު ދެމުންދާ ކަމަށެވެ. ނިމިދިޔަ އެމްޑީޕީގެ ވެރިކަމުގައި މިފަދަ ސަމާލުކަމެއް ނުދިނުމުގެ ނަތީޖާއަކަށްވީ ޕީއެންސީއަށް އޭރު މެޖޯރިޓީ ގެއްލިގެން ދިއުން ކަމަށްވެސް އޭނާ ވިދާޅުވިއެވެ.
